ពាក្យសច្ចៈហ្នឹងឯងជារស់ឆ្ងាញ់ជាងរសនានា។ សច្ចៈបានសេចក្តីថាដូចម្តេច? បានដល់អ្វីខ្លះ?
សច្ចៈបានសេចក្តីថា ពាក្យទៀងទាត់ ពាក្យពិតត្រង់ ពាក្យមិនប្រែប្រួល បានដល់ការនិយាយពាក្យពិត ធ្វើតាមការងារពិត ពាក្យពិត ការងារពិតនេះ ជារស់ញុំាងប្រយោជន៍ឱ្យសម្រចជាងរស់ទាំងឡាយមានរស់ជូរ ប្រៃ ផ្អែមជាដើម ។
សមដូចបទសុភាសិតត្រាស់ថាៈ សច្ចំ វេ អមតា វាចា ឯស ធម្មោ សនន្តនោ សច្ចេ អត្ថ ច ធម្មេ ច អាហុ សន្តោ បតិដ្ឋិតា។ ប្រែថា វចីសច្ចៈជាវាចាមិនស្លាប់ពិត វចីសច្ចៈនេះជាធម៌គឺអ្នកប្រាជ្ញទាំងឡាយ តែងសន្សំហើយពីមុនៗមក អ្នកប្រាជ្ញទាំងឡាយមានព្រះពុទ្ធជាដើម តែងស្ថិតនៅក្នុងសច្ចធម៌គឺធម៌ជាប្រយោជន៍ខ្លួនផង និងប្រយោជន៍អ្នកដទៃផង តាមធម្មតាមិនឃ្លៀងឃ្លាតឡើយ ។
ក៏ពាក្យថា វាចាមិនស្លាប់នេះឯង ជាគ្រឿងសម្តែងសេចក្តីល្អរបស់ពាក្យសច្ចៈឱ្យច្បាស់លាស់ ជាវាចាធ្វើឱ្យសម្រេចប្រយោជន៍គ្រប់ប្រការ បើទុកណាជាបុគ្គលអ្នកពោលនោះស្លាប់ហើយក្តី វាចារបស់គេនោះក៏មិនចេះស្លាប់ រមែងមានអ្នកលើកតម្កើងឱ្យសព្ទសាធុការពរ អស់កាលជានិច្ចជានិរន្តរ៍តរៀងទៅ ដូចយ៉ាងទ្រឹស្តីព្រះពុទ្ធសាសនារបស់ព្រះបរមគ្រូជាម្ចាស់នៃយើងទាំងឡាយនេះជាវាចាមិនស្លាប់ពិត ។
ចែករំលែកព័តមាននេះ