រាជធានីភ្នំពេញ៖ រថយន្តមួយគ្រឿងដែលអ្នកបើកបរអះអាងថា ងងឹតមុខ បានជ្រុលចង្កូតទៅបុកក្បាលនាគពុះចែកទ្រូងផ្លូវ បណ្តាលអោយបាក់មួយកង់ និងជ្រុលទៅម៉ូតូមួយគ្រឿង បណ្តាលអោយអ្នកបើកបរម៉ូតូម្នាក់រងបួសស្រាល។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៨និង១៥នាទីព្រឹកថ្ងៃទី៧ ធ្នូ ឆ្នាំ២០១៨ នៅចំណូចមហាវិថីសហព័ន្ធរុស្ស៊ី មុខវត្តនាគវ័ន ក្នុងសង្កាត់ផ្សារដេប៉ូទី៣ ខណ្ឌទួលគោក។
រថយន្តខាងលើម៉ាកហាយឡេនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ ២AN-៦៩៦១ បើកបរដោយមន្ត្រីយោធាម្នាក់ពុំស្គាល់ឈ្មោះឡើយ ។
តាមព័ត៌មានបានអោយដឹងថា នៅមុនពេលកើតហេតុ គេឃើញរថយន្តខាងលើបានធ្វើដំណើរតាមមហាវិថីសហព័ន្ធរ៉ុស្ស៊ី ក្នុងទិសដៅពីលិចទៅកើត លុះពេលធ្វើដំណើរមកដល់កន្លែងកើតហេតុ មិនដឹងមូលហេតុអ្វីទេស្រាប់តែរថយន្តបានរ៉េចង្កូតទៅខាងឆ្វេងដៃបុកក្បាលនាគពុះចែកទ្រូង បណ្តាលអោយដួលអស់មួយកង់ ហើយរថយន្តក៍បានជ្រុលទៅបុកម៉ូតូមួយគ្រឿង ដែលធ្វើដំណើរស្របទិសគ្នា បណ្តាលអោយអ្នកបើកបរម៉ូតូរបរបួសស្រាល។
បន្ទាប់ពីកើតហេតុ គេឃើញអ្នកបើកបររថយន្តខាងលើដែលស្លៀកពាក់ជាឯកសណ្ឋានយោធា បានចុះពីលើរថយន្ត ហើយប្រាប់នគរបាលអោយដឹងថា មូលហេតុដែលបណ្តាលឱ្យកើតមានគ្រោះថ្នាក់ចរាចរណ៍ខាងលើនេះ គឺដោយសារតែគាត់ងងឹតមុខ ជ្រុលចង្កូតទៅបុកក្បាលនាគពុះចែកទ្រូងផ្លូវ ហើយក៏ជ្រុលទៅបុកម៉ូតូតែម្តង ។
ភ្លាមៗនោះ នគរបាលចរាចរណ៍ ដែលប្រចាំការក៏បានសម្រួលចរាចរណ៍ដើម្បីកុំឱ្យមានការកកស្ទះ និងនាំយកទាំងរថយន្តនិងម៉ូតូចូលមកខាងផ្លូវ ហើយទាក់ទងនគរបាលការិយាល័យចរាចរណ៍មកវាស់វែង រួចបញ្ជូនទៅកាន់ការិយាល័យ ដើម្បីដោះស្រាយសងការខូចខាតក្បាលនាគពុះចែកទ្រូងផ្លូវ ។
ដោយឡែក អ្នកបើកបរម៉ូតូដែលរងរបួស ត្រូវបានមន្ត្រីយោធារូបនោះ និងបងប្អូនក៏បានសម្របសម្រួលជួយចេញថ្លៃព្យាបាលនិងជួសជុលម៉ូតូផងដែរ៕
ចែករំលែកព័តមាននេះ