ចិន ៖ តាមប្រភពព័ត៌មាន Shanghaiist បានឲ្យដឹងថា ស្ត្រីម្នាក់ត្រូវបានប៉ូលិសចាប់ខ្លួននៅក្នុងខេត្ត Zhejiang ពីបទកុហកប៉ូលិស និងបង្កើតព័ត៌មានក្លែងក្លាយបំពុលសង្គម ក្រោយពីប្រកាសដើររកកូនប្រុសដែលបានបាត់ខ្លួន។
ស្ត្រីជាម្តាយអាយុ៣៣ឆ្នាំ បានប្រកាសដើររកកូនប្រុស ដោយរាយការណ៍ទៅប៉ូលិសនៅរសៀលថ្ងៃសុក្រ។ ភ្លាមនោះ ព័ត៌មាននេះក៏បានផ្អើលពេញបណ្តាញសង្គម ដោយសារតែស្ត្រីជាម្តាយហ៊ានជះលុយ ៥សែនយន់ជារង្វាន់ដល់អ្នករកឃើញ។ អស់រយៈពេល៥ថ្ងៃ ក្មេងប្រុសនោះក៏ត្រូវបានគេរកឃើញ។
តាមការពិត គឺវាមិនបានបាត់ខ្លួននោះទេ។ នាងជាម្តាយបានសារភាពប្រាប់ប៉ូលិសថា នាងបានយកកូនរបស់នាងទៅលាក់នៅក្នុងរថយន្តរបស់នាង ក្រោយពេលកូននាងចេញពីសាលា។ រួចហើយ នាងក៏បើករថយន្តទៅទម្លាក់កូននាងឲ្យនៅក្នុងភូមិជិតនោះ។ នាងបន្តថា នាងធ្វើដូចនេះក៏ដោយសារតែចង់សាកចិត្តប្តី ដែលកំពុងធ្វើការនៅទីក្រុងមួយទៀតឆ្ងាយពីគ្នា។
ការសាកចិត្តរបស់នាង ពិតជាបង្ហាញថា ប្តីរបស់នាងស្រឡាញ់កូនប្រុសប៉ុនណាមែន។ គ្រាន់តែដឹងដំណឹងភ្លាម គេក៏បានដើររកអស់រយៈពេល៤ថ្ងៃជាប់គ្នាមិនដេកមិនពួន។
ថ្វីបើសាកចិត្តបានសម្រេច នាងត្រូវដោះស្រាយជាមួយនឹងប៉ូលិស ដោយត្រូវចាប់ខ្លួនពីបទកុហកប៉ូលិស និងបង្កើតព័ត៌មានក្លែងក្លាយបំពុលសង្គម។ ប៉ូលិសថា ទង្វើរបស់នាងបានធ្វើឲ្យខាតបង់ពេលវេលា និងថវិការបស់សាធារណៈមិនតិចនោះទេ៕
ចែករំលែកព័តមាននេះ