រាជធានីភ្នំពេញ ៖ អតីតតារាចម្រៀងអ្នកស្រី ឃុន វណ្ណា បានខិតខំរកវិធីជ្រោងកូនប្រុសពៅឲ្យក្លាយជាតារាចម្រៀងល្បីឈ្មោះ ។ អ្នកស្រីឃុន វណ្ណា និងកូនប្រុសដែលរស់នៅកាណាដា បានមកស្រុកខ្មែរជាងមួយខែហើយ ។
អ្នកស្រីឃុន វណ្ណា នាំកូនប្រុសដែលមានទឹកដមសំឡេងល្អថតចម្រៀងទុកជាឯកសារ និងសាងកេរ្តិ៍ឈ្មោះនៅកម្ពុជា ។ កូនប្រុសម្នាក់នេះជាបុគ្គលឆ្នើមម្នាក់ដែលប្រឡងចម្រៀងយកឈ្នះកុមារបរទេសជាច្រើនក្នុងកម្មវិធីលំដាប់ពិភពលោកThe Voice Kids Canada 2016 ។
ជំនួបកាលពីថ្ងៃទី៤ ធ្នូ ឆ្នាំ២០១៨ក្នុងពិធីជួបជុំញាំបាយសាមគ្គីដើម្បីត្រឡប់ទៅប្រទេសកាណាដាវិញ អ្នកស្រីឃុន វណ ្ណា ឲ្យដឹងថាអ្នកស្រីនិងកូនប្រុសមកលេងស្រុកលើកនេះពិតជាមានស្នាមអនុស្សាវរីយ៍ ល្អៗដក់ជាប់ក្នុងចិត្តរហូតកូនប្រុសហាក់មានចិត្តចង់រស់នៅស្រុកខ្មែរមិនចង់ទៅស្រុកគេវិញទេ ។ ១ខែជាងនេះអ្នកស្រីបាននាំកូនចូលរួមក្នុងកម្មវិធីសិល្បៈដូចជាឡើងសម្តែងតាមស្ថានីយទូរទស្សន៍មួយចំនួននិងបានថតចម្រៀងចូលសុីឌីទុកជាចំណងដៃ ។
មកលើកនេះអ្នកស្រីឃុន វណ្ណា មានផែនការថតចម្រៀងមួយអាល់ប៊ុមដោយមានបទចម្រៀងតែងនិពន្ឋថ្មី និងបទបែបបរទេសច្រៀងដោយកូនប្រុស គឺយុវជនឃុន អេនឌី។ ថតទាំងអស់ជាង១០បទ ។ «ក្នុងចំណោមបទទាំងអស់នោះមានបទខ្មែរ២ទៅ៣បទ រំពឹងថាល្បីព្រោះសំឡេងកូនច្រៀងទៅធ្វើឲ្យក្រុមការងារភ្ញាក់ផ្អើល ហើយលាន់មាត់ថាពីរោះអាចយកជាការបាន ។ បទនោះមាន«ក្រុមស្រុកយើង»និងបទ«ស្រុកខ្មែរដួងចិត្ត» ព្រមទាំងបទពីដើមច្រៀងឡើងវិញដូចជាបទ«សក់ក្រង» «នឹកឃើញទាំងអស់»ជាដើម»។
អ្នកស្រីឃុន វណ្ណា និយាយថា«គោលបំណងធំបំផុតរបស់ខ្ញុំមកលើកនេះដូចជាការទុកឯកសារនៅក្នុងស្រុកដែរព្រោះបានយកកូនមកសម្តែងនៅស្រុកកំណើតលើវេទិកាសិល្បៈខ្មែរដើម្បីឲ្យគេដឹងថាយើងមានស្នាដៃក្នុងប្រទេសដែលជាដើមកំណើតម្តាយ ។ ម្យ៉ាងទៀតចិត្តចង់ឲ្យកូនល្បីចេញពីកម្ពុជាមានបទចម្រៀងផ្ទាល់ខ្លួនហើយទាំងក្នុង និងក្រៅស្រុកស្គាល់ពោលចង់បានលំអានដូចរៀមច្បង មុនៗ។ ខ្ញុំនឹងព្យាយាមបង្ហាត់កូនឲ្យបានល្អលើផ្នែកចម្រៀងហើយមិននឹកថាកូនគេស្រឡាញ់រហូតចង់ស្នងត្រកូលឃុនឲ្យល្បីបែបនេះទេ»។
យុវជនឃុន អេនឌី ជាលើកទី១ដែលបានមកស្រុកខ្មែរ ។ គេនិយាយថា«និយាយពីចិត្តវិញគឺចង់នៅទឹកដីនេះណាស់ គ្មានចង់ត្រឡប់ទៅវិញទេព្រោះមានរបស់ញ៉ាំ ឆ្ងាញ់ៗ កន្លែងស្អាតៗ ពិសេសនៅតំបន់ប្រាសាទអង្គរវត្ត ។
ខ្ញុំកើតនៅកាណាដា តែម្តាយគាត់បង្ហាត់និយាយខ្មែរច្រើនរហូតអាចប្រើការបាន ។ ក្រៅពីនេះអាចនិយាយភាសាអង់គ្លេស បារាំងនិងអេស្ប៉ាញ »។
អ្នកស្រីឃុន វណ្ណា មានស្រុកកំណើតនៅខេត្តតាកែវ ជាអតីតតារាចម្រៀងដៃគូលោកប៊ុន ចាន់ថន ។ អ្នកស្រីវណ្ណា បានចាកចេញទៅរស់នៅប្រទេសកាណាដា ច្រើនឆ្នាំមកហើយ ៕
ចែករំលែកព័តមាននេះ