ខេត្តកំពត ៖ អាងទឹកមួយកន្លែងនៅចំណុចស្រែអំបិលបឹងរូង ស្ថិតក្នុងភូមិជុំគ្រៀល ឃុំជុំគ្រៀល ស្រុកទឹកឈូ ត្រូវបានគេវាយកម្ទេចធ្វើឱ្យមានការរិះគន់ ព្រោះជាសម្បត្តិរដ្ឋ ដែលកសាងយូរឆ្នាំមកហើយសម្រាប់់ស្តុកទឹកឱ្យកម្មករធ្វើស្រែអំបិល នៅចំណុចបឹងរូងប្រើប្រាស់ ស្រាប់តែឃើញគេឱ្យកម្មករវាយកម្ទេចចោលហ្មត់ដូចអាចម៍ទីទុយ ។
ជុំវិញករណីខាងលើនេះមតិខ្លះក៏មានចម្ងល់និងរិះគន់ មកលើអាជ្ញាធរនិងមន្ទីរជំនាញពាក់ព័ន្ធដោយបង្ហោះតាមបណ្តាញសង្គមហ្វេសប៊ុក និងឡាយតៗគ្នា ព្រមទាំងមានការខមិន(Comment)រិះគន់ពីការវាយកម្ទេចអាងទឹកចោលនេះផងដែរ ។ មន្ត្រីសាលាខេត្តមួយរូបដែលសុំមិនបញ្ចេញឈ្មោះបានប្រាប់អ្នកយកព័ត៌មានកោះសន្តិភាពថា អាងទឹកនេះមុននឹងគេវាយកម្ទេចចោលម្ចាស់កម្មសិទ្ធិបានធ្វើសំណើសុំមកលោកអភិបាលខេត្តដែរថាសុំរុះរើចេញ ពីព្រោះអាងទឹកនេះមានសភាពកាន់តែចាស់ទ្រុឌទ្រោមស៊ីម៉ង់ត៍ពុកផុយខ្លាចថ្ងៃណាមួយមានការបាក់រលំទៅ នាំឲ្យប៉ះពាល់ដល់អ្នកធ្វើដំណើរតាមយានយន្ត លើផ្លូវសាធារណៈដែលនៅក្បែរនោះ ។ ហើយម្យ៉ាងវិញទៀត ទីតាំងអាងទឹកនេះមានឯកសារកាន់កាប់ជាកម្មសិទ្ធិបុគ្គលយូរមកហើយ គឺមានប្លង់កម្មសិទ្ធិ(ប្លង់រឹង) កាន់កាប់ស្របច្បាប់តាំងពីឆ្នាំ១៩៩៥មក ។
ប្រភពដដែលបានឲ្យដឹងថា ក្នុងការដាក់សំណើរសុំទៅលោកអភិបាលខេត្ត ដើម្បីរុះរើសំណង់អាងទឹកនេះ លោកអភិបាលខេត្តពុំបានឆ្លើយតបទៅម្ចាស់កម្មសិទ្ធិដែលស្នើសុំនោះទេ ប៉ុន្តែលោកប្រគល់ឲ្យក្រុមការងារគណៈកម្មការរដ្ឋបាលខេត្តចុះពិនិត្យវាយតម្លៃ សំណើរបស់ម្ចាស់កម្មសិទ្ធិខាងលើ ។ ប្រភពបានបន្តទៀតថា តាមការពិនិត្យរបស់គណៈកម្មការវាយតម្លៃ ដោយយោលតាមសភាពជាក់ស្តែងសំណង់នេះមានសភាពទ្រុឌទ្រោមខ្លាំង ជាពិសេសជើងទ្រទាំងប្រាំរបស់អាងទឹកមានបែកប្រេះជាច្រើនកន្លែង ហើយសង់នៅលើផ្ទៃដីក្បែរផ្លូវសាធារណៈទៀតផង នៅថ្ងៃខាងមុខខ្លាចបង្កហានិភ័យដល់អាយុជីវិតអ្នកធ្វើដំណើរលើផ្លូវសាធារណៈខាងលើនេះជាយថាហេតុ ទើបក្រុមការងាររបស់គណៈកម្មការចុះត្រួតពិនិត្យ វាយតម្លៃលើសំណង់ទ្រុឌទ្រោមនេះ ឯកភាពឲ្យរុះរើតាមការស្នើសុំរបស់ម្ចាស់កម្មសិទ្ធិ ។
