ទីក្រុងហាណូយ ៖ បន្ទាប់ពីបានបំពេញទស្សនកិច្ចផ្លូវការនៅទីក្រុងវៀងច័ន្ទ នៃសាធារណរដ្ឋប្រជាធិបតេយ្យប្រជាមានិតឡាវប្រកបដោយលទ្ធផលផ្លែផ្កាយ៉ាងត្រចះត្រចង់រួចមក នារសៀលថ្ងៃទី៦ ខែធ្នូ ឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន…
ទីក្រុងហាណូយ ៖ បន្ទាប់ពីបានបំពេញទស្សនកិច្ចផ្លូវការនៅទីក្រុងវៀងច័ន្ទ នៃសាធារណរដ្ឋប្រជាធិបតេយ្យប្រជាមានិតឡាវប្រកបដោយលទ្ធផលផ្លែផ្កាយ៉ាងត្រចះត្រចង់រួចមក នារសៀលថ្ងៃទី៦ ខែធ្នូ ឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានបន្ដធ្វើដំណើរចាកចេញពីទីក្រុងវៀងច័ន្ទ ឆ្ពោះទៅបំពេញទស្សនកិច្ចផ្លូវការនៅទីក្រុងហាណូយ សាធារណរដ្ឋសង្គមនិយមវៀតណាម រយៈពេល៣ថ្ងៃបន្តទៀត ចាប់ពីថ្ងៃទី៦ ដល់ថ្ងៃទី៨ ខែធ្នូ ឆ្នាំ២០១៨ និងដើម្បីអញ្ជើញចូលរួមក្នុងពិធីបើកវេទិកាធុរកិច្ចវៀតណាម-កម្ពុជា ។
នៅក្នុងឱកាសបើកវេទិកាដ៏មានសារសំខាន់នេះ សម្ដេចតេជោនាយករដ្ឋមន្ត្រី បានបង្ហាញពីគោលនយោបាយ និងយុទ្ធសាស្ត្រគន្លឹះសំខាន់ៗ ដើម្បីទាក់ទាញចំណាប់អារម្មណ៍អ្នកវិនិយោគវៀតណាមមកបណ្ដាក់ទុនវិនិយោគនៅកម្ពុជាបន្ថែមទៀត ។
សម្តេចតេជោ ហ៊ុន សែន បានថ្លែងថា ៖« សេដ្ឋកិច្ចកម្ពុជាក្នុងឆ្នាំ២០១៨ត្រូវបានប៉ាន់ស្មានថានឹងមានកំណើនក្នុងអត្រា៧,៣% ហើយសម្រាប់ពេលមធ្យមខាងមុខ កម្ពុជាអាចរក្សាបានអត្រាកំណើនប្រមាណ៧% ក្នុង១ឆ្នាំ »។ សម្ដេចតេជោបន្ដថា ៖« កំណើនសេដ្ឋកិច្ចខ្ពស់នេះបានធ្វើឲ្យកម្ពុជាម្រេចបានឋានៈជាប្រទេសមានចំណូលមធ្យមកម្រិតទាបនៅឆ្នាំ២០១៥ និងស្ថិតនៅលើគន្លងនៃការឈានទៅសម្រេចបាននូវឋានៈជាប្រទេសមានចំណូលមធ្យមកម្រិតខ្ពស់នៅត្រឹមឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០ »។ សម្ដេចតេជោ ហ៊ុន សែន បានបន្ដទៀតថា ដើម្បីសម្រេចនូវគោលបំណងខាងលើ និងស្របតាមយុទ្ធសាស្ត្រចតុកោណដំណាក់កាលទី៤ រាជរដ្ឋាភិបាលកម្ពុជាបានដាក់ចេញ និងអនុវត្តនូវ «គោលនយោបាយអភិវឌ្ឍន៍វិស័យឧស្សាហកម្មកម្ពុជា ២០១៥-២០២៥» សំដៅកែប្រែរចនាសម្ព័ន្ធឧស្សាហកម្មកម្ពុជាពីឧស្សាហកម្មអតិពលកម្មទៅជាឧស្សាហកម្មផ្អែកលើជំនាញនៅរង្វង់ឆ្នាំ២០២៥ ។
