ខេត្តរតនគិរី ៖ រថយន្តបាកុងចំនួន៤គ្រឿងដឹកជញ្ជូនសម្ភារកែច្នៃឈើជាច្រើនគ្រឿងត្រូវបានកម្លាំងគណៈបញ្ជាការឯកភាពស្រុកកូនមុំស្ទាក់ចាប់ឃាត់បញ្ជូនឱ្យរដ្ឋបានព្រៃឈើ ។ ការឃាត់រថយន្តបាកុងខាងលើនេះធ្វើឡើងនៅវេលាម៉ោង៧និង៣០នាទីយប់ ថ្ងៃទី៨ ខែធ្នូ ឆ្នាំ២០១៨ នៅតាមបណ្តោយផ្លូវជាតិលេខ៧៨ នៅត្រង់ចំណុចភូមិតាអងកាតែ ឃុំតាអង ស្រុកកូនមុំ ខេត្តរតនគិរី ។
ប្រភពពីសមត្ថកិច្ចដែលចុះឃាត់រថយន្តបាកុងខាងលើបានបង្ហើបឲ្យដឹងថា ដឹកនាំកម្លាំងផ្ទាល់ដោយលោក សាយ ចំរើន អភិបាលរងស្រុកកូនមុំឲ្យចុះឃាត់រថយន្តបាកុងចំនួន៤គ្រឿងដែលដឹកសម្ភារកែច្នៃឈើមួយចំនួនធំ ។
ប្រភពបន្តថា រថយន្តបាកុងទាំង៤គ្រឿងនោះដឹកជញ្ជូនសម្ភារឈើមានដូចជា រណារយន្តកែច្នៃនិងម៉ាស៊ីនត្រង់ស៊ីន័រ ជាច្រើនគ្រឿងសម្រាប់កាប់ផ្តួលឈើផងដែរ ហើយធ្វើការបើកបរចេញពីភូមិសាស្ត្រនៃខេត្តស្ទឹងត្រែងឆ្លងកាត់ស្រុកកូនមុំ និងស្រុកលំផាត់ខេត្តរតនគិរីឆ្ពោះទៅស្រុកកោះញែកខេត្តមណ្ឌលគិរី ។
មុនពេលបង្ក្រាបនោះលោកអភិបាលស្រុកកូនមុំបានរាយការណ៍ទៅអភិបាលខេត្តហើយលោកអភិបាលខេត្តក៏បានបញ្ជាឲ្យលោកអភិបាលស្រុកឃាត់រថយន្តបាកុងខាងលើនោះតែម្តង ។ ក្រោយពីឃាត់រថយន្តបាកុងនេះ ភ្លាមៗនោះក៏មានអន្តរាគមន៍ពីសមត្ថកិច្ចនៅក្នុងខេត្តឲ្យដោះលែងវិញដែរ ប៉ុន្តែលោកអភិបាលស្រុកមិនដោះលែងឡើយព្រោះជាបទបញ្ជាពីអភិបាលខេត្ត ។
លោក សេក ហៃ អភិបាលស្រុកកូនមុំបានឲ្យដឹងនៅព្រឹកថ្ងៃទី៩ ខែធ្នូ ឆ្នាំ២០១៨ ថារថយន្តបាកុងទាំង៤គ្រឿងនេះ លោកនឹងប្រគល់ទៅឲ្យជំនាញរដ្ឋបាលព្រៃឈើខេត្តជាអ្នកចាត់ការបន្តតាមនីតិវិធី ៕
ចែករំលែកព័តមាននេះ