រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពគាស់បន្ទប់ផ្ទះជួលមួយកន្លែងលួចយកបានម៉ូតូ២គ្រឿង បន្ទាប់មករត់គេចខ្លួន ប៉ុន្តែ១ថ្ងៃប៉ុណ្ណោះត្រូវអស់លក្ខណ៍ ។ ក្រោយកម្លាំងនគរបាលប៉ុស្តិ៍កាកាប២ ស្រាវជ្រាវរហូតកំណត់មុខសញ្ញាជនសង្ស័យរូបនោះក៏ឃាត់ខ្លួនតែម្ដង កាលពីព្រឹកថ្ងៃទី១០ ខែធ្នូ…
រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពគាស់បន្ទប់ផ្ទះជួលមួយកន្លែងលួចយកបានម៉ូតូ២គ្រឿង បន្ទាប់មករត់គេចខ្លួន ប៉ុន្តែ១ថ្ងៃប៉ុណ្ណោះត្រូវអស់លក្ខណ៍ ។ ក្រោយកម្លាំងនគរបាលប៉ុស្តិ៍កាកាប២ ស្រាវជ្រាវរហូតកំណត់មុខសញ្ញាជនសង្ស័យរូបនោះក៏ឃាត់ខ្លួនតែម្ដង កាលពីព្រឹកថ្ងៃទី១០ ខែធ្នូ ឆ្នាំ២០១៨ នៅក្នុងបុរីប៊ុន ហ៊ួរ ស្ថិតក្នុងភូមិព្រៃព្រីងខាងត្បូង សង្កាត់ចោមចៅ២ ខណ្ឌពោធិ៍សែនជ័យ ។
ជនសង្ស័យដែលត្រូវចាប់ខ្លួននោះឈ្មោះ សូ លីដា ហៅអាស្វិត អាយុ២៦ឆ្នាំ មុខរបរមិនពិតប្រាកដ ស្នាក់នៅក្នុងបន្ទប់ជួលលេខA៩ ភូមិស្រែជម្រៅ សង្កាត់ចោមចៅ២ ខណ្ឌពោធិ៍សែនជ័យ ។ ដោយឡែកជនរងគ្រោះ២នាក់ម្នាក់ឈ្មោះ ថុល ធឿន ភេទស្រី អាយុ២៨ឆ្នាំ មុខរបរកម្មការិនីរោងចក្រកាត់ដេរ ស្នាក់នៅបន្ទប់ជួលលេខ២៥ជាន់ទី៤ ក្នុងបុរីប៊ុន ហ៊ួរ ភូមិកើតហេតុ ម៉ូតូដែលលួចនោះម៉ាកហុងដាស្កូបពី ពណ៌ក្រហមលាយខ្មៅ ពាក់ស្លាកលេខ ភ្នំពេញ1FP-0519។ និងម្នាក់ទៀតឈ្មោះ ឈាល ហាវ ភេទប្រុស បាត់ម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០០៥ ពណ៌ខ្មៅ ពាក់ស្លាកលេខភ្នំពេញ1D-6805។
នគរបាលបានឲ្យដឹងថា កាលពីយប់ថ្ងៃទី៨ ធ្នូ ជនរងគ្រោះទុកម៉ូតូនៅក្នុងបន្ទប់ខាងក្រោម ជាកន្លែងទទួលផ្ញើម៉ូតូ បន្ទាប់មកឡើងទៅដេកនៅក្នុងបន្ទប់ជួលជាន់ទី៤ លុះដល់ម៉ោង៦និង៣០នាទីព្រឹក ថ្ងៃទី០៩ ធ្នូ ក្រោយក្រោកពីដេកពួកគាត់ចុះទៅយកម៉ូតូដែលខ្លួនទុកនៅបន្ទប់ផ្ញើម៉ូតូខាងក្រោមនោះ ស្រាប់តែបាត់ម៉ូតូរបស់ខ្លួនទាំង២គ្រឿងខាងលើ ទើបមានការភ្ញាក់ផ្អើល ហើយទៅដាក់ពាក់បណ្តឹងនៅប៉ុស្តិ៍នគរបាលចោមចៅ២ ដើម្បីឲ្យជួយស្រាវជ្រាវតាមរកម៉ូតូពួកគាត់ត្រឡប់មកវិញ។
ប្រភពដដែលបន្តទៀតថា ក្រោយពីទទួលពាក្យបណ្តឹងពីជនរងគ្រោះហើយ កម្លាំងនគរបាលប៉ុស្តិ៍បានធ្វើការស្រាវជ្រាវយ៉ាងយកចិត្តទុកដាក់រហូតកំណត់បានមុខសញ្ញា លុះដល់ព្រឹកថ្ងៃទី១០ ធ្នូ ទើចាប់ខ្លួនជនសង្ស័យបាន ហើយដកហូតម៉ូតូជនរងគ្រោះត្រឡប់មកវិញ រួមជាមួយវត្ថុតាងផ្សេងៗ និងឧបករណ៍សម្រាប់កាច់សោ.កម៉ូតូ ព្រមទាំសម្ភារជក់គ្រឿងញៀនផងដែរ បន្ទាប់មកបាននាំទៅសាកសួរ និងកសាងសំណុំរឿងចាត់ការតាមច្បាប់៕
ចែករំលែកព័តមាននេះ