រាជធានីភ្នំពេញ ៖ បុរសម្នាក់បានធ្វើអត្តឃាតដោយចងកសម្លាប់ខ្លួន ហើយត្រូវបានអ្នកភូមិប្រទះឃើញបង្កឲ្យមានការ ភ្ញាក់ផ្អើលកាលពីវេលាម៉ោង១២ថ្ងៃត្រង់ថ្ងៃទី៨ ខែធ្នូ ឆ្នាំ២០១៨ ស្ថិតនៅក្នុងផ្ទះល្វែងទុកចោលមួយកន្លែង តាមផ្លូវសហព័ន្ធរុស្សី ទល់មុខអាកាសយានដ្ឋានអន្តរជាតិភ្នំពេញ ស្ថិតនៅក្នុងភូមិក្បាលដំរី១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះដែលស្លាប់ឈ្មោះ អេង ម៉ក់ ភេទប្រុស អាយុ៤៩ឆ្នាំ ជាបុគ្គលិកសន្តិសុខ GKS ប៉ុន្តែទើបចូលបម្រើការងារបានមួយយប់ប៉ុណ្ណោះ មានស្រុកកំណើត នៅក្នុងភូមិគួយជីកដី ឃុំរបស់មង្គល ស្រុកមោងឫស្សី ខេត្តបាត់ដំបង ។មានប្រពន្ធ និងកូនស្រី២នាក់ជាកម្មកររោងចក្រ ស្នាក់នៅក្នុងសង្កាត់ព្រែកព្នៅ ខណ្ឌព្រែកព្នៅ ។
តាមប្រភពព័ត៌មានពីមិត្តរួមការងាររបស់ជនរងគ្រោះបានឲ្យដឹងថា ជនរងគ្រោះខាងលើគឺជាអតីតបុគ្គលិកក្រុមហ៊ុនសន្តិសុខខាងលើ ដែលកន្លងមកធ្លាប់បម្រើការងារក្នុងក្រុមហ៊ុនសន្តិសុខ GKS ប៉ុន្តែគាត់បានសុំឈប់ទៅវិញ ដោយសារតែគាត់មានជម្ងឺក្រពះធ្ងន់ធ្ងរ។លុះមុនពេលជនរងគ្រោះធ្វើអត្តឃាតដោយចងកសម្លាប់ខ្លួន១ថ្ងៃ គឺនៅថ្ងៃទី៧ ខែធ្នូ ឆ្នាំ២០១៨ ស្រាប់តែឃើញជនរងគ្រោះត្រឡប់ទៅជួបតំណាងក្រុមហ៊ុន ហើយសុំចូលបម្រើការងារវិញ ។
ប្រភពដដែលបានបន្តថា ពេលនោះមើលទៅជនរងគ្រោះហាក់មានសុខភាពមិនសូវល្អនោះទេ តែ ដោយ
សារមានការអាណិតអាសូរ ទើបតំណាងក្រុមហ៊ុនបានទទួលយកជនរងគ្រោះឲ្យចូលធ្វើការវិញ ។ លុះនៅវេលាយប់ថ្ងៃដដែល ជនរងគ្រោះរួមជាមួយមិត្តភក្ដិរួមការងារម្នាក់ទៀតបានទៅដេកយាមនៅចំណុចកើតហេតុខាងលើ ហើយមិនមាននរណានឹកស្មានថាគាត់ចងកសម្លាប់ខ្លួនបែបនេះឡើយ។
ប្រភពដដែលបានបន្តថា រហូតដល់ វេលាម៉ោង១២ថ្ងៃត្រង់ ថ្ងៃទី៨ ខែធ្នូ ឆ្នាំ២០១៨ ទើបត្រូវបានជនជាតិចិនម្នាក់ ព្រមទាំងអ្នកបកប្រែភាសាចិនម្នាក់ទៀត ដែលស្នាក់នៅក្នុងសណ្ឋាគារក្បែរនោះប្រទះឃើញជនរងគ្រោះចងកសម្លាប់ខ្លួន ក៏បានស្រែកប្រាប់សន្តិសុខឲ្យទៅមើល បង្កឲ្យមានការភ្ញាក់ផ្អើល ហើយសន្តិសុខបានស្រាយចំណងដាក់ចុះមកក្រោមក្នុងបំណងនាំជនរងគ្រោះយកទៅសង្គ្រោះបន្ទាន់ដែរ ប៉ុន្តែហួសពេលទៅហើយ ព្រោះជនរងគ្រោះបានស្លាប់មិនតាំងពីពេលណានោះទេ។
បន្ទាប់មកបានរាយការណ៍ជូននគរបាលចុះទៅពិនិត្យ និងធ្វើកោសល្យវិច័យ ហើយក្រោយការពិនិត្យរួច សពត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី៕
ចែករំលែកព័តមាននេះ