រាជធានីភ្នំពេញ ៖ យោងតាមលទ្ធផលទស្សនកិច្ចរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅវៀតណាមពីថ្ងៃទី៦ដល់ទី៨ ខែធ្នូ ឆ្នាំ២០១៨ សម្តេចតេជោនាយករដ្ឋមន្រី្ត និងលោកនាយករដ្ឋមន្ត្រី ង្វៀន សួនហ្វ៊ុក បានប្តេជ្ញាបង្កើនកិច្ចសហប្រតិបតិ្តការ និងការចែករំលែកព័ត៌មានគ្នាឲ្យបានទាន់ពេលវេលាដើម្បីទប់ស្កាត់ឧក្រិដ្ឋកម្មឆ្លងដែន រួមទាំងការកាប់ឈើខុសច្បាប់ក៏ដូចជាកាត់បន្ថយផលប៉ះពាល់ពីគ្រោះធម្មជាតិ ។
នាយករដ្ឋមន្រី្តទាំងពីរក៏បានផ្លាស់ប្តូរយោបល់ផងដែរអំពីកិច្ចសហប្រតិបតិ្តការលើវិស័យអប់រំ និងវប្បធម៌ ។ លោកនាយករដ្ឋមន្ត្រី ង្វៀន សួនហ្វ៊ុក បានឯកភាពសំណើរៀបចំឲ្យមានកិច្ចព្រមព្រៀងស្តីពីការទប់ស្កាត់ការលួច និងការជួញដូរសម្បត្តិវប្បធម៌នៃប្រទេសទាំងពីរ ។
គួរបញ្ជាក់ថា តាមការអញ្ជើញរបស់ឯកឧត្តម ង្វៀន សួនហ្វ៊ុក នាយករដ្ឋមន្ត្រី នៃសាធារណរដ្ឋសង្គមនិយមវៀតណាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់អញ្ជើញទៅបំពេញទស្សនកិច្ចផ្លូវការ នៅសាធារណរដ្ឋសង្គមនិយមវៀតណាមពីថ្ងៃទី៦ ដល់ ៨ ខែធ្នូ ឆ្នាំ២០១៨ ក្នុងបំណងពង្រឹងទំនាក់ទំនងមិត្តភាព និងជំរុញសហប្រតិបត្តិការរវាងប្រទេសទាំងពីរបន្ថែមទៀត ។
យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបតិ្តអន្តរជាតិបានបញ្ជាក់ថា ក្នុងឱកាសទស្សនកិច្ចនេះសម្តេចតេជោនាយករដ្ឋមន្ត្រីបានជួបសម្តែងការគួរសមជាមួយលោក ង្វៀន ហ្វ៊ូជុង អគ្គលេខាធិការបក្សកុម្មុយនីស្ត និងជាប្រធានរដ្ឋវៀតណាម និងលោកជំទាវ ង្វៀន ធី គឹមងិន ប្រធានរដ្ឋសភាជាតិវៀតណាម ហើយបានជួបទ្វេភាគីជាមួយឯកឧត្តមនាយករដ្ឋមន្ត្រី ង្វៀន សួនហ្វ៊ុក ។
សេចក្តីប្រកាសព័ត៌មានក្រសួងការបរទេសលើកឡើងថាថ្នាក់ដឹកនាំវៀតណាមស្វាគមន៍យ៉ាងកក់ក្តៅទស្សនកិច្ចរបស់សម្តេចតេជោ ហ៊ុន សែន និងបានសម្តែងនូវកី្តសោមនស្សរីករាយដោយឃើញវឌ្ឍនភាពដ៏អស្ចារ្យក្នុងការអភិវឌ្ឍ និងភាពកាន់តែថ្កុំថ្កើងនៃកិត្យានុភាពរបស់ប្រទេសកម្ពុជា ក្រោមការដឹកនាំរបស់រាជរដ្ឋាភិបាលដែលមានសម្តេចតេជោ ហ៊ុន សែន ជាប្រមុខ ៕
ចែករំលែកព័តមាននេះ