ខេត្តព្រៃវែង ៖ សព្វថ្ងៃនេះទីប្រជុំជនអ្នកលឿង នៅមិនទាន់មានសួនច្បារ ឬទីតាំងលំហែកាយសម្រាប់អោយប្រជាពលរដ្ឋក្នុងតំបន់នេះ អាចទៅហាត់ប្រាណ ឬអង្គុយលេងកំសាន្តស្រូបយកខ្យល់អាកាសបរិសុទ្ធនោះទេ បើទោះបីជាតំបន់នេះប្រមូលផ្តុំដោយមនុស្សច្រើនកុះករ និងជាទីតាំងសេដ្ឋកិច្ចដ៏សំខាន់របស់ខេត្តក៏ដោយ។
ប្រជាពលរដ្ឋនៅតំបន់នេះបានលើកឡើងថា សព្វថ្ងៃនេះបើត្រឹមហាត់ប្រាណដើម្បីសុខភាព ពួកគាត់អាចចូលទៅហាត់ក្នុងវិហារចិន ជិះកង់តាមដងផ្លូវ ឬចូលទៅហាត់ប្រាណនៅក្នុងក្លឹបឯកជនក៏បាន ប៉ុន្តែបើចង់ទៅអង្គុយលេងគយគន់ទេសភាពស្ពានហ្សឹបាសា ឬស្រូបយកខ្យល់អាកាសបរិសុទ្ធពីដងទន្លេមេគង្គវិញនោះ គឺគ្មានកន្លែងនោះទេ។
ប៉ុន្តែប្រជាពលរដ្ឋមួយចំនួនទៀតបានបញ្ជាក់ថា ក្រោយពីស្ពានហ្សឹបាសា ហៅ ស្ពានអ្នកលឿង បានសម្ភោធដាក់អោយប្រើប្រាស់ជាផ្លូវការ កំពង់ចម្លងអ្នកលឿង និងអ៊ូសាឡាងអ្នកលឿង ក៏ត្រូវបានទុកចោលដោយមិនមានការប្រើប្រាស់អ្វីទេ ហើយទីតាំងនេះ គឺជាទីតាំងដ៏ល្អបំផុត ក្នុងការកែលម្អអោយទៅជាសួនច្បារ កន្លែងហាត់ប្រាណ កន្លែងអង្គុយមើលទេសភាពស្ពានហ្សឹបាសា និងកន្លែងអង្គុយស្រូបយកខ្យល់អាកាសបរិសុទ្ធពីដងទន្លេមេគង្គ ជាពិសេសក៏ជាកន្លែងអាចអោយប្រជាពលរដ្ឋ ឈរមើលពិធីប្រណាំងទូក ដែលអាជ្ញាធរខេត្តតែងតែរៀបចំធ្វើឡើងជារៀងរាល់ឆ្នាំ ជាក់ស្តែងព្រឹត្តិការណ៌ថា្នក់ជាតិ នៃការបំបែកឯកទគ្គកម្មទូកងវែងជាងគេលើពិភពលោក ក៏ប្រារព្ធធ្វើនៅទីតាំងនេះដែរ ៕
ចែករំលែកព័តមាននេះ