រាជធានីភ្នំពេញ ៖ បុរសម្នាក់ត្រូវស្ត្រីម្នាក់ទៀតធ្វើការឃាត់ខ្លួនប្រគល់ជូននគរបាលប៉ុស្តិ៍កាកាប១ ដើម្បីជួយរកយុត្តិធម៌ ដោយនាងចោទប្រកាន់ថា បុរសនោះគឺជាអតីតគូស្នេហ៍របស់នាងរស់នៅជាមួយគ្នាក្រោមដំបូលផ្ទះតែមួយជាង១ឆ្នាំ ប៉ុន្តែទីបំផុតបោកយកគ្រឿងអលង្ការអស់១តម្លឹង និងលុយ៥០០ដុល្លារ រួចគេចខ្លួនបាត់២ឆ្នាំមកហើយ ទើបតែចុងក្រោយនេះនាងប្រទះឃើញកំពុងអង្គុយផឹកកាហ្វេក៏ឃាត់ខ្លួនតែម្ដង…
រាជធានីភ្នំពេញ ៖ បុរសម្នាក់ត្រូវស្ត្រីម្នាក់ទៀតធ្វើការឃាត់ខ្លួនប្រគល់ជូននគរបាលប៉ុស្តិ៍កាកាប១ ដើម្បីជួយរកយុត្តិធម៌ ដោយនាងចោទប្រកាន់ថា បុរសនោះគឺជាអតីតគូស្នេហ៍របស់នាងរស់នៅជាមួយគ្នាក្រោមដំបូលផ្ទះតែមួយជាង១ឆ្នាំ ប៉ុន្តែទីបំផុតបោកយកគ្រឿងអលង្ការអស់១តម្លឹង និងលុយ៥០០ដុល្លារ រួចគេចខ្លួនបាត់២ឆ្នាំមកហើយ ទើបតែចុងក្រោយនេះនាងប្រទះឃើញកំពុងអង្គុយផឹកកាហ្វេក៏ឃាត់ខ្លួនតែម្ដង កាលពីរសៀលថ្ងៃទី១០ ខែធ្នូ ឆ្នាំ២០១៨នេះ នៅហាងកាហ្វេមួយកន្លែង ទល់មុខផ្សារពោធិ៍ចិនតុង ក្នុងភូមិប៉ប្រកខាងត្បូង សង្កាត់កាកាប១ ខណ្ឌពោធិ៍សែនជ័យ ។
ស្ត្រីខាងលើនិយាយប្រាប់ឲ្យនគរបាលថា នាងឈ្មោះ ស៊ិន សុខជូ អាយុ៤៣ឆ្នាំ មុខរបរលក់កាហ្វេនៅផ្សារពោធិ៍ចិនតុង ចំណែកបុរសកំហូចខាងលើឈ្មោះ នុន ផល្លា អាយុ៤៨ឆ្នាំ មុខរបររត់តាក់ស៊ី ស្រុកកំណើតនៅស្រុកស្វាយអន្ទរ ខេត្តព្រៃវែង បច្ចុប្បន្នស្នាក់នៅក្នុងសង្កាត់ដង្កោ ខណ្ឌដង្កោ ។
ប្រភពដដែលបន្តទៀតថា មុនមានទំនាក់ទំនងស្នេហាជាមួយគ្នា គាត់គឺជាអ្នកកាហ្វេ ហើយបុរសខាងលើតែងតែងចូលទៅផឹកកាហ្វេក្នុងហាងគាត់ជាប្រចាំ បន្ទាប់ពីស្គាល់គ្នា២ឆ្នាំក៏ក្លាយទៅជាស្នេហា ។
មិនតែប៉ុណ្ណោះសម្រេចចិត្តរស់នៅជាមួយគ្នាក្រោមដំបូលផ្ទះតែមួយ ហើយគាត់ចាត់ទុកបុរសនោះជាប្ដីថែមទៀតផង។ ប៉ុន្តែភាពផ្អែមល្ហែមបានតែមុនដំបូងប៉ុណ្ណោះ ក្រោយមកតែងយកឈ្មោះឧកញ៉ា២នាក់គំរាមកំហែងគាត់គ្រប់ពេល លុះរស់នៅជាមួយគ្នាជាង១ឆ្នាំបុរសនេះបោកយកទាំងខ្លួនប្រាណ ព្រមទាំងគ្រឿងអលង្ការ១តម្លឹង និងលុយ៥០០ដុល្លារពីគាត់ រួចចាកចេញទៅបាត់។
ប្រភពខាងលើបន្តថា ក្រោយមកនាងខលទាមទារលុយ និងគ្រឿងអលង្ការមកវិញជាបន្តបន្ទាប់ ប៉ុន្តែបុរសនេះមិនត្រឹមតែមិនព្រមឲ្យទេ ថែមទាំងគំរាមសម្លាប់នាងចោលទៀតផង។ បើគិតរហូតមកដល់ឆ្នាំ២០១៨នេះ រយៈពេល២ឆ្នាំមកហើយ ដែលគាត់តាមរកជននេះដើម្បីទារយកលុយនិងគ្រឿងអលង្ការរបស់គាត់មកវិញ ប៉ុន្តែរកមិនឃើញសោះ។ ចុងក្រោយគាត់ទទួលដំណឹងថា ជននេះលួចទៅរៀបការប្រពន្ធថ្មី និងរស់នៅក្នុងបុរីលឹមឈាងហាក់ សង្កាត់ដង្កោ ខណ្ឌដង្កោ ។ លុះដល់ថ្ងៃកើតហេតុស្រាប់តែប្រទះឃើញជននេះកំពុងអង្គុយផឹកកាហ្វេក្នុងហាងកាហ្វេកើតហេតុខាងលើ ទើបគាត់ចូលទៅចាប់ក្របួច.កអាវដើម្បីទារលុយ និងគ្រឿងអលង្ការមកវិញ បង្កឲ្យមានការប្រវាយប្រតប់គ្នាផ្អើលពេញហាងកាហ្វេនិងផ្សារពោធិ៍ចិនតុងតែម្ដង។
នគរបាលបានឲ្យដឹងថា ក្រោយពេលមានរឿងប្រទូស្តរាយគ្នាបែបនេះកម្លាំងចេញអន្តរាគមន៍នាំអ្នកទាំង២នាក់ទៅកាន់ប៉ុស្តិ៍កាកាប១ ដើម្បីសម្របសម្រួលគ្នា។ ខណៈនោះស្រាប់តែជននេះស្រែកឡូឡាយកឈ្មោះឧកញ៉ា២នាក់មកប្រើគំរាមកំហែងទាំងអតីតគូស្នេហ៍ និងនគរបាលថែមទៀត។ ប៉ុន្តែស្ត្រីខាងលើសម្រេចមិនប្ដឹងប្ដល់ និងចោលលុយ ព្រមទាំងអលង្ការ ដោយគ្រាន់តែសុំឲ្យនគរបាលជួយធ្វើកិច្ចសន្យាឈប់គំរាមកំហែងសម្លាប់នាងតទៅទៀតប៉ុណ្ណោះ៕
ចែករំលែកព័តមាននេះ