សម្តេចតេជោនាយករដ្ឋមន្ត្រី បានគូសបញ្ជាក់ថា តាមរយៈការអនុវត្តគោលនយោបាយអភិវឌ្ឍន៍ឧស្សាហកម្មកម្ពុជា ២០១៥-២០២៥ រាជរដ្ឋាភិបាលបានដាក់ចេញនូវវិធានការមុខស្រួចប្រកបដោយភាពជាក់ស្តែង និងប្រាកដនិយមមួយចំនួនដូចជា ៖ ១- រាជរដ្ឋាភិបាលបាននឹងកំពុងជំរុញការសម្របសម្រួលពាណិជ្ជកម្ម ដោយត្រៀមដាក់ឲ្យអនុវត្តនូវបញ្ជរចេញចូលតែមួយ, ធ្វើសាមញ្ញកម្ម និងស្វ័យប្រវត្តិកម្មនីតិវិធីគយទាំងលើការកំណត់ថ្លៃ និងការបញ្ចេញទំនិញ, កាត់បន្ថយនូវថ្លៃសេវាទាំងផ្លូវការ និងមិនផ្លូវការនានា និងកែសម្រួលនូវស្ថាប័នតាមមាត់ច្រកទ្វារអន្តរជាតិ និងកំពង់ផែអន្តរជាតិ ដើម្បីសម្រួល និងពន្លឿនដល់ការនាំចេញនិងនាំចូល ។ ២- នៅលើការតភ្ជាប់ផ្នែកទន់ រាជរដ្ឋាភិបាលកំពុងរៀបចំផែនការមេស្តីពីវិស័យឡូជីស្ទីកនិងបានបង្កើតការវិនិយោគលើហេដ្ឋារចនាសម្ព័ន្ធរូបវ័ន្តដោយពង្រីកផ្លូវជាតិទាំងអស់ឲ្យទៅជា៤គន្លង ជាពិសេសផ្លូវជាតិដែលភ្ជាប់ទៅប្រទេសជិតខាង, កសាងកំពង់ផែសមុទ្រទឹកជ្រៅរហូតដល់ជម្រៅទឹក១៤ម៉ែត្រ និងកសាងផ្លូវល្បឿនលឿន (Expressway)ពីភ្នំពេញទៅកំពង់ផែអន្តរជាតិ ដែលការកសាងទាំងនេះ នឹងសម្រេចរួចរាល់ក្នុងពេលឆាប់ៗខាងមុខ ។
៣- ពាក់ព័ន្ធនឹងថ្លៃអគិ្គសនី រាជរដ្ឋាភិបាលបានសម្រេចថា ថ្លៃអគ្គិសនីនឹងត្រូវបញ្ចុះបន្ថែមទៀតជាបណ្តើរៗចាប់តាំងពីឆ្នាំ២០១៩នេះតទៅ ក៏ដូចធ្វើឲ្យប្រសើរឡើងនូវស្ថិរភាពនៃការផ្គត់ផ្គង់ដើម្បីលើកកម្ពស់ភាពទាក់ទាញការវិនិយោគនៅក្នុងឧស្សាហកម្មផលិតកម្មដែលមានតម្លៃបន្ថែមខ្ពស់, ឧស្សាហកម្មប្រើប្រាស់ម៉ាស៊ីនទំនើប និងការផ្សារភ្ជាប់ជាមួយនឹងខ្យែសង្វាក់តម្លៃក្នុងតំបន់ ។
៤- រាជរដ្ឋាភិបាលកំពុងរៀបចំបង្កើតធនាគារSME និងអនុវត្តគោលនយោបាយជំរុញការអភិវឌ្ឍសហគ្រាសធុនតូច និងមធ្យម ដើម្បីលើកកម្ពស់វិស័យSMEs ជាក្បាលម៉ាស៊ីនសម្រាប់កំណើនសេដ្ឋកិច្ច និងគាំទ្រដល់ខ្សែសង្វាក់ផលិតកម្ម និងសេវាកម្ម រួមទាំងបានរៀបចំមូលនិធិគម្រោងអភិវឌ្ឍន៍សហគ្រិនភាពកម្ពុជា ។
