ខេត្តព្រះសីហនុ ៖ បុគ្គល៥នាក់ដែលក្លែងបន្លំធ្វើជាសង្ឃ រួមទាំងវត្ថុតាងពាក់ព័ន្ធការសេពគ្រឿងញៀនមួយចំនួន ត្រូវបានកម្លាំងនគរបាលស្រុកព្រៃនប់ឃាត់ខ្លួន នាំមកកាន់អធិការដ្ឋាន នៅល្ងាចថ្ងៃទី៨ ធ្នូ បន្ទាប់ពីឃាត់ខ្លួន នៅចំណុចផ្ទះសំណាក់ហ្វីលីតា ស្ថិតក្នុងភូមិអូតាប៉ាង ឃុំអូរឧកញ៉ាហេង ស្រុកព្រៃនប់ ។
លោកវរសេនីយ៍ឯក ហួរ យ៉ៃ អធិការនគរបាលស្រុកព្រៃនប់បានឱ្យដឹងថា ក្រោយពីបានទទួលព័ត៌មានពីម្ចាស់ផ្ទះសំណាក់ខាងលើ លោកបានចាត់លោកវរសេនីយ៍ត្រី ឈុន រតនៈ ទទួលបន្ទុកគ្រឿងញៀន ចុះទៅដល់ទីតាំងផ្ទាល់ ដោយបានសហការល្អពីលោក ហួត បូរ៉ា ម្ចាស់ផ្ទះសំណាក់យីហោ «ហ្វីលីតា» ជូនដល់បន្ទប់សង្ស័យឃើញជាក់ស្តែងថា ពួកគេទាំង៥នាក់បានក្លែងជាសង្ឃ និងមានវត្ថុតាងពាក់ព័ន្ធការសេពគ្រឿងញៀន ក៏បាននាំមកកាន់អធិការដ្នាន ដើម្បីសួរនាំ ។
លោក ហួរ យ៉ៃ បានបន្តថា តាមរយៈនៃកាស៊ើបអង្កេត និងមានការនិមន្តចូលរួមពីព្រះតេជគុណ ឈឹម យុត ព្រះអនុគណស្រុកព្រៃនប់ និងជាព្រះចៅអធិការវត្តជួលពិនិត្យទើបស្គាល់ច្បាស់់ថា ជនទាំង៥នាក់ គឺជាអ្នកក្លែងបន្លំជាសង្ឃនិមន្តបិណ្ឌបាតលុយយកមកទិញគ្រឿងញៀនស៊ីចាយ ដេកផ្ទះសំណាក់យ៉ាងហ៊ឺហា ។
លោកអធិការបន្ថែមថា ជនក្លែងបន្លំ៥នាក់១-ឈ្មោះ សូវ មិត្ត ភេទប្រុស អាយុ១៦ឆ្នាំ មុខរបរមិនពិតប្រាកដ មានទីលំនៅភូមិត្រពាំងវែងខាងកើត ឃុំដងទង់ ស្រុកដងទង់ ខេត្តកំពត ។២-ឈ្មោះ សុខ រស្មី
ភេទប្រុស អាយុ៣៦ឆ្នាំ មុខរបរមិនពិតប្រាកដ មានទីលំនៅដូចអ្នកទី១ ។៣-ឈ្មោះ មាស សីុរ៉ា ភេទប្រុស អាយុ១៧ឆ្នាំ មុខរបរមិនពិតប្រាកដ មានទីលំនៅដូចអ្នកទី១ ។ ៤-ឈ្មោះ ជី ភ័ក្ត្រ ភេទប្រុស អាយុ២៧ឆ្នាំ មុខរបរមិនពិតប្រាកដ មានទីលំនៅភូមិត្រពាំងវែងខាងកើត ឃុំដងទង់ ស្រុកដងទង់ ខេត្តកំពត ។ ៥-ឈ្មោះ ខាត យន្ត ភេទប្រុស អាយុ២៥ឆ្នាំ មុខរបរមិនពិតប្រាកដ មានទីលំនៅភូមិសុភី ឃុំស្រែជាខាងជើង ស្រុកដងទង់ ខេត្តកំពត ។
សម្ភារដែលដកហូតរួមមាន ស្បង់ចីវរចំនួន៥ កំប្លេរ បាត្រចំនួន៣ ។ជនទាំង៥នាក់ត្រូវបានឱ្យដោះស្បង់ចេញពីសំណាក់ព្រះអនុគណស្រុកហើយកសាងសំណុំរឿងតាមនីតិវិធី ។ លោក ហួរ យ៉ៃ បានសំណូមពរដល់ប្រជាពលរដ្ឋ ជាពិសេសតាមផ្ទះសំណាក់នានាអាចជួយផ្តល់ព័ត៌មាន ដូចម្ចាស់ផ្ទះសំណាក់ខាងលើ ដើម្បីសហការជាមួយសមត្ថកិច្ចលុបបំបាត់សកម្មភាពជនខិលខូចដែលតែងតែយកផ្ទះសមណាក់សម្ងំប្រព្រឹត្តអំពើទុច្ចរិត ៕
ចែករំលែកព័តមាននេះ