ខេត្តកំពង់ចាម ៖ យុវសិស្សម្នាក់រៀននៅវិទ្យាល័យតាមាង ស្ថិតនៅភូមិតាមាង ឃុំកោះរកា ស្រុកកំពង់ សៀម ត្រូវសត្វស្រាំងទិចរហូតដល់ទៅជាង១០មេ បណ្តាលឲ្យឈឺចុគចាប់រហូតដល់សន្លប់ ដែលហេតុការណ៏នេះបានកើតឡើងកាលពីវេលាម៉ោងជិត១០ព្រឹកថ្ងៃទី១២…
ខេត្តកំពង់ចាម ៖ យុវសិស្សម្នាក់រៀននៅវិទ្យាល័យតាមាង ស្ថិតនៅភូមិតាមាង ឃុំកោះរកា ស្រុកកំពង់
សៀម ត្រូវសត្វស្រាំងទិចរហូតដល់ទៅជាង១០មេ បណ្តាលឲ្យឈឺចុគចាប់រហូតដល់សន្លប់ ដែលហេតុការណ៏នេះបានកើតឡើងកាលពីវេលាម៉ោងជិត១០ព្រឹកថ្ងៃទី១២ ធ្នូ ឆ្នាំ២០១៨ ហើយត្រូវបានមិត្តភក្តិជួយសង្គ្រោះយកមកមន្ទីរពេទ្យឯកជន និងបន្តដឹកយកទៅសង្គ្រោះនៅមន្ទីរពេទ្យខេត្ត ។
ជនរងគ្រោះខាងលើឈ្មោះ ស្រ៊ាន ចិនហ៊ឺ ភេទប្រុស អាយុ១៧ឆ្នាំ ជាសិស្សរៀនថ្នាក់ទី៨ «C» នៃវិទ្យាល័យតាមាង។
តាមប្រភពព័ត៌មានពីយុវតីឈ្មោះ នួន មករា ត្រូវជាសាច់ញាតិរបស់យុវសិស្សរងគ្រោះដែលរៀនថ្នាក់ទី៩ នៅវិទ្យាល័យតាមាងបានប្រាប់ឲ្យដឹងថា មុនពេលកើតហេតុ នៅវេលាម៉ោងជិត១០ព្រឹកជាម៉ោងចេញលេង យុវសិស្សរងគ្រោះខាងលើបានចេញមកលេងនៅខាងក្រៅថ្នាក់រៀន ដោយបានទៅឈរលេងនៅក្នុងរោងលក់ដូរមួយកន្លែង ដែលសសររោងមានសភាពពុកផុយ ហើយជនរងគ្រោះបានយកដៃប៉ះក៏រង្គើ ធ្វើឲ្យសត្វស្រាំងផ្អើលហើរដេញទិចយុវសិស្សរងគ្រោះត្រូវខ្លួនប្រាណជាច្រើនមេ បណ្តាលឱ្យជនរងគ្រោះឈឺចុគចាប់ពេញខ្លួន។
ប្រភពដដែលបានបន្តថា ស្របពេលដែលយុវសិស្សរងគ្រោះបានដើរចូលដល់ថ្នាក់រៀន ត្រូវបានគ្រូប្រចាំ
ថ្នាក់ប្រាប់ថា មិនរៀនទេ រួចយុវសិស្សរងគ្រោះក៏បានទាញកាតាបដាក់សៀវភៅស្ពាយដើរចេញតំរង់មកយកម៉ូតូ ពេលនោះស្រាប់តែយុវសិស្សរងគ្រោះអស់កម្លាំង និងបានពឹងឲ្យមិត្តភក្តិជួយបណ្តើរម៉ូតូឱ្យ ហើយជនរងគ្រោះក៏សន្លប់តែម្តង ។
ឃើញសភាពបែបនេះ មិត្តភក្តិបានប្រញាប់ដឹកយុវសិស្សរងគ្រោះមកកាន់មន្ទីរពេទ្យឯកជននៅក្នុងឃុំកោះរកា ហើយត្រូវបានគ្រូពេទ្យប្រាប់ថា ឱ្យប្រញាប់បញ្ជូនយុវសិស្សរងគ្រោះទៅសង្គ្រោះនៅមន្ទីរពេទ្យខេត្ត ។ លុះមកដល់មន្ទីរពេទ្យខេត្ត គ្រូពេទ្យបានបន្តោងសេរ៉ូម និងបញ្ចូលខ្យល់អុកស៊ីសែនបន្ថែមទៀត។
ក្រោមការសង្គ្រោះពីសំណាក់គ្រូពេទ្យនោះ គិតរហូតមកដល់រសៀលថ្ងៃដដែលនេះ យុវសិស្សរងគ្រោះបានធូរស្រាលគ្រាន់បើ ហើយអាចនិយាយបានវិញ ធ្វើឲ្យឪពុកម្តាយសប្បាយចិត្តផងដែរ។
តាមប្រភពព័ត៌មានពីលោកទី គីម នាយករងវិទ្យាល័យតាមាង បានប្រាប់ឲ្យដឹងដែរថា បើតាមលោកបានសាកសួរទៅដល់គ្រូប្រចាំថ្នាក់ទី៨ «C» បាននិយាយថា យុវសិស្សរងគ្រោះខាងលើពិតត្រូវសត្វស្រាំងទិចរហូតដល់ទៅជាង១០មេប្រាកដមែន ហើយត្រូវបានសាច់ញាតិយកមកសង្គ្រោះនៅមន្ទីរពេទខេត្ត ។
លោកបានបន្តថា កន្លងមកនៅលើដើមជ្រៃក្នុងបរិវេណសាលារៀន លោកបានយកថ្នាំបាញ់មូសទៅបាញ់សំបុកសត្វស្រាំងបណ្តាលឱ្យងាប់អស់ជាច្រើនសំបុកមកហើយដែរ ដើម្បីចៀសវាងកុំឲ្យមានគ្រោះថ្នាក់ដល់សិស្ស ហើយកន្លងមកក៏មានក្មេងៗខ្លះរពិសនាំគ្នាគប់សម្បុក បណ្តាលឱ្យសត្វស្រាំងហើរដេញទិចក៏មានដែរ ៕
ចែករំលែកព័តមាននេះ