ខេត្តសៀមរាប ៖ សិប្បកម្មផលិតវត្ថុសិល្បៈបុរាណមួយនៅខេត្តសៀមរាប ក្រោមការវិនិយោគរបស់អឺរ៉ុប បានផ្ដល់ការងារជារៀងរាល់ថ្ងៃដល់ប្រជាពលរដ្ឋក្នុងមូលដ្ឋាន ប្រមាណជាង១.២០០នាក់ និងផ្ដល់ប្រយោជន៍ដល់ពលរដ្ឋផ្សេងទៀតជាង៥.០០០នាក់ ។
សិប្បកម្មដែលស្ថិតក្រោមការវិនិយោគរបស់ក្រុមហ៊ុន Artisan Angkor បានបង្កើតឡើងតាំងពីឆ្នាំ១៩៩២ ក្នុងគោលបំណងស្ដារឡើងវិញនូវសិល្បៈបុរាណរបស់កម្ពុជា ព្រមទាំងលើកស្ទួយនូវវប្បធម៌ខ្មែរផងដែរ ។ សិប្បកម្មនេះ ក៏បានការជួយជ្រោមជ្រែងពីស្ថានទូតសហគមន៍អឺរ៉ុបប្រចាំកម្ពុជាក្នុងបេសកកម្មរបស់ខ្លួន នៅក្នុងប្រទេសកម្ពុជាផងដែរ ។
លោក Pierre-Andre Romano នាយកប្រតិបត្តិក្រុមហ៊ុន Artisan Angkor បានឲ្យដឹងថា ក្រុមហ៊ុន Artisan Angkor ជាក្រុមហ៊ុនធំជាងគេនិងផ្ដល់ការងារដល់ពលរដ្ឋខ្មែរច្រើនជាងគេប្រចាំខេត្តសៀមរាបនេះ ដោយក្នុងមួយឆ្នាំៗ ក្រុមហ៊ុនបានផ្ដល់ប្រាក់បៀវត្សរ៍សរុបរាប់លានដុល្លារអាមេរិក ដូចនេះវាជាការផ្ដល់ប្រយោជន៍ដ៏ធំមួយដល់ពលរដ្ឋកម្ពុជា ។ លោកបន្តថា បច្ចុប្បន្ននេះសិប្បកម្មArtisan Angkor មិនត្រឹមតែផលិតនូវសិល្បៈបុរាណនោះទេ ក៏ប៉ុន្តែសិប្បកម្មមួយនេះ ក៏បានបើកឲ្យទេសចរជាតិ និងអន្តរជាតិ មកទស្សនានូវសង្វាក់ផលិតកម្មរបស់ខ្លួនផងដែរ ដោយក្នុងមួយឆ្នាំៗអាចទទួលបានទេសចរអន្តរជាតិមកទស្សនាប្រមាណ៥០ម៉ឺននាក់ ដែលអាចធ្វើឲ្យកិត្តិសព្ទរបស់ប្រទេសកម្ពុជា កាន់តែល្បីទៅកាន់ប្រទេសក្រៅ ។ លោកថា ៖« ភ្ញៀវដែលមកទស្សនានៅក្នុងសិប្បកម្មផ្ទាល់ ក៏បានទិញផលិតផលរបស់យើង ដើម្បីយកទៅប្រទេសគេដែរ អីចឹងវាក៏ជាការនាំចេញនៅនឹងកន្លែងមួយផ្នែកផងដែរ » ។
