រាជធានីភ្នំពេញ ៖ រថយន្តមួយគ្រឿងដែលបើកបរដោយបុរសម្នាក់ក្នុងស្ថានភាពស្រវឹងជោកបានរេចង្កូតបុកទ្វារដែករបងហាងកាហ្វេយីហោ «ធីវ៉ាយកាហ្វេ» បណ្តាលឱ្យរងការខូចខាតក្រពិតរួញអស់២ផ្ទាំង ក្រោយកើតហេតុអ្នកបើកបរថយន្តរត់គេចខ្លួនបាត់ស្រមោល តែម្ចាស់ហាងឃាត់ខ្លួនមិត្តភក្តិម្នាក់ដែលជាអ្នករួមដំណើរ ។
ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង១០និង១៥នាទីយប់ថ្ងៃទី០៨ ខែធ្នូឆ្នាំ ២០១៨ នៅទីតាំងហាងកាហ្វេយីហោ «ធីវ៉ាយកាហ្វេ» ស្ថិតនៅតាមផ្លូវលេខ១៣៨ សង្កាត់ទឹកល្អក់ទី១ ខណ្ឌទួលគោក។
រថយន្តខាងលើម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ ២Z-១៣៧៦ អ្នកបើកបរមិនត្រូវបានគេស្គាល់អត្តសញ្ញាណ ក្រោយកើតហេតុបានរត់គេចខ្លួនបាត់ បន្សល់ទុកតែមិត្តភក្តិរួមដំណើរម្នាក់មិនស្គាល់ឈ្មោះនៅកន្លែងកើតហេតុ ។ ចំណែកឯម្ចាស់ទីតាំងខាលើមិនត្រូវបានស្គាល់ឈ្មោះនោះឡើយ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេបានឃើញរថយន្តខាងលើជិះគ្នា២នាក់ធ្វើដំណើរតាមផ្លូវ១៣៨ ក្នុងទិសដៅពីកើតទៅលិច លុះពេលធ្វើដំណើរមកដល់កន្លែងកើតហេតុ ក៏រេចង្កូតទៅស្តាំដៃជ្រុលទៅបុកទ្វាររបងដែកហាងកាហ្វេខាងលើ បណ្តាលឱ្យរងការខូចខាតក្រពិតរួញអស់ផ្ទាំង ចំណែករថយន្តបានរងការខូចបែកស្តុបមុខ និងកាងមុខ។
ប្រភពបន្តទៀតថា ក្រោយកើតហេតុ គេឃើញអ្នកបើកបររថយន្តបើកទ្វាររថយន្តរត់គេចខ្លួនបាត់ បន្សល់ទុកតែមិត្តភក្តិដែលជាអ្នករួមដំណើរម្នាក់មកសម្របសម្រួលជាមួយម្ចាស់ផ្ទះខាងលើ តែម្ចាស់ហាងទាមទារសំណងចំនួន៨០០ដុល្លារ ការចរចាគ្នាយ៉ាងយូរទើបព្រមព្រៀងគ្នា ដោយភាគីខាងរថយន្តសងម្ចាស់ហាងចំនួន៥០០ដុល្លារដើម្បីបញ្ចប់រឿងនៅកន្លែងកើតហេតុ៕
ចែករំលែកព័តមាននេះ