ខេត្តកំពង់ស្ពឺ ៖ នាងគដែលជាកូនកំព្រាឪពុកម្តាយរស់នៅតែម្នាក់ឯង បានត្រូវជនលាមកម្នាក់ លបឡើងទៅលើផ្ទះចាប់រំលោភនាង រហូតបានសម្រេច ហើយសម្លាប់តែម្តង ។ ប៉ុន្តែក្រោយពីសម្លាប់នាងរួច ជន…
ខេត្តកំពង់ស្ពឺ ៖ នាងគដែលជាកូនកំព្រាឪពុកម្តាយរស់នៅតែម្នាក់ឯង បានត្រូវជនលាមកម្នាក់ លបឡើងទៅលើផ្ទះចាប់រំលោភនាង រហូតបានសម្រេច ហើយសម្លាប់តែម្តង ។ ប៉ុន្តែក្រោយពីសម្លាប់នាងរួច ជន
នេះមិនបានរត់ទៅណាទេ គឺបាននៅដេកឱបសពនាង រហូតអ្នកជិតខាងប្តឹងសមត្ថកិច្ចឱ្យព័ទ្ធចាប់បានទាំងយប់ ។
មន្ត្រីនគរបាលស្រុកគងពិសីបានឲ្យដឹងថា ករណីរំលោភសម្លាប់នេះ កើតឡើងកាលយប់ថ្ងៃទី៧ ធ្នូ កន្លងទៅ វេលាម៉ោងប្រហែលជាង១១យប់ នៅភូមិក្រាំងឈើនាង ឃំុមហាឫស្សី ស្រុកគងពិសី ។ ជនរងគ្រោះអាយុ៣៣ឆ្នាំ ដេកនៅលើផ្ទះឈើសង់ខ្ពស់ពីដីទំហំ៨ម៉ែត្រ គុណនឹង៧ម៉ែត្រ ជញ្ជាំងក្តារ ដំបូលប្រក់ក្បឿងក្បាច់ ត្រូវជនដៃដល់ឈ្មោះ យុក រ៉ាត់ ភេទប្រុស អាយុ៣៣ឆ្នាំ នៅភូមិព្រៃអន្ទាវ ឃំុស្តុក ស្រុកគងពិសី ឡើងទៅចាប់រំលោភ ហើយសម្លាប់នាងចោលបំបិទមាត់ ព្រោះខ្លាចបែកការណ៍ ។ ក្រោយកើតហេតុ សមត្ថកិច្ចបានទៅដល់ឡោមព័ទ្ធ និងចាប់ខ្លួនជនសង្ស័យនាំយកទៅកាន់អធិការដ្ឋាននគរបាលស្រុកឃុំខ្លួន ដើម្បីបន្តនីតិវិធី ។
តាមអ្នកជិតខាងឲ្យដឹងថា នៅពេលកើតហេតុនោះ ពួកគាត់ឮសំឡេងនាងស្រែក ដែលជាធម្មតានាង មិនដែលស្រែកនៅពេលយប់ព្រលប់ទេ ។ ពេលនោះ គ្រប់គ្នាឆ្ងល់ក៏រត់សំដៅទៅផ្ទះរបស់នាង ហើយរុញទ្វារស្រាប់តែជាប់គន្លឹះខាងក្នុង លុះបញ្ចាំងពិលតាមប្រឡោះក្តារ ឃើញជនសង្ស័យយកកាំបិតខ្ទាស់ទ្វារជាប់ ។
នៅពេលសមត្ថកិច្ចមកដល់ អ្នកភូមិបានគាស់ទ្វារចូលទៅនិងនាំគ្នាដើររក ក៏ឃើញជនសង្ស័យកំពុងដេកឱបសពនាងនៅក្នុងភួយទើបចាប់ខ្លួនតែម្តង ។ នៅព្រឹកថ្ងៃទី៨ ខែធ្នូ ក្រោយពេលត្រូវចាប់ខ្លួន នៅចំពោះមុខសមត្ថកិច្ច ជនសង្ស័យឆ្លើយសារភាពថា មុនពេលកើតហេតុរូបគេបានមកសង់ផ្ទះឲ្យអ្នកភូមិដែលនៅជាប់ផ្ទះរបស់នាង ។ ក្រោយពេលសង់រួចបើកលុយហើយក៏បែកគ្នាទៅផ្ទះអស់ទៅ ដោយឡែករូបគេក៏វិលទៅផ្ទះដូចអ្នកឯទៀតដែរ ។
ជនសង្ស័យឆ្លើយទៀតថា កំឡុងពេលសង់ផ្ទះក្បែរនោះ រូបគេបានលែបខាយជាកាយវិការចែចង់នាងដែរ ។ លុះពេលត្រឡប់ទៅផ្ទះ ដោយនឹកស្មានថា នាងព្រមស្រឡាញ់ខ្លួន ក៏លបស្កាត់ទៅរកនាង តែពេលឡើងដល់លើផ្ទះ ត្រូវនាងស្រែកក៏ចាប់ខ្ទប់មាត់នាង រួចធ្វើសកម្មភាពចាប់រំលោភរហូតបានសម្រេច ។
ពេលធ្វើសកម្មភាពនោះនាងស្រែកដែរតែស្រែកមិនរួចព្រោះរូបគេខ្ទប់មាត់ជាប់ ហើយពីក្រោយរំលោភរួចក៏សម្លាប់នាងចោលព្រោះខ្លាចបែកការណ៍ដឹងដល់អ្នកជិតខាង តែមិននឹកស្មានថាអ្នកជិតខាងដឹងរឿង និងរាយការណ៍ទៅសមត្ថកិច្ចឲ្យមកព័ទ្ធចាប់រូបគេឡើយ ។ ក្រោយពីពិនិត្យរួច សមត្ថកិច្ចបានប្រគល់សពឲ្យសាច់ញាតិ និងអ្នកភូមិរៀបចំធ្វើបុណ្យតាមប្រពៃណី ។
សូមបញ្ជាក់ថា ជនសង្ស័យជាជាងសំណង់ ដែលបានមកសង់ផ្ទះឲ្យអ្នកភូមិម្នាក់ ជាប់ផ្ទះជនរងគ្រោះ ។ ក្រោយពេលសង់រួច ក្រុមជាងទាំងអស់បានត្រឡប់ទៅផ្ទះរៀងៗខ្លួនច្រើនថ្ងៃមកហើយ ដោយឡែកជនសង្ស័យស្រាប់តែយប់កើតហេតុ បានមកលបចាប់នាងរំលោភនៅលើផ្ទះហើយសម្លាប់តែម្តង ៕
ចែករំលែកព័តមាននេះ