ទន្ទឹមនេះដែរ ដើម្បីឆ្លើយតបទៅនឹងតម្រូវការថ្មីៗរបស់វិនិយោគិន ស្របតាមការប្រែប្រួលនៃរចនាសម្ព័ន្ធសេដ្ឋកិច្ច រាជរដ្ឋាភិបាលកំពុងបញ្ចប់វិសោធនកម្មច្បាប់ស្តីពីវិនិយោគ, អនុម័តច្បាប់ស្តីពីតំបន់សេដ្ឋកិច្ចពិសេស និងធ្វើទំនើបកម្មប្រព័ន្ធពន្ធដារ ដោយគិតគូរបន្ថែមផ្តល់ការលើកទឹកចឹត្តឆ្លាតវៃ, ការបណ្តុះបណ្តាល, ការប្រើប្រាស់ម៉ាស៊ីន និងបច្ចេកវិទ្យាទំនើប ។បន្ថែមពីលើវិធានការមុតស្រួច និងជាក់ស្តែង សម្តេចតេជោក៏បានរំលេចផងដែរថា រាជរដ្ឋាភិបាលបានដាក់ចេញ និងសូមជំរាបជូនធុរជន និងអ្នកវិនិយោគទាំងអស់អំពីសក្តានុពលវិនិយោគ និងឧត្តមភាពសំខាន់ៗរបស់កម្ពុជាដូចជា ភាពអំណោយផលនៃស្ថិរភាពនយោបាយនិងម៉ាក្រូសេដ្ឋកិច្ច ។ កម្ពុជាស្ថិតនៅលើទីតាំងជាយុទ្ធសាស្ត្រក្នុងតំបន់អាស៊ានដែលតំបន់នេះបាននឹងកំពុងក្លាយជា «រោងចក្រអាស៊ី» ហើយម្យ៉ាងទៀត កម្ពុជាក៏ស្ថិតនៅចំណុចកណ្តាលនៃតំបន់មេគង្គដែលជាតំបន់មានកំណើនសេដ្ឋកិច្ចនិងការតភ្ជាប់ខ្ពស់ជាងគេ ។ កម្លាំងពលកម្មដែលមានភាពសម្បូរបែប និងវ័យក្មេងដែលក្នុងនោះប្រជាជនដែលមានអាយុត្រឹម៣៥ឆ្នាំចុះមានចំនួនដល់ទៅ៧២%នៃប្រជាជនសរុប គួបផ្សំនឹងការកើនឡើងនៃចំនួនប្រជាជនដែលមានចំណូលមធ្យម និងជាវណ្ណៈកណ្តាល និងបង្កើតកាលានុវត្តភាពសម្រាប់កម្ពុជា ។
កម្ពុជាបានបើកចំហសេដ្ឋកិច្ចរបស់ខ្លួនសម្រាប់អ្នកវិនិយោគទាំងអស់ដោយគ្មានការរើសអើងរវាងអ្នកវិនិយោគកម្ពុជានិងអ្នកវិនិយោគបរទេសនោះទេ ។ ទំនិញផលិតនៅកម្ពុជាមិនមែនផ្គត់ផ្គង់សម្រាប់តែទីផ្សារនៅកម្ពុជាដែលមានប្រជាជនប្រមាណតែជាង១៥លាននាក់ប៉ុណ្ណោះទេ ប៉ុន្តែអាចផ្គត់ផ្គង់ទៅក្នុងទីផ្សារអនុតំបន់មេគង្គដែលមានអតិថិជនប្រមាណ២៥០លាននាក់, ទីផ្សារអាស៊ានដែលមានអតិថិជនប្រមាណ៦៣០លាននាក់, និងទីផ្សារនៅក្នុងតំបន់នៃកិច្ចព្រមព្រៀងភាពជាដៃគូសេដ្ឋកិច្ចទូលំទូលាយតំបន់ ( RCEP) ដែលមានអតិថិជនប្រមាណ៣ប៊ីលាននាក់ ព្រមទាំងលទ្ធភាពចូលទីផ្សារធំដទៃទៀតក្នុងពិភពលោក ។ កម្ពុជា និងវៀតណាម បានចុះកិច្ចព្រមព្រៀងស្ដីពីការជៀសវាងការយកពន្ធត្រួតគ្នា និងការបង្ការការកិបកេងបន្លំពាក់ព័ន្ធនឹងពន្ធលើប្រាក់ចំណូលនៅថ្ងៃទី៣១ មីនា ឆ្នាំ២០១៨ នៅទីក្រុងហាណូយ ។
