រាជធានីភ្នំពេញ៖ តារាចម្រៀងអ្នកនាងគីង សូរិយា ពេលមុនចង់ទៅ តែពេលនេះលែងចង់ទៅអាមេរិកវិញហើយ សុខចិត្តបំពេញការងារសិល្បៈនៅក្នុងស្រុក ។
អ្នកនាងគីង សូរិយ៉ា ធ្លាប់រស់នៅអាមេរិកជាង១០ឆ្នាំ ប៉ុន្តែកាលពីពេល ថ្មីៗកន្លងមកស្រាប់តែបង្ហាញចិត្តលែងចង់រស់នៅទីនោះទៀត ខណៈតារាមួយចំនួនបែរជាចង់បានឱកាសនៅទីនោះ ។ បច្ចុប្បន្នគីង សូរិយាកំពុងមានវត្តមាននៅក្នុងស្រុកខ្មែរជាមួយនឹងអាជីពចម្រៀងទោះជាមិនលេចធ្លោដូចមុនក្តី ។
អ្នកនាងគីង សូរិយា បានបញ្ជាក់ឲ្យដឹងគ្រាចូលរួមពិធីខួបកំណើតលោកអុឹម ជីវ៉ា កាលពីរាត្រីថ្ងៃទី៩ ធ្នូ ២០១៨ថា«មកម្តងនេះលែងទៅអាមេរិកវិញហើយ ។ អត់ស្តាយទេបើទោះជាគេគិតថានៅទីនោះស្រួល ហើយបងទទួលស្គាល់ថានៅអាមេរិកគឺសម្បូរការងារធ្វើច្រើនមុខណាស់ឲ្យតែមាកម្លាំងគឺអាចធ្វើបានមួយម៉ោងៗគិតជាលុយ ។ ប៉ុន្តែអារម្មណ៍ពេលនៅអាមេរិកគឺរៀបគម្រោងជាមួយគ្រួសារដូចជាចាត់ចែងឲ្យកូនគេអាចរស់នៅខ្លួនឯងបាន ពីមុនគេនៅក្មេង តែឥឡូវគេវ័យ១៨ឆ្នាំអាចរស់បាន ធ្វើការបាន ទើបខ្ញុំពុំសូវជាខ្វល់ដូចមុនព្រោះក្មេងស្រុកគេខុសពីក្មេងនៅទីនេះ ។
ណាមួយបេះដូងយើងនៅតែស្រុកខ្មែរ បន់ឲ្យតែផែនការចប់កាលណា ហោះមកនៅកម្ពុជាវិញភ្លាម ។ ម្យ៉ាងទៀតខ្ញុំត្រូវនៅក្បែរម្តាយដែលកាន់តែជរា សុខភាពមិនសូវល្អប៉ុន្មាន បើបាននៅក្បែរគាត់សប្បាយ ចិត្ត ណាមួយមានអ្វីកើតឡើងយើងនៅទីនេះស្រាប់ជិតជាងហោះទៅហោះមក »។
អ្នកនាងគីង សូរិយា ពេលនេះរកបានកន្លែងច្រៀងពេលយប់ជាប្រចាំហើយនៅក្នុងភោជនីយដ្ឋានមួយនៃរាជធានីភ្នំពេញ បូករួមទាំងកម្មវិធីច្រៀងតាមង្គលការ ។ នាងមានក្រុមចាត់ចែងសុទ្ឋសឹងតែជាតារា ល្បីៗទើបមិនភ័យខ្លាចរឿងការងារ ។ «សរុបទៅ បូកគុណគូរទៅប្រាក់ចំណូលយើងអាចរកបានសមរម្យនៅទីនេះ ហើយសិល្បៈស្រុកយើងក៏ទៅមុខល្អទើបធ្វើឲ្យចិត្តបាក់ទេរនៅទីនេះច្រើន ។
លើសពីនេះករ្តិ៍ឈ្មោះនៅមិនទាន់ដល់ចំណុច គេលែងស្គាល់ទើបត្រូវស្តារទីផ្សារសិល្បៈម្តងទៀតទៅតាមទេពកោសល្យដែលមានដោយមិនចង់ប្រជែងអ្នកណាឬរលកក្រោយឡើយ ។ សុំតែម្យ៉ាងបងប្អូនយើងជួយហៅនាងខ្ញុំទៅច្រៀងតាមកម្មវិធី ផ្សេងៗឲ្យច្រើនផង នោះសប្បាយចិត្តហើយ»។
អ្នកនាងគីង សូរិយា មិនមែននៅអាមេរិកខុសច្បាប់ទេ ដូច្នេះហើយនាងនៅតែទៅរយៈពេលខ្លីមួយអាទិត្យ ឬ១០ថ្ងៃ ។ អ្នកនាងគីង សូរិយា ក្រោយបែកបាក់ស្វាមី នៅតែជាស្ត្រីមេម៉ាយមិនទាន់មានគូថ្មីទេ ៕
ចែករំលែកព័តមាននេះ