ខេត្តកំពង់ឆ្នាំង ៖ ឈើអារច្រើនប្រភេទដែលគេអារជាបន្ទះមានទំហំ និងប្រវែងប៉ុនៗគ្នាមានប្រមាណជាង២០ ម៉ែត្រគូបដឹកតាមរថយន្តពីរគ្រឿង ត្រូវបានមន្ត្រីធ្វើការស្ទាក់ចាប់បាន កាលពីវេលាម៉ោង១១និង៣០នាទីយប់ ថ្ងៃទី០៦ ខែធ្នូ ឆ្នាំ២០១៨ នៅចំណុចភូមិឈូកក្រញាស់ ឃុំឈូកស ស្រុកកំពង់ត្រឡាច ខណៈ ដែលរថយន្តទាំង២គ្រឿង ព្យាយាមបើកតាមផ្លូវជាតិលេខ៥ បន្លំសមត្ថកិច្ច ។
លោក ឯម វិចិត្រ ប្រធានផ្នែករដ្ឋបាលព្រៃឈើស្រុកកំពង់ត្រឡាចបាននិយាយឲ្យដឹងថា ដោយទទួលបានព័ត៌មានថា មានរថយន្តពីរគ្រឿងជាប្រភេទរថយន្តឃ្លុបបិទជិតបានដឹកឈើឆ្លងកាត់ស្រុកកំពង់ត្រឡាច លោកបានដឹកនាំមន្ត្រីជំនាញសហការជាមួយនគរបាលប៉ុស្តិ៍រដ្ឋបាលឃុំឈូកស និងនគរបាលស្រុកកំពង់ត្រឡាចស្ទាក់ចាប់បានរថយន្តទាំងពីរគ្រឿងខាងលើនៅចំណុច ភូមិឈូកក្រញាស់ ឃុំឈូកស ស្រុកកំពង់ត្រឡាចនៅវេលាម៉ោងជាង១១យប់ ហើយក៏បានយកមកកាន់ផ្នែករដ្ឋបាលព្រៃឈើ ដើម្បីរក្សាទុកជាបណ្ដោះអាសន្នរង់ចាំការត្រួតពិនិត្យនៅពេលព្រឹកឡើង ។
នាយផ្នែករដ្ឋបាលព្រៃឈើកំពង់ត្រឡាចបានបន្តថា នៅវេលាម៉ោង៩ព្រឹក ថ្ងៃទី០៧ ខែធ្នូ នេះ សមត្ថកិច្ចជំនាញក៏បានធ្វើការកាក់ស៊ី ឃ្លុបរថយន្ត ដើម្បីធ្វើការឆែកឆេរ ហើយក៏បានឃើញឈើជាប្រភេទឈើក្រហម ឈើស ច្រើនប្រភេទដែលគេប្រើជាបន្ទះៗមានទំហំ៤ហ៊ុន គុណនឹង៩ហ៊ុន ប្រវែង៣ម៉ែត្រ មានចំនួន១០៨៥សន្លឹក ក្នុងមួយរថយន្តស្មើគ្នាទាំងពីររថយន្ត ។ រថយន្តទាំងពីរគ្រឿងមានរថយន្តទី១ ម៉ាកហ៊ីយ៉ាន់ដាយ ពាក់ស្លាកលេខភ្នំពេញ 3D- 5134 ចំណែកមួយរថយន្តទៀតម៉ាកហ៊ីយ៉ាន់ដាយដូចគ្នា ពាក់ស្លាកលេខភ្នំពេញ 3A- 23 24 ។
លោក ឯម វិចិត្រ បានបញ្ជាក់ថា ឈើទាំងពីររថយន្តមួយមានចំនួន២៣,៣២៨ ម៉ែត្រគូប ។ ក្រោយធ្វើការវាស់វែងសមត្ថកិច្ចជំនាញរបស់លោកនឹងកសាងសំណុំរឿងបញ្ជូនទៅតុលាការតាមផ្លូវច្បាប់ ។ តាមច្បាប់ស្ដីពីការដឹកជញ្ជូនផលអនុផលព្រៃឈើម្ចាស់រថយន្តដឹកឈើខាងលើត្រូវបានចូលមកបង់ផាកពិន័យ ដើម្បីយករថយន្តទៅត្រឡប់ទៅវិញ ក្នុងរយៈពេល១ខែ ប៉ុន្តែឈើទាំងអស់ត្រូវបានដកហូតជាសម្បត្តិ រដ្ឋ ៕
ចែករំលែកព័តមាននេះ