រាជធានីភ្នំពេញ ៖ សេចក្តីរាយការណ៍ឱ្យដឹងថា ចៅសង្កត់បាក់ខែង ខណ្ឌជ្រោយចង្វា កាលពីរសៀលថ្ងៃទី១១ ធ្នូ ត្រូវបានកម្លាំងសមត្ថកិច្ចនគរបាលការិយាល័យកម្រិតធ្ងន់រាជធានីភ្នំពេញ នាំខ្លួនទៅតុលាការ ដើម្បីសាកសួរពាក់ពន្ធពីបទក្លែងបន្លំឯកសាធារណៈ និងលួចលក់អចលនវត្ថុអ្នកដទៃ ។
ប្រភពឱ្យដឹងថា ចៅសង្កាត់រូបនោះ ឈ្មោះ ឆែ សូនី ភេទប្រុស អាយុ៦៧ឆ្នាំ និងមានទីលំនៅភូមិក្តៅចាស់ ឃុំបាក់ខែង ស្រុកមុខកំពូល ខេត្តកណ្តាល (មុនកាត់ចូលមករាជធានីភ្នំពេញ) ។ ប៉ុន្តែមានការកត់សម្គាល់ឃើញថា នៅពេលដែលសមត្ថកិច្ចនគរបាលព្រហ្មទណ្ឌនាំខ្លួនលោកចៅសង្កាត់បាក់ខែង ទៅជូនដល់ដៃលោកចៅក្រមសើុបសួរ បែរជាបានតែមួយដង្ហើមចង្រឹត គេឱ្យលោកចៅសង្កាត់រូបនោះ ចុះពីជាន់ទី៤ នៃអគារសាលាដំបូង ដើរសំដៅយ៉ាងលឿនឡើងជិះរថយន្តទំនើបចេញទៅវិញបាត់ ដោយមិនរំខានដល់សមត្ថកិច្ចទៀតផង ។
ប្រភពព័ត៌មានឱ្យដឹងទៀតថា លោក ប៊ុន ធី ចៅក្រមសើុបសួរសាលាដំបូងរាជធានីភ្នំពេញ បានចេញដីកាបង្គាប់ឲ្យនាំខ្លួនលោក ឆែ សូនី ចៅសង្កាត់បាក់ខែង ដើម្បីសាកសួរលើសំណុំរឿងក្លែងបន្លំឯកសាធារណៈ និងលួចលក់អចលនវត្ថុអ្នកដទៃ ប្រព្រឹត្តនៅរាជធានីភ្នំពេញ កាលពីថ្ងៃទី១១ សីហា ២០១៧ ។
ដីកាបង្គាប់ឲ្យនាំខ្លួន យល់ឃើញថា ជនត្រូវចោទឈ្មោះ ឆែ សូនី ត្រូវបានតុលាការចេញដីកាបង្គាប់ឲ្យចូលខ្លួនចំនួន៣លើកមកហើយ ប៉ុន្តែជនជាប់ចោទនេះ មិនបានចូលបង្ហាញខ្លួនតាមការកំណត់នោះទេ ដោយមានពាក្យសុំពន្យារពេលរហូត ហើយពាក្យសុំពន្យារពេល ក៏ពុំមានហេតុផលសមរម្យដែរ ដែលនាំឲ្យនីតិវិធីកាន់តែអូសបន្លាយ ។
ដូច្នេះ ដើម្បីធានាដល់ការសើុបសួរឱ្យបានពេញលេញ គប្បីសម្រេចនាំខ្លួនឈ្មោះ ឆែ សូនី មកចំពោះមុខចៅក្រមសើុបសួរ ដើម្បីបំភ្លឺការពិត ។ ក្រោយពីសាកសួរចៅសង្កាត់បាក់ខែងបាន១ដង្ហើមចង្រឹតចប់សព្វគ្រប់ លោកចៅក្រម ប៊ុន ធី បានពន្លយឱ្យដឹងថា គាត់អាយុច្រើនហើយ ឃុំគាត់មិនកើត តែនីតិវិធី យើងបានសួរគាត់ចប់ហើយ តែដោយសារហៅគាត់ច្រើនដងមិនចូល ទើបចេញដីកាបង្គាប់ឲ្យសមត្ថកិច្ចនាំខ្លួន ។
ចែករំលែកព័តមាននេះ