ខេត្តកណ្តាល ៖ ក្មេងស្រីម្នាក់ជាមនុស្សវិកលចរិកបានលង់ទឹកស្លាប់ ខណៈដែលដើរទៅលេងជាមួយអ្នកជិតខាង ដែលហេតុការណ៍នេះកើតឡើងនៅវេលាម៉ោង១៤និង៣០នាទីថ្ងៃទី០៩ ខែធ្នូនេះ នៅចំណុចស្រះទឹក ភូមិព្រែកជ្រូក ឃុំបាក់ដាវ ស្រុកខ្សាច់កណ្តាល…
ខេត្តកណ្តាល ៖ ក្មេងស្រីម្នាក់ជាមនុស្សវិកលចរិកបានលង់ទឹកស្លាប់ ខណៈដែលដើរទៅលេងជាមួយអ្នកជិតខាង ដែលហេតុការណ៍នេះកើតឡើងនៅវេលាម៉ោង១៤និង៣០នាទីថ្ងៃទី០៩ ខែធ្នូនេះ នៅចំណុចស្រះទឹក ភូមិព្រែកជ្រូក ឃុំបាក់ដាវ ស្រុកខ្សាច់កណ្តាល ខេត្តកណ្តាល ។
ជនរងគ្រោះឈ្មោះ ជាង វណ្ណរ៉ា ភេទស្រី អាយុ១៤ឆ្នាំ ជនជាតិខ្មែរ មុខរបរនៅផ្ទះ (ជាមនុស្សវិកលចរិក) មានទីលំនៅភូមិឃុំកើតហេតុ (ស្លាប់) ឪពុកឈ្មោះ ជឺន ជាង អាយុ៥០ឆ្នាំ មុខរបរ កសិករ មានទីលំនៅភូមិឃុំកើតហេតុ ។ ម្តាយឈ្មោះ ប៊ុត ស៊ីផន អាយុ៤៥ឆ្នាំ មុខរបរកសិករ មានទីលំនៅភូមិឃុំកើតហេតុ ។
ជនរងគ្រោះមានជម្ងឺប្រចាំកាយវិកលចរិក ហើយនៅថ្ងៃទី០៩ ធ្នូ ២០១៨ វេលាម៉ោង១៣និង៣០នាទី ជនរងគ្រោះបានដើរចេញពីផ្ទះទៅលេងជាមួយក្មេងៗជិតខាងជាច្រើននាក់ នៅផ្ទះ ឈ្មោះ ប៊ុត មុំ ភេទស្រី អាយុ៥៣ឆ្នាំ ត្រូវជាអ៊ុំរបស់ជនរងគ្រោះ ពេលក្មេងៗនាំគ្នាលេងស្រាប់តែបាត់ជនរងគ្រោះទើបឈ្មោះ ប៊ុត មុំ ប្រើឲ្យកូនស្រីខ្លួនឈ្មោះ ហ៊ាង ស្រីនាង និងក្មេងៗជាបងប្អូនឲ្យជួយដើររកជនរងគ្រោះតែរកមិនឃើញ ។ លុះដល់វេលាម៉ោង១៤និង៣០នាទី ថ្ងៃដដែលឈ្មោះ ហ៊ាង ស្រីនាង ដើរទៅដល់ស្រះទឹកខាងជើងផ្ទះឈ្មោះ ប៊ុត មុំ ឃើញសពជនរងគ្រោះអណ្តែតក្នុងទឹកស្រះចម្ងាយពីមាត់ស្រះបីម៉ែត្រឃើញដូច្នេះឈ្មោះ ហ៊ាង ស្រីនាង បានមកតាមហៅឈ្មោះ ប៊ុត មុំ និងឪពុកម្ដាយជនរងគ្រោះឲ្យមកជួយស្រង់ជនរងគ្រោះ ប៉ុន្តែជនរងគ្រោះបានស្លាប់បាត់បង់ជីវិតទៅហើយ រួចក៏បានរាយការណ៍ជូនសមត្ថកិច្ច ។
បន្ទាប់មកសមត្ថកិច្ចផ្នែកបច្ចេកទេសស្រុកសហការជាមួយកម្លាំងនគរបាលប៉ុស្តិ៍ក្រុមប្រឹក្សាឃុំ មេភូមិ គ្រូពេទ្យបានធ្វើការពិនិត្យសាកសពដោយហ្មត់ចត់តាមការពិនិត្យសាកសពមានទឹកហូរចេញតាមមាត់ និងច្រមុះ ពោះប៉ោង ក្រៅពីនេះពុំមានស្លាកស្នាមអ្វីផ្សេងទៀតទេ សពត្រូវបានប្រគល់ជូនក្រុមគ្រួសារធ្វើបុណ្យតាមប្រពៃណី ។ តាមការសន្និដ្ឋាន គឺជនរងគ្រោះពិតជាស្លាប់ដោយសារលង់ទឹកពិតប្រាកដមែន ៕
ចែករំលែកព័តមាននេះ