នៅក្នុងឱកាសនោះដែរ លោក ង្វៀន សួនហ្វ៊ុក នាយករដ្ឋមន្ត្រីនៃប្រទេសវៀតណាម មានប្រសាសន៍ថា អ្វីដែលប្រមុខដឹកនាំរដ្ឋាភិបាលនៃប្រទេសទាំងពីរបានសន្យារួមគ្នានឹងជំរុញកំណើនពាណិជ្ជកម្មនៃប្រទេសទាំងពីរឲ្យកើនដល់៥ពាន់លានដុល្លារនៅឆ្នាំ២០២០នោះ គឺអ្វីៗនឹងសម្រេចបានដោយសារពេលនេះ យើងបានសម្រេចបាននូវទំហំពាណិជ្ជកម្មប្រមាណជិត៤ពាន់លានដុល្លារហើយនៅក្នុងឆ្នាំ២០១៨នេះ ។
លោករដ្ឋមន្ត្រីបន្ដថា ៖« បច្ចុប្បន្ននេះ វៀតណាមមានគម្រោងវិនិយោគថ្មីចំនួន២០៦ក្នុងប្រទេសកម្ពុជាដែលមានទុនវិនិយោគប្រមាណជាង៣ពាន់លានដុល្លារ និងមានគម្រោងជាច្រើនទៀតក្នុងការចូលរួមចំណែកអភិវឌ្ឍន៍សេដ្ឋកិច្ចប្រទេសកម្ពុជា »។
ប្រទេសទាំងពីរ វៀតណាម-កម្ពុជា មានទំនាក់ទំនងល្អនឹងគ្នាជាយូរលង់ណាស់មកហើយ ហើយនៅឆ្នាំ២០១៨នេះ គឺជាខួបលើកទី៥១នៃការបង្កើតទំនាក់ទំនងការទូតរវាងប្រទេសទាំងពីរ ។
កាលពីឆ្នាំ២០១៧ ពាណិជ្ជកម្មទ្វេភាគីនៃប្រទេសទាំងពីរ សម្រេចបានទំហំទឹកប្រាក់ប្រមាណ២,១៣ពាន់លានដុល្លារ កើនឡើងប្រមាណ៣០% បើធៀបនឹងឆ្នាំ២០១៦ ។ ទោះបីយ៉ានេះក្ដី ការនាំចេញពីកម្ពុជាទៅកាន់ប្រទេសវៀតណាមនៅមានទំហំតូចនៅឡើយ។ ជាក់ស្តែង ការនាំចេញរបស់កម្ពុជាទៅវៀតណាមក្នុងឆ្នាំ២០១៧ មានចំនួន៣៤២លានដុល្លារ បើធៀបនឹងការនាំចូលរបស់កម្ពុជាពីវៀតណាម ក្នុងឆ្នាំ២០១៧ មានចំនួនប្រមាណ១,៨ពាន់លានដុល្លារ ។
នៅក្នុងក្របខ័ណ្ឌនៃការវិនិយោគផ្ទាល់ពីវៀតណាម រហូតដល់ខែវិច្ឆិកា ឆ្នាំ២០១៨ ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគរបស់ក្រុមហ៊ុនវៀតណាមចំនួន៧៥ គម្រោង ក្នុងទុនវិនិយោគសរុបចំនួនប្រមាណ ២,៤ពាន់លានដុល្លារ ដែលផ្តោតសំខាន់លើវិស័យកសិកម្ម និងហេដ្ឋារចនាសម្ព័ន្ធ ៕
ចែករំលែកព័តមាននេះ