រាជធានីភ្នំពេញ ៖ កាកបាទក្រហមកម្ពុជាជួបសំណេះសំណាល និងចែកជូនអំណោយជាស្បៀង និងសម្ភារៈកាកបាទក្រហមកម្ពុជាជូនដល់កម្មករ-កម្មការិនីក្រុមហ៊ុនស៊ីនទ្រី និងកម្មករ-កម្មការិនីសាធារណការក្រុងចំនួន២២៦៥នាក់ ជាការលើកទឹកចិត្តចំពោះកិច្ចខិតខំប្រឹងប្រែងលើការងារបោសសំអាតរក្សាសោភ័ណ្ឌភាព និងអនាម័យទីក្រុង ។
ក្នុងពិធីសំណេះសំណាលចែកអំណោយជាស្បៀង និងសម្ភារៈរបស់កាកបាទក្រហមកម្ពុជាជូនកម្មករកម្មការិនីក្រុមហ៊ុនស៊ីនទ្រី និងកម្មករ-កម្មការិនីសាធារណការក្រុងនេះនៅស្នាក់ការកណ្តាលកាកបាទក្រហមកម្ពុជា កាលពីព្រឹកថ្ងៃទី១២ ធ្នូនេះ លោកស្រី ឃួន សុដារី អនុប្រធាន កាកបាទក្រហមកម្ពុជាតំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាបានមានប្រសាសន៍ថា កាកបាទក្រហមកម្ពុជាបានសម្តែងនូវការកោតសរសើរជំពោះបងប្អូនកម្មករកម្មការិនីទាំងអស់ដែលបានខិតខំចូលរួមចំណែកបំពេញតួនាទីយ៉ាងសកម្មលើការងារសំអាតអនាម័យបរិស្ថាន ដើម្បីលើកស្ទួយសោភ័ណ្ឌភាពរាជធានីភ្នំពេញដែលជាបេះដូងនៃព្រះរាជណាចក្រកម្ពុជា ។
លោកស្រីបន្តថា ក្នុងនាមកាកបាទក្រហមថ្នាក់ការកណ្តាលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានផ្តាំផ្ញើនូវសេចក្តីនឹករលឹកជាមួយនឹងមនោសច្ចេតនារាប់អានបងប្អូនកម្មករកម្មការិនីក៏ដូចជា ថ្នាក់ដឹកនាំរាជធានីភ្នំពេញដែលបានខិតខំរួមគ្នាបំពេញតួនាទីក្នុងការថែរក្សាអនាម័យបរិស្ថានរាជធានីភ្នំពេញបានល្អ ។ លោកស្រីបានបញ្ជាក់ថា ក្នុងនាមសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ប្រធានកាកបាទក្រហមកម្ពុជា និងក្នុងនាមគណកម្មាការកណ្តាល ក្រុមប្រតិបត្តិកាកបាទក្រហមកម្ពុជា មន្ត្រីថ្នាក់ដឹកនាំក៏ដូច រូបខ្ញុំផ្ទាល់សុំសំដែងនូវក្តីសោមនស្សរីករាយដែលពិធីសំណេះសំណាលនេះបានពាំនាំមកនូវជាមួយអំណោយមានស្បឿង សម្ភារៈ ថវិកា ។
លោក ឃួង ស្រេង អភិបាលរាជធានីភ្នំពេញបានលើកឡើងថា ចំពោះបញ្ហាអនាម័យបរិស្ថាន សំរាមនេះរដ្ឋបាលរាជធានីភ្នំពេញកំពុងខិតខំយកចិត្តទុកដាក់ពង្រឹងយន្តការរក្សាសំអាតអនាម័យបរិស្ថានរាជធានីឲ្យបានកាន់តែល្អប្រសើរឡើង ។ លោកអភិបាលបន្តថា ជាការលើកទឹកដល់ការខិតខំប្រឹងប្រែងរបស់កម្មករអនាម័យបរិស្ថាន និងមន្ទីរសាធារណការនៅថ្ងៃនេះកាកបាទក្រហមថ្នាក់កណ្តាលបានផ្តល់អំណោយមនុស្សធម៌ ដើម្បីចែកជូនបងប្អូនកម្មករ-កម្មការិនី មកពីមន្ទីរសាធារណការរាជធានីចំនួន៤៥៩នាក់ និងក្រុមហ៊ុនស៊ីនទ្រីចំនួន១៨០៦នាក់ សរុបមានចំនួន២២៦៥នាក់ ។
សូមបញ្ជាក់ថា អំណោយជាស្បៀង និងសម្ភារៈរបស់កាកបាទក្រហមកម្ពុជា ចែកជូនបងប្អូនកម្មករ កម្មការិនីចំនួន២២៦៥រូបនេះ ក្នុងម្នាក់ៗទទួលបានអង្ករ២៥គីឡូ ត្រីខ១កេស មី១កេស និងឃីតមួយកញ្ចប់ធំ មានភួយ មុង តង់ សារុង ក្រមា ទឹកសុទ្ធ នំប៉័ង និងថវិកាចំនួន១០ម៉ឺនរៀល ៕
ចែករំលែកព័តមាននេះ