ខេត្តកំពង់ឆ្នាំង ៖ អ្នកត្បាញសំពត់ស៊ឹងនៅភូមិព្រែកសាលា ឃុំទឹកហូត ស្រុករលាប្អៀរ បានអំពាវនាវដល់ប្រជាពលរដ្ឋខ្មែរចូលរួមប្រើប្រាស់សំពត់ស៊ឹង ដើម្បីលើកតម្កើងតម្លៃនៃស្នាដៃកូនខ្មែរ ។ អ្នកស្រី ចាន់…
ខេត្តកំពង់ឆ្នាំង ៖ អ្នកត្បាញសំពត់ស៊ឹងនៅភូមិព្រែកសាលា ឃុំទឹកហូត ស្រុករលាប្អៀរ បានអំពាវនាវដល់ប្រជាពលរដ្ឋខ្មែរចូលរួមប្រើប្រាស់សំពត់ស៊ឹង ដើម្បីលើកតម្កើងតម្លៃនៃស្នាដៃកូនខ្មែរ ។
អ្នកស្រី ចាន់ ណារិន ជាជនពិការជើងម្ខាងបានរៀបរាប់ថា អ្នកស្រីបាននាំបងប្អូន៤នាក់ទៅរៀនត្បាញសំពត់ស៊ឹងនៅឃុំកោះដាច់ ស្រុកមុខកំពូល ខេត្តកណ្តាល តាំងពីនៅតូចៗម្ល៉េះ។ ក្រោយចេះត្បាញស្ទាត់ហើយ ក៏បានប្រកបមុខរបរនេះទាំងអស់គ្នានៅឃុំកោះដាច់នោះអស់រយៈពេល៦-៧ឆ្នាំ ។ ប៉ុន្តែក្រោយមក ទីផ្សារសំពត់ស៊ឹងក៏ចាប់ផ្ដើមចុះថោក តែវត្ថុធាតុដើមនៅតែថ្លៃ ដែលជាហេតុធ្វើឲ្យពួកអ្នកស្រីមិនអាចផលិតបានទៀត ក៏វិលត្រឡប់មកកាន់ស្រុកកំណើតនៅឯខេត្តកំពង់ឆ្នាំងវិញ ដោយប្រកបរបរធ្វើស្រែចម្ការ ។ ប៉ុន្ដែថ្មីៗនេះ ដោយសារតែសំពត់ស៊ឹងចាប់ផ្ដើមមានហាងឆេង អ្នកស្រីក៏ទិញកីតម្បាញ ចាប់ផ្ដើមត្បាញឡើងវិញ ។
អ្នកស្រីបញ្ជាក់ថា ៖« ថ្មីៗនេះ មានបងប្អូននៅកោះដាច់ប្រាប់មកថា សំពត់ស៊ឹងមានហាងឆេងឡើងវិញ ទើបខ្ញុំចងការប្រាក់គេទិញបានកីតម្បាញមួយ និងយកវត្ថុធាតុដើមពីខេត្តកណ្ដាលមកត្បាញ ហើយឃើញថាមានទីផ្សារល្អមែន »។ អ្នកស្រីថា ៖« គ្រាន់តែជាង៣ខែសោះ ខ្ញុំបានបន្ថែមកីតម្បាញចំនួន៥ ដែលសុទ្ធសឹងតែជាបងប្អូនបង្កើត និងចែកគ្នាចាប់យកអាជីពមួយនេះឡើងវិញ ។ ទោះជាយ៉ាងនេះក្ដី ខ្ញុំសូមអំពាវនាវដល់បងប្អូនប្រជាពលរដ្ឋខ្មែរ សូមចូលរួមប្រើប្រាស់ ដើម្បីលើកកម្ពស់ស្នាដៃកូនខ្មែរយើង »។
បច្ចុប្បន្ន សំពត់ស៊ឹងត្រូវបានអតិថិជនកុម្មង់ ទិញច្រើន ជាពិសេសក្នុងឱកាសបុណ្យកាន់បិណ្ឌនាពេលកន្លងទៅ ។
អ្នកស្រី ចាន់ ណារិន បានបន្ដថា ផលិតផលដែលបានធ្វើរួច អ្នកស្រីបានយកទៅបោះដុំនៅកោះដាច់ ស្រុកមុខកំពូល ខេត្តកណ្តាល ដោយមិនមានលក់នៅទីផ្សារខេត្តកំពង់ឆ្នាំងទេ ។ អ្នកស្រីថា ៖« នៅថ្ងៃអនាគត ខ្ញុំចង់ពង្រីតម្បាញសំពត់ស៊ឹងនេះឲ្យទៅជាសិប្បកម្មធំមួយ ប៉ុន្តែមិនដឹងថា អាចទៅរួច ឬយ៉ាងណាឡើយ ខណៈសព្វថ្ងៃចំណូលពីតម្បាញនៅមានកម្រិត ។ ដូច្នេះហើយ ពួកយើងសំណូមពរដល់ប្រជាពលរដ្ឋ សូមជួយគាំទ្រស្នាដៃកូនខ្មែរ គឺតម្បាញសំពត់ស៊ឹងនេះ »។
អ្នកស្រីបញ្ជាក់ថា ៖« ការងារតម្បាញសំពត់ស៊ឹងនេះ ជាមធ្យមក្នុងកីតម្បាញមួយ អាចរកចំណូលបានពី៣ទៅ៤០០ដុល្លារក្នុង១ខែ ប៉ុន្ដែការចំណាយទិញវត្ថុធាតុដើមក៏ថ្លៃបន្ដិចដែរ »។ នេះជាគ្រួសារទីមួយហើយនៅក្នុងខេត្តកំពង់ឆ្នាំងដែលចាប់យកមុខរបរត្បាញសំពត់ស៊ឹងធ្វើជាអាជីវកម្ម ខណៈដែលកន្លងមក មុខរបរមួយនេះពុំដែលលឺឈ្មោះបោះសំឡេងក្នុងខេត្តដែលល្បីល្បាញខាងធ្វើក្អមឆ្នាំងនោះទេ ៕
ចែករំលែកព័តមាននេះ