រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងគ្មានការបោះឆ្នោតឡើងវិញ ដូចអ្វីដែលក្រុមប្រឆាំងចង់បាននោះទេ គឺការបោះឆ្នោតនឹងត្រូវធ្វើឡើងតាមច្បាប់ធម្មនុញ្ញកំណត់ ។ ការលើកឡើងរបស់អ្នកនាំពាក្យគណបក្សកាន់អំណាចនេះ…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងគ្មានការបោះឆ្នោតឡើងវិញ ដូចអ្វីដែលក្រុមប្រឆាំងចង់បាននោះទេ គឺការបោះឆ្នោតនឹងត្រូវធ្វើឡើងតាមច្បាប់ធម្មនុញ្ញកំណត់ ។
ការលើកឡើងរបស់អ្នកនាំពាក្យគណបក្សកាន់អំណាចនេះ បន្ទាប់ក្រុមប្រឆាំង ពិសេសនោះលោក សម រង្ស៊ី តែងតែចង់ឲ្យមានការបោះឆ្នោតឡើងវិញ ដោយមានគណបក្សសង្គ្រោះជាតិចូលរួមជាច្រើនលើកមកហើយ ។ យ៉ាងណាក្តីមិញលោក សុខ ឥសាន បានឲ្យដឹងតាមប្រព័ន្ធតេឡេក្រាម នៅថ្ងៃទី៩ ធ្នូថា ការបោះឆ្នោតសកលដែលបានប្រព្រឹត្តទៅ កាលពីថ្ងៃទី២៩ ខែកក្កដា ឆ្នាំ២០១៨នេះបានដំណើរការប្រកបដោយលទ្ធិប្រជាធិបតេយ្យដោយមានប្រជាពលរដ្ឋទៅចូលរួមបោះឆ្នោតរហូតដល់ទៅជាង៨៣ភាគរយមានគណបក្សនយោបាយប្រកួតប្រជែងចំនួន២០គណបក្សដែលបញ្ជាក់ច្បាស់ពីប្រជាធិបតេយ្យសេរីពហុបក្ស ប្រជាពលរដ្ឋបានសម្តែងឆន្ទៈគាំទ្រគ្រប់គណបក្សទាំងអស់ ដោយសម្លេងខុសៗគ្នាតិច និងច្រើន ។
លោកបន្តថា ការបោះឆ្នោតកន្លងមកមានអ្នកសង្កេតការណ៍ជាតិអន្តរជាតិជាង៨ម៉ឺននាក់វាយតម្លៃសន្និដ្ឋានថា ដំណើរការបោះឆ្នោតមានលក្ខណៈល្អសេរីត្រឹមត្រូវ និងយុត្តិធម៌គ្មានអំពើហិង្សាមានសណ្តាប់ធ្នាប់របៀបរៀបរយល្អប្រជាពលរដ្ឋមានវិន័យខ្ពស់ ។ សរុបមកការបោះ ឆ្នោតបានដំណើរការល្អជាងនៅបណ្តាប្រទេសលើពិភពលោកទៅទៀត ។ ចេញពីការបោះ ឆ្នោតនេះក្បាលម៉ាស៊ីនរដ្ឋសភា និងរាជរដ្ឋាភិបាលកម្ពុជាបានប្រសូតឡើងស្របតាមគោល ការណ៍ច្បាប់រដ្ឋធម្មនុញ្ញ ហើយត្រូវបានស្វាគមន៍ និងអបអរសាទរពីគ្រប់មជ្ឈដ្ឋានជាតិអន្តរជាតិមានសារអបអរគាំទ្រ ហើយប្រមុខរាជរដ្ឋាភិបាលថ្មីនីតិកាលទី៦ត្រូវបានអន្តរជាតិអញ្ជើញ ទៅចូលរួមនៅបណ្តាវេទិកាពិភពលោកធំៗជាបន្តបន្ទាប់ កិត្យានុភាពជាតិ កម្ពុជាត្រូវបានលើ កកម្ពស់ឥតឈប់ឈរ ។
លោកបញ្ជាក់ថា« បើយ៉ាងដូច្នេះ តើមានលទ្ធភាពស្អីត្រូវធ្វើការបោះឆ្នោតឡើងវិញ ដើម្បីតម្រូវចិត្តពួកប្រឆាំងនោះ ? ដំណើរការជាតិកម្ពុជាបោះជំហ៊ានទៅមុខយ៉ាងស្វាហាប់គ្មានរាថយជាដាច់ខាត ។ ហេតុនេះសូមមជ្ឈដ្ឋានអគតិកុំស្រមើលស្រម៉ៃថានឹងមានការបោះឆ្នោតឡើងវិញមុនអាណត្តិឲ្យសោះ» ។ លោកបានគូសបញ្ជាក់ថា ការបោះឆ្នោតត្រូវប្រព្រឹត្តទៅដោយទៀងទាត់ ក្នុងរយៈពេល៥ឆ្នាំម្តង ស្របតាមខ្លឹមសាររដ្ឋធម្មនុញ្ញនៃព្រះរាជណាចក្រកម្ពុជា ៕
ចែករំលែកព័តមាននេះ