ខេត្តប៉ៃលិន ៖ ខណ:មនុស្សម្នាកំពុងតែដេកលង់លក់ទៅហើយនោះ ស្រាប់តែមានឮស្នូរសំឡេងផ្ទុះមួយបានកើតឡើង ដោយសារផ្ទុះកំប៉ុងហ្គាស បង្កជាអគ្គីភ័យបណ្តាលឱ្យឆាបឆេះផ្ទះបាយ និងខូចខាតសម្ភារមួយចំនួនធំផងដែរ ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១១ និង៥នាទីយប់ថ្ងៃទី៦ ខែធ្នូ ឆ្នាំ២០១៨ នៅចំណុចទល់មុខក្លឹបកំសាន្តហ្គោលឌិន ស្ថិតនៅក្នុងភូមិប៉ាហ៊ីត្បូង សង្កាត់ប៉ៃលិ ក្រុងប៉ៃលិន ខេត្តប៉ៃលិន ។
ប្រភពព័ត៌មានពីនគរបាលបានឱ្យដឹងថា ម្ចាស់ផ្ទះកើតហេតុខាងលើឈ្មោះ ហាក់ ស្រីមុំ ភេទស្រី អាយុ៥២ឆ្នាំ មានទីលំនៅក្នុងភូមិឃុំកើតហេតុខាងលើ ។
តាមប្រភពពីស្ត្រីជាម្ចាស់ផ្ទះបានឱ្យដឹងថា មុនដំបូងគាត់បើកភ្លើងចង្ក្រានហ្គាសដើម្បីដាំបាយ និងធ្វើម្ហូប សម្រាប់ទទួលទានជួបជុំគ្រួសារនាពេលយប់ លុះមិនទាន់ឆ្អិនស្រួលបួលអស់ផង លុះពេលគាត់បែរខ្លួនពីចង្ក្រានតែមួយភ្លែត ស្រាប់តែភ្លើងចង្ក្រានបានឆាបកំប៉ុងហ្គាស ពេលនោះក៏ឆាបឆេះកាន់តែខ្លាំងឡើង មិនអាចឱ្យគាត់ចូលពន្លត់បាន គាត់ក៏រត់ចេញក្រៅភ្លាម ស្រាប់តែផ្ទុះលាន់ឮសូរយ៉ាងខ្លាំង បណ្តាលឱ្យឆាបឆេះពេញក្នុងផ្ទះបាយ រហូតដល់ម្ចាស់ផ្ទះមិនអាចពន្លត់ខ្លួនឯងកើត ក៏ទូរស័ព្ទហៅរថយន្តពន្លត់អគ្គីភ័យឱ្យចូលទៅអន្តរាគមន៍ភ្លាមៗតែម្តង ។
ប្រភពបន្តទៀតថា ករណីខាងលើត្រូវបានកម្លាំងជំនាញការិយាល័យពន្លត់អគ្គីភ័យនៃស្នងការដ្ឋាននគរ
បាលខេត្តប៉ៃលិន បានចុះទៅពន្លត់ទាន់ពេលវេលា ដោយគ្មាននរណាម្នាក់ទទួលរងរបួសនោះទេ គ្រាន់តែឆេះអស់ទ្រព្យសម្បត្តិ និងសម្ភារ:ផ្ទះបាយមួយចំនួនប៉ុណ្ណោះ ៕
ចែករំលែកព័តមាននេះ