តាមប្រភពព័ត៌មាន Goal បានឲ្យដឹងថា កីឡាករ Gundogan ខ្សែបម្រើរបស់ក្រុមជម្រើសជាតិឥន្ទ្រីដែកអាល្លឺម៉ង់ និងជាកីឡាករក្នុងក្លិបមេឃខៀវ Manchester City បានប្រាប់ពីឈ្មោះកីឡាករបីរូបដែលរូបគេចូលចិត្តទស្សនាខ្លាំងបំផុតតាំងបីដើមមក ។
សំនួរដែលបានចោទសួរ Gundogan លើចំណុចនេះ គឺបានមកពីអ្នកគាំទ្ររបស់រូបគេដែលបានលើកឡើងនៅថ្ងៃព្រហស្បត្តិ៍កន្លងមកនេះ ។ កីឡាករទីមួយក្នុងចិត្តរបស់ Gundogan គឺខ្សែប្រយុទ្ធឆ្នើម Lionel Messi, ទីពីរគឺ Kaka និងទីបីគឺអតីតអ្នកចាត់ការឆ្នើមក្លិបអធិរាជស Real Madrid លោក Zinedine Zidane ។
ក្រៅពីប្រាប់ឈ្មោះអ្នកដែលខ្លួនចាប់អារម្មណ៍ជាងគេក្នុងការទស្សនា Gundogan ក៏បាននិយាយរឿងរ៉ាវខ្លះៗ ទាក់ទងពីខ្លួនជាមួយនឹងក្លិបដែលកំពុងនៅ ។
កីឡាករអាល្លឺម៉ង់រូបនេះនិយាយថា៖«ខ្ញុំបានរងរបួសកាលពីមុនចូលលេងឲ្យ Man City តែពេលនោះលោក Pep និងក្លិបនៅតែចាប់អារម្មណ៍ចង់បានខ្ញុំ ។ ខ្ញុំក៏ដឹងថា វាគឺជាការឈានជំហានយ៉ាងត្រឹមត្រូវរបស់ខ្ញុំ ។ ក្រោយពី៥ឆ្នាំនៅ Dortmund វាដល់ពេលត្រូវចាប់ផ្តើមការផ្សងព្រេងថ្មី»។
គួរបញ្ជាក់ផងដែរថា Gundogan បានរកគ្រាប់បាល់ជូនក្លិបបាន៣គ្រាប់ និង Assist បាន២ដង ក្នុងការប្រកួតទាំង១០ដងក្នុងការប្រកួតក្របខ័ណ្ឌកំពូលអង់គ្លេស Premier League ៕
ចែករំលែកព័តមាននេះ