ខេត្តសៀមរាប ៖ ករណីគ្រោះថ្នាក់ចរាចរណ៏រវាងរថយន្តឡិចស៊ីស RX-300 ពណ៌ខ្មៅ ពាក់ផ្លាកលេខ ភ្នំពេញ 2L-9675 (ឡានតាក់ស៊ី)បានបើកបញ្ជ្រាសទិសគ្នាឡើងវ៉ារថយន្តមួយគ្រឿងទៀតមិនផុតបួងចង្កូតចូលវិញជ្រុលទៅបុកម៉ូតូបណ្តាលឱ្យស្លាប់ភ្លាមៗនៅហ្នឹងកន្លែងរួចចុះរត់គេចខ្លួនបាត់ បង្កឱ្យមានការកកស្ទះចរាចរណ៍ពេញលើដងផ្លូវជាតិលេខ៦ ។
ហេតុការគ្រោះថ្នាក់ចរាចរណ៍នោះបានកើតឡើងនៅវេលាម៉ោង០៧និង៣០នាទីព្រឹក ថ្ងៃទី១០ ខែធ្នូ ឆ្នាំ២០១៨ ស្ថិតនៅលើផ្លូវជាតិលេខ០៦ ត្រង់ចំណុចមុខសាលាបឋមសិក្សា សសរស្ដម្ភ ក្នុងទឹកដីភូមិសសរស្ដម្ភ ឃុំសសរស្ដម្ភ ស្រុកពួក ខេត្តសៀមរាប ។
លោកវរសេនីយ៍ឯក ពេទ ពុំសែន អធិការដ្ឋាននគរបាលស្រុកពួកបានប្រាប់ភ្នាក់ងារ កោះសន្តិភាព នៅវេលាម៉ោង២និង៣០នាទីរសៀល ថ្ងៃទី១២ ខែធ្នូ ឆ្នាំ២០១៨ ថាករណីគ្រោះថ្នាក់ចរាចរណ៍នៅតាមលើដងផ្លូវជាតិលេខ៦នោះគឺបង្កឡើងដោយរថយន្តម៉ាកឡិចស៊ីស RX-300 ពណ៌ខ្មៅ ពាក់ផ្លាកលេខ ភ្នំពេញ 2L-9675 ជារថយន្តតាក់ស៊ី បើកបរដោយជនមិនស្គាល់អត្តសញ្ញណ ក្រោយពេលកើតហេតុអ្នកបើកបររត់គេចខ្លួន ។
លោកបានបញ្ជាក់ថា រថយន្តបង្កតាក់ស៊ីបើកបរទិសដៅពីលិចទៅកើតពេលដល់ចំណុចកើតហេតុខាងលើបានឡើងវ៉ារថយន្តមួយគ្រឿងផ្សេងទៀត ខណៈពេលនោះវ៉ាមិនផុតក៏ជ្រុលចង្កូតមកវិញទៅបុកម៉ូតូម៉ាកអ៊ិចស៊ិចទ័រ ពណ៌ទឹកសមុទ្រ គ្មានផ្លាកលេខ បើកបរដោយឈ្មោះ គិម ផានិត ភេទប្រុស អាយុ១៨ឆ្នាំ មុខរបរសិស្សរស់នៅភូមិគ្រួស សង្កាត់ស្វាយដង្គំ ក្រុង-ខេត្តសៀមរាប បើកបរទិសដៅពីកើតទៅលិចបណ្តាលឱ្យអ្នកបើកបរម៉ូតូស្លាប់នៅនឹងកន្លែងកើតហេតុភ្លាមៗផងដែរ ។ មូលហេតុបង្កឡើងដោយរថយន្តបើកបរឡើងវ៉ាជែងរថយន្តផ្សេងទៀត ។
ក្រោយពេលកើតហេតុកម្លាំងជំនាញបានចុះធ្វើការវាស់វែង និងដកហូតវត្ថុតាងយកមករក្សារទុកនៅអធិការនគរបាលស្រុកពួករង់ចាំដោះស្រាយទៅតាមផ្លូវច្បាប់ ។ បច្ចុប្បន្នសពជនរងគ្រោះត្រូវបានសមត្ថកិច្ចនគរបាលស្រុកពួកប្រគល់ជូនក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