ជុំវិញការរិះគន់ពីសំណាក់ បណ្តាញសង្គមហ្វេសបុកបានចោទថា អ្នកហ៊ានវាយកម្ទេចនេះសុទ្ធតែអ្នកមានលុយមានអំណាចឬក៏បក្សពួកអ្នកធំហើយទើបហ៊ានធ្វើបែបនេះ។ ភ្នាក់ងារកោះសន្តិភាពបានស្រាវជ្រាវរកម្ចាស់ ដើម្បីធ្វើបទសម្ភាសន៍សុំការបំភ្លឺ ជុំវិញការចោទប្រកាន់ខាងលើ ត្រូវបានលោក សរ សំណាង ជាម្ចាស់កម្មសិទ្ធិកាន់កាប់ដីអាងទឹកនេះ និងជាមន្ត្រីរាជការចូលនិវត្តន៍ បានប្រាប់ភ្នាក់ងារកោះសន្តិភាពថា រូបគាត់កន្លងមកជាមន្ត្រីរាជការតូចតាចទេ ហើយក៏ជាអ្នកក្រីក្រដែរ មិនមែនជាអ្នកមានលុយអ្នកមានអំណាច ឬមានបក្សពួកអ្នកធំដូចបងប្អូនក្នុងបណ្តាញសង្គមហ្វេសបុកចោទប្រកាន់ដោយមិនស្គាល់ប្រវត្តិខ្ញុំនោះទេ ។
ខ្ញុំបានចាប់ដីនៅកន្លែងហ្នឹងកាន់កាប់តាំងពីឆ្នាំ១៩៩៥មក ដោយរដ្ឋបានធ្វើប្លង់កម្មសិទ្ធិប្រគល់ឲ្យកាន់កាប់ត្រឹមត្រូវ(ប្លង់រឹង) ដែលមានទំហំ១៧៤០ម៉ែត្រការ៉េ ។ នៅពេលថ្មីៗនេះ ដោយរូបខ្ញុំជាម្ចាស់កម្មសិទ្ធិចង់អភិវឌ្ឍន៍ដីរបស់ខ្លួនឲ្យមានសោភណ័ភាពជាភូមិគ្រឹះ ឲ្យបានសមរម្យនិងគេពីព្រោះសព្វថ្ងៃមិនទាន់មានលំនៅឋានឲ្យបានត្រឹមត្រូវទេ ក្រោយពេលចូលនិវត្តន៍មកគឺស្នាក់នៅជាមួយកូននៅភ្នំពេញ ។
គាត់និយាយថា ពេលនេះត្រូវរៀបចំដីនេះវាប៉ះនិងសំណង់អាងទឹកដែលមានសភាពទ្រុឌទ្រោមនេះ ទើបខ្ញុំជាម្ចាស់កម្មសិទ្ធិសុំទៅអាជ្ញាធរគ្រប់ថ្នាក់រហូតដល់ខេត្ត ក្រោយមកក៏មានក្រុមការងាររបស់គណៈកម្មការរដ្ឋបាលខេត្តចុះមកពិនិត្យនិងវាយតម្លៃថា ខ្ញុំបាទមានឯកសារ កាន់កាប់ត្រឹមត្រូវមិនប៉ះពាល់និងកម្មសិទ្ធិរបស់រដ្ឋទេ ហើយម្យ៉ាងវិញទៀត សំណង់នេះកាន់តែចាស់ទ្រុឌខ្លាំងអាចបង្កហានិភ័យទៅថ្ងៃណាមួយទើបក្រុមការងារនិងជាគណៈកម្មការវាយតម្លៃអនុញ្ញាតឲ្យខ្ញុំបាទជាម្ចាស់រុះរើតែម្តងទៅ ៕
ចែករំលែកព័តមាននេះ