រាជធានីភ្នំពេញ ៖ មន្ត្រីរដ្ឋបាលជលផលនៃក្រសួងកសិកម្មរុក្ខាប្រមាញ់ និងនេសាទបានអំពាវនាវដល់ប្រជាពលរដ្ឋទាំងអស់ដែលមានបំណងធ្វើប្រហុកផ្អក ឬត្រីឆ្អើរ គួរម្នីម្នារួសរាន់ឲ្យទាន់រដូវ ខណៈត្រីសម្រាប់ធ្វើប្រហុក និងផ្អកនឹងមានច្រើនចាប់ពីថ្ងៃទី១៤ ដល់ថ្ងៃទី២០ ខែធ្នូ ខាងមុខនេះ ។
រដ្ឋបាលជលផលចេញសេចក្តីជូនដំណឹង កាលពីថ្ងៃទី១១ ធ្នូ ឆ្នាំ២០១៨ថា ក្នុងរដូវនេសាទឆ្នាំ២០១៨-២០១៩នេះ តាមការសង្កេតលើកម្ពស់ទឹកបឹងទន្លេសាប និងទឹកដែលហូរចេញនោះ គឺវានឹងធ្វើឱ្យទឹកក្នុងបឹងទន្លេសាបស្រកលឿនជាងបណ្ដាឆ្នាំមុនៗ ។ លក្ខណបែបនេះនឹងធ្វើឱ្យគន្លងដាយ នៅតាមដងទន្លេសាបនៃភូមិសាស្ត្ររាជធានីភ្នំពេញ និងខេត្តកណ្ដាលអាចនេសាទត្រីបានច្រើនចាប់ ពីថ្ងៃទី១៤ រហូតដល់ថ្ងៃទី២០ ខែធ្នូ ប្រសិនបើផ្ទៃមេឃស្រឡះល្អគ្មានភ្លៀងកក់ខែទេនោះ ។
លោក អេង ជាសាន ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផលមានប្រសាសន៍ នៅព្រឹកថ្ងៃទី១២ ខែធ្នូ នេះថា ការនេសាទត្រីសម្រាប់ធ្វើប្រហុក និងផ្អកនឹងចាប់បានច្រើនចាប់ពីថ្ងៃទី១៤ ខែធ្នូទៅ ដូច្នេះព័ត៌មាននេះចាត់ទុកជាការអញ្ជើញប្រជានេសាទ និងប្រជាពលរដ្ឋគ្រប់រូបដែលត្រូវការទិញត្រីទុកធ្វើប្រហុក ផ្អក ត្រីឆ្អើរជាដើម សូមអញ្ជើញទៅទិញឱ្យបានរួសរាន់តាមពេលវេលា ។
លោកបន្តថា ក្នុងឆ្នាំ២០១៨នេះ ផលត្រីធម្មជាតិដែលរកបានពីទន្លេ និងសមុទ្រនៃប្រទេសកម្ពុជា អាចស្ថិតនៅក្នុង៦០០ពាន់តោន គឺអាចកើនឡើងប្រមាណតែ១% ប៉ុណ្ណោះ បើប្រៀបធៀបទៅនឹងឆ្នាំមុន ។ ប៉ុន្តែទោះជាយ៉ាងណាផលនេសាទកម្ពុជាផ្នែកវារីវប្បកម្មនឹងកើនឡើងច្រើន ៕
ចែករំលែកព័តមាននេះ