ខេត្តព្រះវិហារ ៖ លោក អ៊ុន ចាន់ដា អភិបាលខេត្តព្រះវិហារបានជម្រុញឲ្យប្រជាកសិករទាំងអស់នៅខេត្តព្រះវិហារត្រូវបង្កើនផ្ទៃដីដាំដុះដំណាំស្រូវបន្ថែមទៀតស្របពេលបច្ចុប្បន្ននេះទីផ្សារស្រូវអង្ករនៅខេត្តកំពុងមានការឡើងថ្លៃ រីឯទិន្នផល និងគុណភាពក៏ទទួលបានល្អប្រសើរជាងមុនដែរ ។
ថ្លែងក្នុងឱកាសដឹកនាំមន្ត្រីរាជការកងកម្លាំងប្រដាប់អាវុធទាំងបីប្រភេទចុះជួយច្រូតស្រូវប្រជាពលរដ្ឋនៅភូមិព្យួរជ្រូក ឃុំគូលែនជើង ស្រុកគូលែន ខេត្តព្រះវិហារ នៅថ្ងៃទី០៩ ខែធ្នូ ឆ្នាំ២០១៨នេះ លោក អ៊ុន ចាន់ដា មានប្រសាសន៍ថា នៅក្នុងរដូវប្រមូលផលស្រូវចុងឆ្នាំ២០១៨នេះឃើញថា តម្លៃស្រូវរបស់កសិករមានការឡើងថ្លៃជាងឆ្នាំមុននឹងអាចឲ្យកសិករមានជីវភាព ធូរធារបានមួយកម្រិត ។ លោកបន្តថា កសិផលស្រូវឆ្នាំនេះទាំងបរិមាណផល និងគុណភាព មានការកើនឡើងដែលធ្វើឲ្យតម្លៃស្រូវឆ្នាំនេះឡើងខ្ពស់លើសពីនេះទៅទៀត ខេត្តព្រះវិហារ បច្ចុប្បន្ននេះមានអ្នកបញ្ជាទិញត្រឹមត្រូវ ដោយក្រុមហ៊ុនចំនួន៤ផងដែរ ដែលផ្តល់នូវតម្លៃស្រូវខ្ពស់ជាងឈ្មួញកណ្តាល ។
ដូច្នេះហើយ លោកក៏បានជម្រុញឲ្យកសិករទាំងអស់នៅរដូវវស្សាឆ្នាំក្រោយនេះធ្វើយ៉ាងណាពង្រីកនូវផ្ទៃដីដាំដុះស្រូវបន្ថែមទៀតសម្រាប់ផលិតលក់នៅលើទីផ្សារឲ្យកាន់តែច្រើន ដើម្បីទទួលបានប្រាក់ចំណូលមកដោះស្រាយក្នុងជីវភាពគ្រួសារកាន់តែប្រសើរឡើង ។ ទន្ទឹមនឹងនោះដែរ ដើម្បីទប់ស្កាត់បង្ការ និងការពារនូវហានិភ័យគ្រោះរាំងស្ងួតនៅពេលខាងមុខ លោកក៏បានអំពាវនាវឲ្យប្រជាពលរដ្ឋប្រជាកសិករទូទាំងខេត្តព្រះវិហារទាំងអស់ត្រូវបង្កើនការយកចិត្តទុកដាក់ និងរក្សាឲ្យបាននូវប្រភពទឹកសម្រាប់ការប្រើប្រាស់ក្នុងជីវភាពប្រចាំថ្ងៃ និងទឹកប្រើប្រាស់សម្រាប់ចិញ្ចឹមសត្វស្រោចស្រពដំណាំជាដើម តែប្រសិនបើនៅមូលដ្ឋានណាជួបកង្វះខាតទឹកត្រូវរាយការណ៍ជាបន្ទាន់មកកាន់អាជ្ញាធរ ដើម្បីមានលទ្ធភាពធ្វើការអន្តរាគមន៍ឲ្យទាន់ពេលវេលាដល់ប្រជាពលរដ្ឋ ។ ព្រោះកន្លងទៅនេះកសិករដែលបង្កបង្កើនផលស្រូវធ្ងន់បានជួបគ្រោះរាំងស្ងួតតាំងពីខែតុលាមកប្រមាណជា៣០% នៅទូទាំងខេត្តព្រះវិហារនឹងធ្វើឲ្យទិន្នផលស្រូវមានការធ្លាក់ចុះ ។
លោក ពឹង ទ្រីដា ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារបានឲ្យដឹងថា គិតមកដល់ខែធ្នូ ឆ្នាំ២០១៨នេះការប្រមូលផលស្រូវរដូវវស្សារបស់ប្រជាកសិករនៅទូទាំងខេត្តព្រះវិហារសម្រេចបានប្រមាណ៨០% ហើយ និងបន្តឲ្យរួចរាល់១០០% នៅចុងខែធ្នូ ឆ្នាំ២០១៩ខាងមុខនេះលើផ្ទៃដីប្រមាណជិត៩ហិកតា ។ លោកថា ឆ្នាំនេះស្រូវធ្ងន់ប្រមាណជាង៣ពាន់ហិកតាដែលទទួលរងនូវគ្រោះរាំងស្ងួត ធ្វើឲ្យទិន្នផលស្រូវពេលប្រមូលមានការធ្លាក់ចុះច្រើន បើធៀបនឹងស្រូវស្រាលស្រូវកណ្តាល ។ ដែលក្នុងមួយហិកតាស្រូវស្រាល និងស្រូវកណ្តាលអាច ប្រមូលផលបានរហូតដល់ចន្លោះ២.៩ ទៅ៣តោន បើធៀបនឹងស្រូវធ្ងន់ក្នុង១ហិកតាទទួលផលបានតែជាង១តោនប៉ុននោះតែតម្លៃ និងគុណភាពស្រូវប្រហាក់ប្រហែលទៅនឹងស្រូវស្រាលស្រូវកណ្តាលដែរ ។
យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារបង្ហាញថា គិតមកដល់ថ្ងៃទី០៣ ខែធ្នូ ឆ្នាំ២០១៨នេះការប្រមូលផលស្រូវបានចំនួន៦៨.០៦១ហិកតា ស្មើនឹង៧៥,៨៥% ទទួលបានបរិមាណផល១៩៧.៩៧៣តោន ក្នុងនោះទិន្នផលគិតជាមធ្យម ទទួលបាន ២.៩០៩តោន ក្នុង០១ហិកតា ៕
ចែករំលែកព័តមាននេះ