ខេត្តក្រចេះ ៖ ឡធ្យូងធំៗចំនួន១២ ក្នុងបរិវេណក្រុមហ៊ុនវៀតណាមមួយនៅក្នុងឃុំឃ្សឹម ស្រុកស្នួល ដែលកំពុងតែធ្វើអាជីវកម្មដុតធ្យូងជាលក្ខណៈទ្រង់ទ្រាយធំ និងដឹកជញ្ជូនទៅលក់នៅប្រទេសវៀតណាម មានរយៈពេលជាច្រើនខែមកហើយនោះ ត្រូវបានអាជ្ញាធរស្រុកស្នួល ចុះផ្អាកសកម្មភាព បន្ទាប់ពីរកឃើញថា ការធ្វើអាជីវកម្មរបស់ក្រុមហ៊ុនវៀតណាមនេះមិនមានច្បាប់ ។
ពិតជាគួរឱ្យភ្ញាក់ផ្អើលមួយ ដែលថៅកែវៀតណាមមកបោះទីតាំងធំមួយ បែរជាធ្វើសកម្មភាពបំពានដោយគ្មានច្បាប់អាចមានជីវិតបំផ្លាញរាប់ខែ កាប់បំផ្លាញព្រៃឈើគគ្រឹកគគ្រេងបែបនេះ ។ ការចុះទៅពិនិត្យទីតាំងឡធ្យូងខុសច្បាប់ ពីក្រុមសមត្ថកិច្ចស្រុកស្នួលបានធ្វើឡើងនៅថ្ងៃទី៧ ធ្នូ បន្ទាប់ពីឡធ្យូងរបស់ក្រុមហ៊ុនវៀតណាមមួយនេះ បានធ្វើអាជីវកម្ម ដឹកធ្យូងទៅស្រុកយួនមានរយៈពេលជាច្រើនខែ ហើយក្នុងនោះដែរក៏គេដឹងថាមានកូនឈើតូចធំគ្រប់ប្រភេទចំនួនរាប់ម៉ឺនកំណាត់ ត្រូវបានកម្មករសុទ្ធតែយួនកាប់ដឹកមកប្រមូលដុតកែច្នៃជាធ្យូង ឱ្យក្លាយជាវាលរហោស្ថានទៅហើយ ។
សមត្ថកិច្ចអាវុធហត្ថស្រុកស្នួល ដែលបានចុះទៅពិនិត្យដល់ទីតាំងឡធ្យូងខាងលើនេះ បានឲ្យដឹងថា ក្នុងបរិវេណក្រុមហ៊ុនឡធ្យូងដ៏ធំមួយនេះ មានឡចំនួន១២ បាននិងកំពុងតែធ្វើសកម្មភាពដុតធ្យូង ។ ក្រៅពីនោះក៏នៅមានឈើរាប់ម៉ឺនកំណាត់ផ្សេងទៀតមានឈើស្រស់ និងឈើចាស់ ត្រូវបានប្រមូលកាត់អារដើម្បីដាក់ឡដុតធ្យូង ។ សមត្ថកិច្ចនិយាយឲ្យដឹងទៀតថា ក្នុងមួយថ្ងៃៗមានឈើរាប់ម៉ឺនកំណាត់ ត្រូវបានប្រមូលដុតនៅក្នុងឡទាំង១២ ។ ស្របជាមួយគ្នានោះក៏មានធ្យូងរាប់ពាន់បាវក៏ត្រូវបានប្រមូលដឹកចូលទៅស្រុកយួនតាមចិត្តជារៀងរាល់ថ្ងៃផងដែរ ។ ពលរដ្ឋរស់នៅតំបន់ក្បែរទីតាំងឡធ្យូងខាងលើ បាននិយាយថា សកម្មភាពឡធ្យូងនេះ បានធ្វើអាជីវកម្មមានរយៈពេលជាច្រើនខែមកហើយ ។ ហើយក្នុងបរិវេណរបស់ក្រុមហ៊ុននេះ ត្រូវបានគេរឹតត្បិតមិនឲ្យមានពលរដ្ឋខ្មែរណាចេញ-ចូលបាននោះទេ ក្រៅពីយួនជាកម្មករ ចំណែកអាជ្ញាធរដេកលក់អស់ ។
