ខេត្តកោះកុង ៖ ក្នុងឱកាសព្រះរាជាណាចក្រកម្ពុជាប្រារព្ធពិធីបុណ្យសមុទ្ររបស់ខ្លួនដែលនឹងរៀបចំយ៉ាងឱឡារិកនៅខេត្តកោះកុងចាប់ពីថ្ងៃទី១៤ដល់ថ្ងៃទី១៦ ខែធ្នូ ខាងមុខនេះ អាជ្ញាធរកម្ពុជា និងភាគីថៃ បានសម្របសម្រួលឲ្យប្រជាពលរដ្ឋនៃប្រទេសទាំងពីរ បានចេញចូលឆ្លងកាត់ព្រំដែនដោយមិនចាំបាច់មានលិខិតឆ្លងដែន និងគ្រាន់តែមានអត្តសញ្ញាណប័ណ្ណប៉ុណ្ណោះ…
ខេត្តកោះកុង ៖ ក្នុងឱកាសព្រះរាជាណាចក្រកម្ពុជាប្រារព្ធពិធីបុណ្យសមុទ្ររបស់ខ្លួនដែលនឹងរៀបចំយ៉ាងឱឡារិកនៅខេត្តកោះកុងចាប់ពីថ្ងៃទី១៤ដល់ថ្ងៃទី១៦ ខែធ្នូ ខាងមុខនេះ អាជ្ញាធរកម្ពុជា និងភាគីថៃ បានសម្របសម្រួលឲ្យប្រជាពលរដ្ឋនៃប្រទេសទាំងពីរ បានចេញចូលឆ្លងកាត់ព្រំដែនដោយមិនចាំបាច់មានលិខិតឆ្លងដែន និងគ្រាន់តែមានអត្តសញ្ញាណប័ណ្ណប៉ុណ្ណោះ ហើយបើមានបំណងចង់បើករថយន្ដចូល ត្រូវមានប័ណ្ណបើកបរដែលមានសុពលភាព និងប័ណ្ណសម្គាល់យានយន្ដដាក់ជាប់តាមខ្លួនជាការស្រេច។ នេះបើយោងតាមក្រសួងទេសចរណ៍ ។
ក្រសួងបានលើកឡើងថា ប្រជាពលរដ្ឋខ្មែរដែលទៅលេងបុណ្យសមុទ្រក្នុងរយៈពេល៣ថ្ងៃ ក៏អាចឆ្លងទៅលេងដល់ខេត្តត្រាត នៃប្រទេសថៃបាន ដោយគ្រាន់តែយកអត្តសញ្ញាណប័ណ្ណទៅជាមួយ ហើយបើចង់បើករថយន្តចូលខ្លួនឯង ត្រូវមានប័ណ្ណសម្គាល់យានយន្ត និងប័ណ្ណបើកបរ។ ក្នុងករណី មានក្មេងតូចៗទៅជាមួយត្រូវយករូបថតទៅផង ពោលគឺមិនចាំបាច់មានលិខិតឆ្លងដែនក៏បាន (តែបើមានលិខិតឆ្លងដែន Passport ក៏គួរយកតាមផងកាន់តែងាយស្រួល)។
ក្រសួងទេសចរណ៍បន្ដថា ពិធីបុណ្យសមុទ្រលើកទី៧ (ជុំទី២) នៅខេត្តកោះកុងនេះ នឹងប្រព្រឹត្តទៅនាថ្ងៃទី១៤-១៥-១៦ ខែធ្នូខាងមុខ ក្រោមប្រធានបទ « ឆ្នេរស្អាត ពលរដ្ឋរមណីយ» ក្រោមអធិបតីដ៏ខ្ពង់ខ្ពស់សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ដែលនឹងអញ្ជើញបើកពិធីជាផ្លូវការនៅល្ងាចថ្ងៃទី១៥ ធ្នូ ២០១៨ ។ ថ្លែងក្នុងពិធីបើកកិច្ចប្រជុំចុងក្រោយ ស្ដីពី ការត្រៀមរៀបចំពិធីបុណ្យសមុទ្រ នៅសាលាខេត្តកោះកុង នាថ្ងៃទី១០ ខែធ្នូ កន្លងមក លោក ថោង ខុន រដ្ឋមន្ត្រីក្រសួងទេសចរណ៍ បានអះអាងថា ភាគីកម្ពុជា និងភាគីថៃបានសម្របសម្រួលការធ្វើដំណើររបស់ប្រជាពលរដ្ឋទាំងសងខាង ក្នុងការទៅមកទស្សនាកម្សាន្តនៅខេត្តកោះកុង និងខេត្តត្រាតរយៈពេលបីថ្ងៃនៃពិធីបុណ្យសមុទ្រខាងមុខនេះ ។
លោករដ្ឋមន្ត្រី បញ្ជាក់ថា ៖« ពេលនេះ ផ្លូវជាតិលេខ៤៨ បានជួសជុលរួចរាល់ជាស្ថាពរហើយ។ ពលរដ្ឋដែលទៅទស្សនាពិធីបុណ្យសមុទ្រហើយមានបំណងចង់ទៅលេងកម្សាន្តនៅខេត្តត្រាត ប្រទេសថៃ ត្រូវយកមកជាមួយនូវអត្តសញ្ញាណប័ណ្ណសញ្ជាតិខ្មែរ ប័ណ្ណសម្គាល់យានយន្ត និងប័ណ្ណបើកបរ ហើយប្រសិនបើមានកូនចៅក្មេងៗទៅជាមួយ ត្រូវដាក់រូបថតរបស់ពួកគេទៅជាមួយផង ដើម្បីបញ្ជាក់ជូនសមត្ថកិច្ចប្រចាំនៅច្រកព្រំដែនចាំយាម »។
លោកជំទាវ មិថុនា ភូថង អភិបាលខេត្តកោះកុង បានបញ្ជាក់ដែរថា សម្រាប់ប្រជាពលរដ្ឋដែលមិនចង់បើករថយន្តរបស់ខ្លួនទៅផ្ទាល់ទេ ក៏អាចផ្ញើរថយន្តនៅវត្តចាំយាម ក្បែរព្រំដែនកម្ពុជា-ថៃបាន ហើយគេនឹងមានរថយន្តពីខាងថៃមកទទួលទៀតផង ។ លោកជំទាវបញ្ជាក់បន្ថែមថា ៖« បើបងប្អូនចង់ទៅស្នាក់ផ្ទះសំណាក់ ឬសណ្ឋាគារនៅខ្លងយ៉ៃ ឬទីរួមខេត្តត្រាតក៏បានដែរ ដែលមានតម្លៃសមរម្យ ក្នុងនោះខេត្តបានរៀបចំបញ្ជរព័ត៌មានចំនួន៣ទីតាំងគឺនៅ រង្វង់គល់ស្ពានកោះកុង , នៅវត្តចាំយាម និងនៅច្រកទ្វាអន្តរជាតិចាំយាម »។
ក្រសួងទេសចរណ៍ និងរដ្ឋបាលខេត្តកោះកុងក៏បានសហការគ្នារៀបចំតំបន់រមណីយដ្ឋានទេសចរណ៍មួយចំនួនទៀត សម្រាប់ត្រៀមទទួលភ្ញៀវទេសចរក្នុងឱកាសបុណ្យសមុទ្រដូចជា រមណីយដ្ឋានវិស្សមកាលតារាសាគរ, តំបន់អេកូទេសចរណ៍ឆាយអារ៉ែង, តាតៃ, ព្រៃកោងកាង, ឆ្នេរខ្សាច់ប៉ាក់ខ្លង, រមណីយដ្ឋានចេតិយឃុនឆាង, តំបន់ជុំវិញក្រុងខេមរភូមិន្ទ ព្រមទាំងកម្មវិធីកីឡា និងកម្មវិធីកម្សាន្តជាច្រើនទៀត ៕
ចែករំលែកព័តមាននេះ