ខេត្តកណ្តាល ៖ ចោរឆក់កាបូបម្នាក់បានត្រូវនគរបាលស្រុកអង្គស្នួលធ្វើការឃាត់ខ្លួន ខណៈជនសង្ស័យបានធ្វើសកម្មភាពឆក់កាបូបពីជនរងគ្រោះកំពុងជិះម៉ូតូ ហេតុការណ៍នេះបានកើតឡើងនៅវេលាម៉ោង១៩និង២០នាទីថ្ងៃទី១០ ខែឆ្នូ ឆ្នាំ២០១៨ ចំណុចផ្លូវជាតិលេខ៤ ភូមិពងទឹក ឃុំដំណាក់អំពិល ស្រុកអង្គស្នួល ខេត្តកណ្តាល។
ជនរងគ្រោះឈ្មោះ ប៊ូ សុខុម ភេទស្រី អាយុ២៨ឆ្នាំ ជនជាតិខ្មែរ មុខរបរកម្មកររោងចក្រ នៅភូមិអូរក្រសារ ឃុំវាលពន់ ស្រុកថ្ពង ខេត្តកំពង់ស្ពឺ ។ ជនរងគ្រោះដួលម៉ូតូរបួសរលាត់ជង្គង់ខាងឆ្វេង ។ ជនសង្ស័យ០២នាក់ទី០១- ឈ្មោះ រ័ត្នភា រុន ហៅត័រ ភេទប្រុស អាយុ២២ឆ្នាំ មុខរបរកសិករ នៅភូមិត្រអណ្តូងទឹក ឃុំលំហាច ស្រុកអង្គស្នួល ខេត្តកណ្តាល (ឃាត់ខ្លួន) ទី០២-ឈ្មោះ ខុន សុខនឿន ភេទប្រុស អាយុ២៩ឆ្នាំ ជនជាតិខ្មែរ មុខរបរមិនពិតនៅភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល (គេចខ្លួន) ។
វត្ថុតាងចាប់យកទូរស័ព្ទម៉ាកនូគារអិនចុចពិល១គ្រឿង ជារបស់ជនសង្ស័យម៉ូតូម៉ាកសង់០១៨ពណ៌ខ្មៅ០១គ្រឿង ពាក់ផ្លាកលេខ (ភ្នំពេញ1GV-8728) លេខតួ និងលេខម៉ាស៊ីន 5185754 ។ នៅមុនពេលកើតហេតុជនរងគ្រោះបានជិះម៉ូតូសង់ ០១៧ ពណ៌ខ្មៅ ពាក់ផ្លាកលេខភ្នំពេញ1GG-9379 ដោយប្តីឈ្មោះ ពេទ វី ជាអ្នកឌុប ព្រមទាំងកូន២នាក់ជិះជាមួយ ។ លុះមកដល់ចំណុចកើតហេតុ ស្រាប់តែម៉ូតូជនសង្ស័យជិះមកដល់ហើយបានឆក់កាបូបស្ពាយពីជនរងគ្រោះ តែមិនដាច់ខ្សែទេ បណ្តាលឲ្យម៉ូតូជនរងគ្រោះសង្កត់ទៅលើម៉ូតូជនសង្ស័យ ។
ពេលនោះជនសង្ស័យបានលើម៉ូតូឡើងហើយជិះរត់ទៅទិសខាងលិចទើបអ្នកលក់នៅក្បែរនោះស្រែកថា ចោរៗជួបនឹងសមត្ថកិច្ចប៉ុស្តិ៍ដំណាក់អំពិលល្បាត ហើយដេញតាមជនសង្ស័យជិះគេចធ្លាក់ប្រឡាយចិញ្ចើមថ្នល់ រួចរត់គេចខ្លួនទៅទិសខាងជើង ។ ក្រោយមកទើបកម្លាំងរុករកឃាត់បានឈ្មោះ រ័ត្នភារុន ហៅត័រ នៅចំណុចដីវាលឯឈ្មោះ ខុន សុខនឿន គេចខ្លួនបាត់ តែម្តង ។
តាមចម្លើយសារភាពរបស់ជនសង្ស័យឈ្មោះ រ័ត្នភារុន ហៅត័រ បានសារភាពថា ខ្លួន និងឈ្មោះ ខុន សុខនឿន បានធ្វើសកម្មភាពឆក់កាបូបដៃពីជនរងគ្រោះពិតប្រាកដមែន ។ ករណីនេះកម្លាំងជំនាញកំពុងបន្តចាត់ការតាមនីតិវិធី ៕
ចែករំលែកព័តមាននេះ