ពលរដ្ឋបានប្រាប់ទៀតថា មានឈើតូចធំគ្រប់ប្រភេទច្រើនណាស់ត្រូវបានគេកាត់-អារចេញពីតំបន់ផ្សេងៗ ប្រមូលចូលទៅដុតក្នុងឡធ្យូងខាងលើនេះ ។ ពួកគាត់ថា កន្លងមកបើទោះបីជាដឹងថា អាជីវកម្មឡធ្យូងទ្រង់ទ្រាយធំនេះមិនមានច្បាប់ ទម្លាប់ធ្វើអាជីវកម្មបែបណាក្តី តែអាជ្ញាធរមិនមានវិធានការទប់ស្កាត់នោះទេ ។ ជុំវិញការធ្វើអាជីវកម្មឡធ្យូងខុសច្បាប់របស់ក្រុមហ៊ុនវៀតណាម ក្នុងស្រុកជាប់ព្រំដែន នេះ ប្រធានផ្នែករដ្ឋបាលព្រៃឈើស្នួល លោក ជា បញ្ញា បានប្រាប់ឲ្យដឹងដែរថា ក្រោយការចុះពិនិត្យ អាជ្ញាធរបានសម្រេចផ្អាកមិនឲ្យមានការធ្វើអាជីវកម្មទៀតនោះទេ ។ ដោយតម្រូវឲ្យក្រុមហ៊ុននេះទៅធ្វើច្បាប់ទម្លាប់ឲ្យបានត្រឹមត្រូវជាមុនសិន ។ តើលោកម្ចាស់ណាមានសិទ្ធិចេញច្បាប់ ?
អ្នកតាមដានពីសកម្មភាពនេះបាននិយាយថា គឺជាកំហុសរបស់ក្រុមមន្ត្រីក្នុងស្រុកស្នួលនេះដែលបណ្តែតបណ្តោយឱ្យជនជាតិវៀតណាមចូលមកកាប់ឈើម៉ាសេរីដុតជាធ្យូងហើយដឹកយកទៅលក់នៅស្រុកយួនរបស់គេតាមចិត្ត ប្រៀបដូចជាព្រៃឈើសាធារណៈគ្មានអ្នកគ្រប់គ្រង ។ អ្វីវាកាន់តែអាម៉ាស់មុខទៀតនោះ គេចូលមកកាប់ព្រៃដុតធ្យូងយ៉ាងរង្គាលបែបនេះ ហើយខ្មែរម្ចាស់ស្រុកចូលទៅបរិវេណនេះមិនបានទៀត ពិតជាអន់ខ្លាំងណាស់លោកម្ចាស់ស្រុកអើយ…។
ពលរដ្ឋនៅតំបន់នោះថា ស្មានថាការចូលមកបោះទីតាំងបែបនេះ ពលរដ្ឋហ៊ានធ្វើឬ គឺមានតែមន្ត្រីខិលខូចប៉ុណ្ណោះ ដែលបើកដៃជាថ្នូរលុយកាក់ដាក់ហោប៉ៅ ។ ចំពោះការកាប់បំផ្លាញវិញនោះ កូនឈើប្រភេទណាក៏ដោយ គឺដុតជាធ្យូងបានទាំងអស់ ។ បើតែបែបនេះពិតជាគ្មានអ្វីសេសសល់នោះទេ សូមជួយបំពាក់មេដាយការពារទ្រព្យសម្បត្តិជាតិជូនចៅហ្វាយស្រុកស្នួលផង បើរាប់ទៅគណៈអភិបាលស្រុករាប់ស្ទើរមិនអស់ តែមើលអត់ឃើញ មិនដឹងគាត់ធ្វើអ្វីខ្លះទេ ?
ចែករំលែកព័តមាននេះ