ខេត្តតាកែវ ៖ ករណីគ្រោះថ្នាក់ចរាចរណ៍៣ករណីផ្សេងគ្នាបានកើតឡើងក្នុងថ្ងៃតែមួយគឺថ្ងៃទី៧ ខែធ្នូ ឆ្នាំ២០១៨ បណ្តាលឱ្យមនុស្សស្លាប់៣នាក់ របួសធ្ងន់១នាក់ និងស្រាល១នាក់ ។
ប៉ូលិសចរាចរណ៍ខេត្តតាកែវបានអោយដឹងថា ករណីទី១-កាលពីវេលាម៉ោង១និង១០នាទីរសៀល ថ្ងៃទី៧ ធ្នូ នៅលើកំណាត់ផ្លូវជាតិលេខ២ ចន្លោះបង្គោលគីឡូម៉ែត្រលេខ៧៤-៧៥ នៅចំណុចរង្វង់មូលអូចំបក់ ស្ថិតក្នុងភូមិប្រហ៊ូត សង្កាត់រកាក្រៅ ក្រុងដូនកែវ មានគ្រោះថ្នាក់ចរាចរណ៍មួយបានកើតឡើងរវាងរថយន្តបុកជាមួយម៉ូតូ បណ្តាលឱ្យស្លាប់ម្នាក់ និងរបួសស្រាលម្នាក់។
រថយន្តម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ព្រះសីហនុ ៣A-២៥១៨ បើកបរដោយឈ្មោះ ផាន ប្រុស ភេទប្រុស អាយុ៣០ឆ្នាំ មានទីលំនៅភូមិស្អាង ឃុំស្អាង ស្រុកដងទង់ ខេត្តកំពត ត្រូវសមត្ថកិច្ចចាប់ឃាត់ខ្លួន ។
ចំណែកភាគីខាងម៉ូតូម៉ាកហុងដា ធុនC125 ស៊េរីឆ្នាំ២០១៤ ពណ៌ខ្មៅ ពាក់ផ្លាកលេខ ភ្នំពេញ ១CQ-៦១៩៧ បើកបរដោយឈ្មោះ ជ័យ សែន ភេទប្រុស អាយុ៤៥ឆ្នាំ រស់នៅភូមិធ្យា ឃុំលាយបូរ ស្រុកត្រាំកក់ ខេត្តតាកែវ បានរងរបួសស្រាល រីឯអ្នករួមដំណើត្រូវជាប្រពន្ធឈ្មោះ ឆឹល សុខុម អាយុ៤៣ឆ្នាំ បានស្លាប់នៅនឹងកន្លែងកើតហេតុ ។
ករណីទី២-កាលពីវេលាម៉ោង៤និង៣០នាទីរសៀលថ្ងៃទី៧ ធ្នូ ឆ្នាំ២០១៨ ស្ថិតនៅលើផ្លូវជាតិលេខ៣ ចន្លោះគីឡូម៉ែត្រលេខ៨៤-៨៥ ក្នុងភូមិកំសី ឃុំញ៉ែងញ៉ង ស្រុកត្រាំកក់ ខេត្តតាកែវ មានករណីគ្រោះថ្នាក់ចរាចរណ៍មួយកើតឡើងរវាងរថយន្តបុកជាមួយម៉ូតូក្នុងទិសដៅបញ្ច្រាសទិសគ្នា បណ្តាលឱ្យស្លាប់ម្នាក់។
ម៉ូតូម៉ាកហុងដាគុបមូល ធុនC50 ពណ៌បៃតង គ្មានពាក់ផ្លាកលេខ បើកបរដោយឈ្មោះ ណៃ គឹមហាច ភេទប្រុស អាយុ៤៥ឆ្នាំ ជាមន្ត្រីនគរបាល នៅភូមិកំសី ឃុំញ៉ែងញ៉ង ស្រុកត្រាំកក់ ខេត្តតាកែវ បានស្លាប់នៅកន្លែងកើតហេតុ ។ ចំណែកភាគីខាងរថយន្តម៉ាកអាំងទែ (ជារថយន្តដឹកប្រេងឥន្ធនៈរបស់ក្រុមហ៊ុនតេលា) ពណ៌ស ពាក់ផ្លាកលេខ ភ្នំពេញ ៣B-៦៧៣៩ មានសណ្តោងស៊ីទែន ពាក់ផ្លាកលេខ ភ្នំពេញ ៤A-៤១៩៧ អ្នកបើកបរបានរត់គេចខ្លួនបាត់ ។
ប្រភពព័ត៌មានបានឱ្យដឹងថា ម៉ូតូមួយគ្រឿងម៉ាកហុងដាគុបមូល ធុនC50 បើកបរដោយមន្ត្រីនគរបាលម្នាក់ ធ្វើដំណើរមកពីទិសខាងកើត លុះបើកបរមកដល់ចំណុចខាងលើក៏បានបត់ឆ្លងថ្នល់ទៅទិសខាងត្បូង ត្រូវបានបុកគ្នាជាមួយរថយន្តមួយគ្រឿងជាប្រភេទរថយន្តដឹកប្រេងឥន្ធនៈ បណ្តាលឱ្យអ្នកបើកបរម៉ូតូស្លាប់នៅនឹងកន្លែងកើតហេតុ ចំណែកអ្នកបើកបររថយន្តបានរត់គេចខ្លួនបាត់ ។
និងករណីទី៣- កាលពីវេលាម៉ោង៩និង៣០នាទីយប់ថ្ងៃទី៧ ធ្នូ ឆ្នាំ២០១៨ នៅលើកំណាត់ផ្លូវជាតិលេខ៣ ចន្លោះគីឡូម៉ែត្រលេខ៤៤-៤៥ ស្ថិតក្នុងភូមិត្រាំខ្នា ឃុំសូភី ស្រុកបាទី មានគ្រោះថ្នាក់ចរាចរណ៍មួយបានកើតឡើងរវាងរថយន្តបុកជាមួយម៉ូតូ បណ្តាលឱ្យស្លាប់ម្នាក់ និងរបួសធ្ងន់ម្នាក់។
រថយន្តម៉ាកហ៊ីយ៉ាន់ដាយ ពណ៌ខៀវ គ្មានផ្លាកលេខ អ្នកបើកបរមិនស្គាល់អត្តសញ្ញាណ រត់គេចខ្លួនបាត់ក្រោយពេលកើតហេតុ ។ ចំណែកភាគីខាងលើម៉ូតូម៉ាក MSX ពណ៌ខ្មៅ គ្មានផ្លាកលេខ បើករដោយឈ្មោះ សឿន វណ្ណា ភេទប្រុស អាយុ១៩ឆ្នាំ មានទីលំនៅភូមិសង្គមមានជ័យ ឃុំពោធិ៍អង្ក្រង ស្រុកបរសេដ្ឋ ខេត្តកំពង់ស្ពឺ ស្លាប់នៅនឹងកន្លែងកើតហេតុ រីឯអ្នករួមដំណើជាមួយឈ្មោះ ឃីម រ៉ាវី ភេទប្រុស អាយុ២០ឆ្នាំ របស់នៅភូមិ ឃុំជាមួយគ្នា រងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យរាជធានីភ្នំពេញ ។
ក្រោយពេលកើតហេតុ រថយន្ត និងម៉ូតូបានឆេះក្រោយពេលបុកគ្នា ត្រូវបានកម្លាំងពន្លត់អគ្គិភ័យស្រុកបាទីជួយពន្លត់ ៕
ចែករំលែកព័តមាននេះ