ខេត្តព្រះសីហនុ ៖ សំណង់រឹងមាំជាច្រើនខ្នងផ្ទះដែលកំពុងសាងសង់យ៉ាងព្រោងព្រៀតនៅប្របរបងព្រលានយន្តហោះកងកេង ស្ថិតក្នុងភូមិរាម ឃុំរាម ស្រុកព្រៃនប់ ខេត្តព្រះសីហនុ នារសៀលថ្ងៃទី១១ ឆ្នូ ឆ្នាំ២០១៨នេះ ត្រូវបានរដ្ឋបាលស្រុកព្រៃនប់ដឹកនាំដោយលោកព្រំ ប៊ុន្នី នាយករងរដ្ឋបាលស្រុកព្រៃនប់ចុះធ្វើការណែនាំបញ្ឈប់សកម្មភាពសាងសង់បន្តទៀតស្របពេលដែលមានបណ្តឹងពីព្រលានយន្តហោះអន្តរជាតិកងកេងស្នើរទៅរដ្ឋបាលខេត្តព្រះសីហនុសុំអន្តរាគមន៍ ។
ទាក់ទងទៅនឹងបញ្ហាការសាងសង់ផ្ទះ (សំណង់រឹងមាំ) នេះលោក មេឃុំរងឃុំរាមស្រុកព្រៃនប់បានអោយដឹងថា ចំពោះសំណង់ជាច្រើន (ប្រមាណ៥ទីតាំង) ដែលកំពុងសាងសង់នេះខាងក្រុមការងារឃុំរាមបានចុះឃាត់ជាញឹកញាប់រួចមកហើយ ប៉ុន្តែពួកគាត់ (ប្រជាពលរដ្ឋទាំងនោះ) ពុំបានស្តាប់អាជ្ញាធរដែនដីឡើយដោយនៅតែបន្តសកម្មភាពសាងសង់ដដែល ។
ឆ្លើយតបទៅនឹងបណ្តាញសារព័ត៌មានលោក ស កក្កដា អភិបាលស្រុកព្រៃនប់បានថ្លែងបញ្ជាក់ថា ដោយផ្អែកលើបណ្តឹងពីព្រលានយន្តហោះអន្តរជាតិកងកេងស្នើរទៅរដ្ឋបាលខេត្តជុំវិញបញ្ហាមានប្រជាពលរដ្ឋមួយចំនួនតូចបានសាងសង់សំណង់រឹងមាំនៅជាប់របងព្រលានយន្តហោះដែលបានធ្វើអោយប៉ះពាល់យ៉ាងធ្ងន់ធ្ងរនូវបម្រាមក៏ដូចជា សោភ័ណ្ឌភាពរបស់ព្រលានជាពិសេសប៉ះពាល់ដល់ការចុះចតនឹងហោះហើរឡើងរបស់យន្តហោះ(តាមលក្ខណបច្ចេកទេស) ។
លោកបន្តថា ការចុះរបស់ក្រុមការងារនាពេលនេះគ្រាន់តែធ្វើការណែនាំផ្អាកសកម្មភាពសាងសង់ទាំងស្រុងដោយរង់ចាំមន្ត្រីជំនាញចុះសិក្សាអោយបានច្បាស់លាស់ជាមុនសិន តែបើនៅបន្តសាងសង់ទៀតរដ្ឋបាលស្រុក និងចុះអនុវត្តន៍ផ្លូវច្បាប់ព្រោះថា ទីតាំងនេះបើយើងពិនិត្យជាបឋមទី០១- វាស្ថិតក្នុងដីចំណីផ្លូវសាធារណៈរបស់រដ្ឋ ទី០២- វាស្ថិតនៅគៀកផ្លូវហោះហើរ និងទី០៣- ពុំមានច្បាប់សាងសង់ពីអាជ្ញាធរមូលដ្ឋាន និងមន្ត្រីជំនាញពាក់ព័ន្ធ ។
ដោយឡែកយោងតាមប្រភពព័ត៌មានក្រៅផ្លូវការមួយបានលួចបង្ហើបថា ការសាងសង់សំណង់រឹងមាំជាច្រើនបែបនេះ គឺដោយសារមានអ្នកមានអំណាចជាខ្នងបង្អែក និងមានអ្នកបំផុសថា ទាល់តែធ្វើសំណង់រឹងមាំទើបអាជ្ញាធរពុំហ៊ានធ្វើការដោះដូរប្រជាពលរដ្ឋចេញពីតំបន់នេះទើបជាហេតុធ្វើសំណង់ជាច្រើនសាងសង់ព្រមៗគ្នាដូចណាត់គ្នាសង់រយៈពេលមិនដល់ពីរខែផងសំណង់ថ្មីប្រមាណ៥ផ្ទះបានសាងសង់រួចរាល់នឹងកំពុងចាប់ផ្តើមសាងសង់ជាច្រើនទីតាំងទៀត ។
គួបញ្ជាក់ផងដែរថា ទីតាំងសំណង់ត្រង់ចំណុចនេះ (ជាប់របងព្រលានយន្តហោះអន្តរជាតិកងកេង ស្ថិតក្នុងភូមិរាមឃុំរាមស្រុកព្រៃនប់ ខេត្តព្រះសីហនុ) កន្លងមករដ្ឋបាលខេត្តធ្លាប់បានបង្ហើបអោយដឹងថា នឹងធ្វើការផ្លាស់ប្តូរដោយធ្វើការដោះដូរដីរបស់ពលរដ្ឋដែលរស់នៅទីនេះទៅកាន់កន្លែងផ្សេង ដោយបានជូនដំណឹងហាមសាងសង់សំណង់គ្រប់ប្រភេទ ដោយរក្សាភាពដើម ។ ប៉ុន្តែស្រាប់តែពេលនេះបែជាមានសំណង់រឹងមាំជាច្រើនសាងសង់ព្រមៗគ្នា ដូចណាត់សាងសង់ ដែលជាហេតុធ្វើអោយបាត់បង់សោភ័ណ្ឌភាព ៕
ចែករំលែកព័តមាននេះ