ខេត្តកំពង់ឆ្នាំង ៖ មានករណីផ្ទុះអាវុធមួយបានកើតឡើងនៅវេលាម៉ោង៩និង២០នាទីយប់ ថ្ងៃទី១០ ខែធ្នូនេះនៅចំណុចភូមិដំរីកូន ឃុំអញ្ចាញរូង ស្រុកបរិបូណ៌ បណ្ដាលឲ្យយុវជនម្នាក់រងគ្រោះដោយត្រូវគ្រាប់នៅភ្លៅខាងឆ្វេង ។
ព័ត៌មានជាបឋមថា ជាអំពើប្លន់ប្រដាប់អាវុធ ។ ក្រោយពេលកើតហេតុជនរងគ្រោះក៏បានដឹកមកសង្គ្រោះនៅឯមន្ទីរពេទ្យខេត្តកំពង់ឆ្នាំង ។
ព័ត៌មានបឋមពីជនរងគ្រោះដែលកំពុងតែសម្រាកនៅឯមន្ទីរពេទ្យបាននិយាយឲ្យដឹងថា រូបគាត់មានឈ្មោះ វ៉ាត់ សុខសាន្ត អាយុ២៧ឆ្នាំ មានទីលំនៅភូមិឃុំខាងលើ ។ មុនពេលកើតហេតុរូបគាត់ជាមួយនឹងប្រជាការពារកំពុងតែអង្គុយជុំគ្នានៅចម្ងាយប្រមាណ២០០ម៉ែត្រពីកន្លែងកើតហេតុ ។ ពេលនោះក៏បានលឺតាមវិទ្យុទាក់ទងថា មានករណីប្លន់ប្រដាប់អាវុធនៅផ្ទះឈ្មោះ ស៊ុយ គឹម បន្ទាប់មករូបគាត់ និងប្រជាការពារបានស្ទុះទៅកន្លែងកើតហេតុក្នុងគោលបំណងទៅជួយជនរងគ្រោះពេលទៅមិនទាន់ដល់ផង ក៏ត្រូវជនល្មើសបាញ់ជាច្រើនគ្រាប់ស្រោចមកលើប្រជាពលរដ្ឋដែលប្រុងចូលទៅជួយបណ្តាលអោយរូបគាត់រងរបួសត្រូវភ្លៅខាងឆ្វេង ។
ជាមួយគ្នានោះស្ត្រីជាម្ដាយរបស់ជនរងគ្រោះក៏បាននិយាយឱ្យដឹងដែរថា រូបគាត់អត់បាននៅកន្លែងកើតហេតុនោះទេ គឺទៅចូលរួមក្នុងពិធីបុណ្យនៅក្នុងវត្តដំរីកូន ហៅវត្តថ្មី ប៉ុន្តែក្រោយពេលកើតហេតុគាត់បានមកដល់បានដឹងថា ជនសង្ស័យមានគ្នា៣នាក់ បានទៅប្លន់ផ្ទះឈ្មោះ ស៊ុយ គឹម ប៉ុន្តែមិនបានយកទ្រព្យសម្បត្តិអ្វីបាននោះទេ ដោយសារផ្អើលដល់ប្រជាពលរដ្ឋ និងប្រជាការពារទៅចូលជួយ ។ យ៉ាងនេះក្តីឈ្មោះ ស៊ុយ គឹម ត្រូវបានជនល្មើសវាយបណ្ដាលឱ្យហើមមុខហើមមាត់ ។ ចំណែកស្ត្រីជាអនុប្រធានភូមិដំរីកូនឈ្មោះ ហែម វួន ក៏ត្រូវជនល្មើសចាប់ចងជាប់ផងដែរ ។
ដោយឡែកលោក ជាង សុវណ្ណារិទ្ធ អធិការនគរបាលស្រុកបរិបូរណ៍បានប្រាប់នៅព្រឹកថ្ងៃទី១១ ខែធ្នូនេះថា លោកមិនទាន់ច្បាស់ថា ករណីនេះជាអំពើប្លន់ ឬគំនុំអោយបានច្បាស់លាស់នៅឡើយទេ ពេលនេះលោកកំពុងតែស្រាវជ្រាវនៅឡើយលោកគ្រាន់តែដឹងថា នៅយប់កើតហេតុជនល្មើសមានគ្នា៣នាក់ បានដើរចូលទៅក្នុងភូមិដោយសួរប្រជាពលរដ្ឋរកគោបា ហើយក៏បានចាប់ចងស្ត្រីឈ្មោះ ហែម វួន ជាអនុប្រធានភូមិ និងបានដោះយកចិញ្ចៀនផ្លាកទីនតម្លៃប្រមាណជាង១០ម៉ឺនរៀល រួចចូលទៅផ្ទះឈ្មោះ ស៊ុយ គឹម វាយយកប្រាក់ចំនួន៥ម៉ឺនរៀល រួចក៏គេចចេញទៅ ដោយបានគំរាមប្រជាពលរដ្ឋមិនឲ្យតាមបើហ៊ានតាមគេនឹងបាញ់ ។
ប្រជាពលរដ្ឋនៅតែព្យាយាមតាម ដើម្បីចាប់ជនល្មើសទើបជនល្មើសនោះបាញ់ស្រោចចំនួន៣គ្រាប់មកលើប្រជាពលរដ្ឋ បណ្តាលឲ្យរងរបួសម្នាក់ ។ ព័ត៌មានបន្ថែមយើងនឹងផ្សាយជូននៅពេលក្រោយ ៕
ចែករំលែកព័តមាននេះ