ខេត្តកណ្តាល ៖ បុរសម្នាក់បានលង់ទឹកស្លាប់ ខណៈពេលទៅមើលឱពុកក្មេកឈឺ រួចឃើញកណ្តុរងាប់យកទៅបោះចោលក្នុងស្រះ ស្រាប់តែរអិលជើងធ្លាក់ចូលតែម្តង កើតឡើងកាលពីម៉ោង១២និង៣០នាទី ថ្ងៃទី០៩ ខែធ្នូ ឆ្នាំ២០១៨…
ខេត្តកណ្តាល ៖ បុរសម្នាក់បានលង់ទឹកស្លាប់ ខណៈពេលទៅមើលឱពុកក្មេកឈឺ រួចឃើញកណ្តុរងាប់យកទៅបោះចោលក្នុងស្រះ ស្រាប់តែរអិលជើងធ្លាក់ចូលតែម្តង កើតឡើងកាលពីម៉ោង១២និង៣០នាទី ថ្ងៃទី០៩ ខែធ្នូ ឆ្នាំ២០១៨ នៅចំណុចស្រះទឹក ស្ថិតក្នុងភូមិជ្រៃរយោង ឃុំកណ្តោក ស្រុកកណ្តាលស្ទឹង ខេត្តកណ្តាល។
ជនរងគ្រោះខាងលើឈ្មោះ ស៊ិន មករា ភេទប្រុស អាយុ២៩ឆ្នាំ រស់នៅភូមិ២ សង្កាត់អូរឡាំពិច ខណ្ឌចំការមន រាជធានីភ្នំពេញ មុខរបរបុគ្គលិកក្រុមហ៊ុន ។
តាមការបំភ្លឺរបស់ឈ្មោះ ម៉ាន ប៊ុនធូ ត្រូវជាប្អូនថ្លៃរបស់ជនរងគ្រោះបានឲ្យដឹងថា មុនពេលកើតហេតុថ្ងៃទី០៨ ធ្នូ ជនរងគ្រោះបានមកមើលឱពុកក្មេកឈឺនៅផ្ទះ ស្ថិតក្នុងភូមិជ្រៃរយោង ឃុំកណ្តោក លុះដល់ម៉ោង០៩និង១៥នាទី ថ្ងៃទី០៩ ធ្នូ ជនរងគ្រោះបានឃើញកណ្តុរងាប់នៅក្នុងផ្ទះ រួចក៏យកសត្វកណ្តុរក្រវាត់ចោលនៅស្រះខាងក្រោយផ្ទះ ។
ប្អូនថ្លៃជនរងគ្រោះឱ្យដឹងទៀតថា បន្ទាប់មកនៅម៉ោង១២និង៣០នាទី ដោយពុំឃើញជនរងគ្រោះត្រឡប់មកផ្ទះវិញ ក៏ផ្អើលឆោឡោនាំគ្នាដើររក ស្រាប់តែឃើញស្បែកជើងជនរងគ្រោះអណ្តែតក្នុងទឹកស្រះ រួចរាវរកក៏ឃើញជនរងគ្រោះលង់ទឹកស្រះស្លាប់បាត់ទៅហើយ បន្ទាប់មកក្រុមគ្រួសារបានរាយការណ៍មកសមត្ថកិច្ច។
ក្រោយមកសមត្ថកិច្ច រួមមាន កម្លាំងជំនាញ កម្លាំងប៉ុស្តិ៍អាជ្ញាធរមូលរដ្ឋាន ចុះមកដល់កន្លែងកើតហេតុធ្វើការពិនិត្យទៅលើសពឃើញថា ស្លាប់ដោយសារលង់ទឹកប្រាកដមែនហើយ ពុំមានស្លាកស្នាមអ្វីគួរឲ្យកត់សម្គាល់ឡើយ ក្រោយពេលពិនិត្យរួចសពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