លោក ម៉ៃ ហ៊ត សិប្បករមួយរូបដែលបម្រើការនៅក្នុងសិប្បកម្មនេះអស់រយៈពេល១៦ឆ្នាំមកហើយ បានឲ្យដឹងថា តាមរយៈការងារនៅក្នុងសិប្បកម្មមួយនេះ បានផ្ដល់ប្រយោជន៍ដល់លោកនិងគ្រួសារលោកមានជីវភាពសមរម្យ ហើយអាចឲ្យលោកនិងគ្រួសាររស់នៅជុំគ្នាដោយមិនចាំបាច់ធ្វើចំណាកស្រុកទៅក្រៅប្រទេសឬទៅធ្វើការនៅខេត្តឆ្ងាយឡើយ ។ លោកបន្តថា ៖« ការងារនៅក្នុងសិប្បកម្មនេះ បើថាពិបាក ក៏មិនពិបាក ស្រួលក៏មិនស្រួល ព្រោះថារាល់ការងារទាំងអស់ គ្មានការងារណាស្រួលៗ ហើយចាំតែទទួលលុយនោះទេ អីចឹងគឺត្រូវតែមានពិបាកខ្លះហើយ តែវាមិនពិបាករហូតដល់ថ្នាក់ធ្វើមិនបាននោះទេ ។ ជាក់ស្ដែង រូបលោកផ្ទាល់បានធ្វើការនៅក្នុងសិប្បកម្មនេះ អស់រយៈពេល១៦ឆ្នាំ បើសិនជាវាពិបាក នោះប្រហែលជាមិនអាចនៅទ្រាំបានយូរបែបនេះទេ។ ម្យ៉ាងទៀត ចាប់តាំងពីលោកបម្រើការនៅក្នុងសិប្បកម្មនេះ បញ្ហាប្រាក់បៀវត្សរ៍របស់កម្មករ មិនដែលមានបញ្ហានោះទេ ពោលគឺថៅកែបានផ្ដល់ជូនទៅតាមកាលកំណត់ និងពេលវេលា ដើម្បីយកទៅដោះស្រាយជីវភាពរៀងខ្លួន ។
សិប្បករម្នាក់ទៀតដែលបម្រើការអស់រយៈពេលប្រហាក់ប្រហែលនឹងលោក ម៉ៃ ហ៊ត ដែរក៏បានឲ្យដឹងថា ក្នុងមួយខែលោកអាចទទួលបានចំណូលប្រមាណជាង២០០ដុល្លារអាមេរិក ដើម្បីដោះស្រាយជីវភាពក្នុងគ្រួសារ ។ លោកថា ៖« ការងារនៅក្នុងរោងសិប្បកម្មនេះ ក្នុងមួយថ្ងៃ៨ម៉ោងដូចការងារទូទៅដែរ ក៏ប៉ុន្តែការងារនេះមិនប្រើកម្លាំងខ្លាំងៗនោះទេ ព្រោះដូចដឹងស្រាប់ហើយ ផលិតផលសិល្បៈបុរាណ ត្រូវការថ្នាក់ថ្នម និងផ្ចិតផ្ចង់បន្តិច ទើបទទួលបានលទ្ធផលស្អាតល្អ ។
លោក George Edgar ឯកអគ្គរដ្ឋទូតសហភាពអឺរ៉ុបប្រចាំនៅប្រទេសកម្ពុជា ក៏បានមានប្រសាសន៍ថា វិនិយោគិនអឺរ៉ុបដែលវិនិយោគនៅក្នុងប្រទេសកម្ពុជា ត្រូវតែធានាថាបានផ្ដល់នូវសុខុមាលភាពដល់ពលរដ្ឋកម្ពុជា ទាំងបរិយាកាសនៅកន្លែងការងារ និងប្រាក់ចំណូលរបស់ពលរដ្ឋ ។ លោកថា ៖« អឺរ៉ុបដែលវិនិយោគនៅក្នុងប្រទេសកម្ពុជា ហាក់កំពុងនាំមុខគេ ក្នុងការគិតគូរពីទំនួលខុសត្រូវរបស់ខ្លួន ដូចជាគិតគូរពីសុវត្ថិភាពពេលកំពុងបំពេញការងារ និងការគិតគូរដល់ជីវភាពរស់នៅរបស់កម្មករ និយោជិតរបស់ខ្លួនផងដែរ » ៕
ចែករំលែកព័តមាននេះ