រាជធានីភ្នំពេញ ៖ បុគ្គលិករបស់អង្គការ Halo Tras ក៏បានបញ្ជាក់កាលពីថ្ងៃទី១១ ខែធ្នូ ថា គិតចាប់ពីខែមករារហូតមកដល់ខែវិច្ឆិកា ឆ្នាំ២០១៨នេះកងកម្លាំងបោសសំអាតមីន Halo Tras បោសសំអាត និងកម្ទេចគ្រាប់បានចំនួន៥៣៣៧គ្រាប់ ក្នុងនោះមានគ្រាប់មីនប្រឆាំងថ្មើរជើងចំនួន១៧៨៣គ្រាប់ មីនតោន៤៥គ្រាប់ និងគ្រាប់ចំនួន៣៥០៩គ្រាប់ ។
ការថ្លែងរបស់បុគ្គលិកអង្គការហេឡូត្រាសបានធ្វើឡើងក្នុងពេលដែលលោកនាយឧត្តមសេនីយ៍ មាស សុភា ទេសរដ្ឋមន្ត្រីទទួលបន្ទុកកិច្ចការ ពិសេសចុះពិនិត្យសកម្មដោះមីនក្នុងខេត្តចំនួន៣ជាប់ជាយដែនកម្ពុជា-ថៃ ។ យោងតាមព័ត៌មានពីក្រសួងការពារជាតិឲ្យដឹងថា នាព្រឹកថ្ងៃទី១១ ខែធ្នូ ឆ្នាំ២០១៨ នៅអង្គភាពប្រតិបត្តិការសំអាតមីន Halo Tras ស្ថិតក្នុងភូមិសាស្ត្រភូមិស្ទឹងខៀវតេជោ ឃុំស្រអែមឃុំ ស្រុកជាំក្សាន្ត ខេត្តព្រះវិហារ និងភូសាស្ត្រភូមិអូរបី ឃុំអណ្តូងបី ស្រុកត្រពាំងប្រាសាទ ខេត្តឧត្តរមានជ័យ លោកនាយឧត្តមសេនីយ៍ មាស សុភា ទេសរដ្ឋមន្ត្រីទទួលបន្ទុកបេសកម្មពិសេសលើកិច្ចការមីនគ្រាប់មិនទាន់ផ្ទុះ និងការងារវិស្វកម្មកងយោធពលខេមរភូមិន្ទបានអញ្ជើញចុះសួរសុខទុក្ខសំណេះសំណាល និងពិនិត្យមើលសកម្មភាពបោសសំអាតមីនរបស់កងកម្លាំងប្រតិបត្តិការបោសសំអាតមីនអង្គកា Halo tras ដែលកំពុងធ្វើសកម្មភាពបោសសំអាតមីនយុទ្ធភ័ណ្ឌមិនទាន់ផ្ទុះក្នុងភូមិសាស្ត្រ ខេត្តឧត្តរមានជ័យ និងខេត្តព្រះវិហារ ។
បើតាមប្រធានកងឯកភាពបោសសំអាតមីនអង្គការហេឡូត្រាស់កម្ពុជាលោក Lasha lomidze ប្រធានប្រតិបត្តិការរបស់អង្គការ Halo ដែលកំពុងធ្វើសកម្មភាពបោសសំអាតមីន និងយុទ្ធភណ្ឌមិនទាន់ផ្ទុះក្នុងភូមិសាស្ត្រព្រំដែនក្នុងស្រុកជាំក្សាន្តខេត្តព្រះវិហារ និងស្រុកត្រពាំងប្រាសាទ ខេត្តឧត្តរមានជ័យ និងលោក នី រ៉ា អ្នកប្រតិបត្តិការរបស់ហេឡូត្រាស់កម្ពុជាប្រចាំខេត្តព្រះវិហារ និងខេត្តឧត្តរមានជ័យបានឲ្យដឹងថា អង្គការ Halo Tras បានបង្កើតឡើងក្នុងឆ្នាំ១៩៩១ មានការិយាល័យនៅក្នុងស្រុកអន្លុងវែង ខេត្តឧត្តរមានជ័យ ហើយបាននឹងកំពុងប្រតិបត្តិការរុករកគ្រាប់មីន និងយុទ្ធភណ្ឌមិនទាន់ផ្ទុះនៅក្នុងតំបន់គ្រប់គ្រងរបស់អង្គភាពសកម្មភាពកំចាត់មីន Halo tras នេះក្នុងខេត្តព្រះវិហារ និងខេត្តឧត្តរមាយជ័យ ។
លោក ស្មាន់ មករា ប្រធានគ្រប់គ្រងក្រុមស្រាវជ្រាវ និងកម្ទេចគ្រាប់របស់អង្គការ Halo Tras ក៏បានបញ្ជាក់ដែរថា គិតចាប់ពីខែមករារហូតមកដល់ខែវិច្ឆិកា ឆ្នាំ២០១៨នេះកងកម្លាំងបោសសំអាតមីន Halo Tras បោសសំអាត និងកម្ទេចគ្រាប់បានចំនួន៥៣៣៧គ្រាប់ ក្នុងនោះមានគ្រាប់មីនប្រឆាំងថ្មើរជើងចំនួន១៧៨៣គ្រាប់ មីនតោន៤៥គ្រាប់ និងគ្រាប់ចំនួន៣៥០៩គ្រាប់ ។
ក្នុងឱកាសចុះពិនិត្យមើលសកម្មភាពកំចាត់មីនរបស់ Halo Tras ក្នុងភូមិសាស្ត្រឃុំស្រអែម ស្រុកជាំក្សាន្ត ខេត្តព្រះវិហារ និងស្រុកត្រពាំងប្រាសាទ ខេត្តឧត្តរមានជ័យនាពេលនោះ លោកនាយឧត្តមសេនីយ៍ មាស សុភា បានកោតសរសើរចំពោះស្មារតីនៃការលះបង់ខ្ពស់ ដើម្បីសម្រេចភារកិច្ចដ៍លំបាកនេះក្នុងការរំដោះដីធ្លីដែលសម្បូរគ្រាប់ដោយសារសង្គ្រាមជូនប្រជាពលរដ្ឋ ៕
ចែករំលែកព័តមាននេះ