ខេត្តកំពង់ឆ្នាំង ៖ ជនសង្ស័យប្រុសស្រីចំនួន២០នាក់ ដែលជាអ្នកប្រើប្រាស់ និងជួញដូរថ្នាំញៀនត្រូវបានសមត្ថកិច្ចនគរបាលខេត្តធ្វើការចាប់ខ្លួនជាបន្តបន្ទាប់ ហើយបានធ្វើការបង្ហាញមុខជាសាធារណៈ ដល់អ្នកសារព័ត៌មាន ក្នុង ស្នងការដ្ឋាននគរបាលខេត្តកំពង់ឆ្នាំង កាលពីរសៀលថ្ងៃទី៧…
ខេត្តកំពង់ឆ្នាំង ៖ ជនសង្ស័យប្រុសស្រីចំនួន២០នាក់ ដែលជាអ្នកប្រើប្រាស់ និងជួញដូរថ្នាំញៀនត្រូវបានសមត្ថកិច្ចនគរបាលខេត្តធ្វើការចាប់ខ្លួនជាបន្តបន្ទាប់ ហើយបានធ្វើការបង្ហាញមុខជាសាធារណៈ ដល់អ្នកសារព័ត៌មាន ក្នុង ស្នងការដ្ឋាននគរបាលខេត្តកំពង់ឆ្នាំង កាលពីរសៀលថ្ងៃទី៧ ខែធ្នូឆ្នាំ២០១៨ នេះ។
ស្នងការនគរបាលខេត្តកំពង់ឆ្នាំង លោកឧត្តមសេនីយ៍ទោ ឡុច វណ្ណារ៉ា បានមានប្រសាសន៍ឲ្យដឹងថា ដោយទទួលបានការណែនាំពីអគ្គស្នងការនគរបាលជាតិ ក៍ដូចជាការណែនាំរបស់ គណៈបញ្ជាការឯកភាពខេត្ត សមត្ថកិច្ចនគរបាលបានប្រតិបត្តការចុះបង្ក្រាបបទល្មើសចែកចាយ និងប្រើប្រាស់ថ្នាំញៀន ជាបន្តបន្ទាប់ ដើម្បីទប់ស្កាតការចែកចាយ ការប្រើប្រាស់ ថ្នាំញៀន ដែលតែងតែធ្វើសកម្មភាពចែកចាយ ពង្វក់ ដល់ស្រទាប់យុវជន ជាកូនចៅប្រជាពលរដ្ឋ ទូទាំងខេត្ត ។
ជាកស្តែង ជនសង្ស័យជាអ្នកជួញដូរ និងប្រើប្រាស់ថ្នាំញៀនចំនួន២០នាក់ ក្នុងនោះស្រីចំនួន៤នាក់ ដែលបង្ហាញមុខជាសាធារណៈ ដល់អ្នកសារព័ត៌មាន ក្នុងពេលនេះ គឺត្រូវបានសមត្ថកិច្ចនគរបាលការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្ត សហការជាមួយសមត្ថកិច្ច នគរបាល ស្រុក ក្រុង ធ្វើការចាប់ខ្លួនជាបន្តបន្ទាប់ចាប់ពីថ្ងៃទី៤រហូតដល់ថ្ងៃទី ៦ខែធ្នូ កន្លងទៅនេះ ។
ក្នុងចំណោមជនសង្ស័យទាំង២០នាក់ មាន៥នាក់ជាមេខ្លោងជួញដូរនិងចែកចាយថ្នាំញៀន ក្នុងនោះមាននៅស្រុកទឹកផុសចំនួន២នាក់ ស្រុករលាប្អៀរចំនួន១នាក់ និងក្រុងកំពង់ឆ្នាំង ចំនួន៤នាក់ ចំណែកជនសង្ស័យចំនួន១៥នាក់ទៀតគឺជាអ្នកប្រើប្រាស់ថ្នាំញៀន ដែលចាប់មកពីស្រុកនិងក្រុងទាំង៣ខាងលើនេះ ។
លោកឧត្តមសេនីយ៍ ស្នងការនគរបាលខេត្តកំពង់ឆ្នាំង បានបន្តថា ចំពោះវត្ថុតាងដែលរឹបអូសបានមានថ្នាំញៀនប្រភេទម៉ាទឹកកក (ICE )ចំនួន៩៦កញ្ចប់, ថ្នាំញៀនប្រភេទWY មានចំនួន១៨២គ្រាប់ ម៉ូតូចំនួន២គ្រឿង និងទូរសព្ទ័ដៃចំនួន៤គ្រឿង ។
ជាទិសដៅចំពោះមុខ លោកនឹងដាក់វិធានការក្នុងការបង្ក្រាបគ្រឿងញៀននេះអោយកាន់តែខ្លាំងបន្ថែមទៀត ដោយប្រើវិធានការឆែកឆេអាវុធជាតិផ្ទុះនៅពេលយប់ក៍ដូចជាឆែករកសារធាតុញៀនផងដែរ ។
ក្រៅពីនោះការធ្វើរដ្ឋបាលនៅពេលថ្ងៃ តាមផ្ទះសំណាក់ និងសណ្ឋាគារជាដើម ។ ជាមួយគ្នាដាក់កម្លាំងឃ្លាំមើល អ្នកប្លែកមុខចេញចូលក្នុងមូលដ្ឋាននីមួយៗ និងចំណុចសំខាន់មួយទៀត តាមដានមុខសញ្ញាចាស់ ដែលធ្លាប់ប្រើប្រាស់ និងចែកចាយថ្នាំញៀន ដែលទើបចេញពីពន្ឋនាគារ ។
ជនសង្ស័យទាំង២០នាក់ រួមទាំងវត្ថុតាងខាងលើត្រូវបានសមត្ថកិច្ចនគរបាលរៀបចំកសាងសំណុំរឿងបញ្ជូនទៅតុលាការតាមនីតិវិធី៕
ចែករំលែកព័តមាននេះ