ខេត្តបាត់ដំបង ៖ មានសេចក្ដីរាយការណ៍ថា បច្ចុប្បន្ននេះបទល្មើសនេសាទគ្រប់ប្រភេទនៅតំបន់ទន្លេ
សាប ក្នុងទឹកដីខេត្តបាត់ដំបង កំពុងកើតមានពេញបន្ទុកស្ទើរគ្រប់ទីកន្លែងក្រោមការសង្ស័យប្រព្រឹត្តអំពើពុករលួយពីសំណាក់មន្ត្រីក្នុងស្ថាប័នពាក់ព័ន្ធ ដែលមានស្នាក់ការបណ្ដែតទឹកប្រចាំតំបន់ទន្លេសាបនោះ រាប់ទាំងកម្លាំងចម្រុះដែលតែងចុះបង្ក្រាបបទល្មើសទាំងនេះម្ដងម្កាលផង ។
ប្រភពពីប្រជានេសាទតូចតាចបានឲ្យដឹងថា បទល្មើសនេសាទក្នុងទ្រង់ទ្រាយធំដែលមានច្រើនស្អេកស្កះជាងគេ គឺនៅតំបន់«ឡូត៍នេសាទលេខ២ និងក្បែរតំបន់អភិរក្សសត្វស្លាប» ក្នុងទឹកដីឃុំកោះជីវាំង ស្រុកឯកភ្នំ ។ ប្រភពដែលសុំមិនប្រាប់ឈ្មោះនេះបានប្រាប់ថា ឧបករណ៍ល្មើសច្បាប់(បរណរ៉ាវ)ទាំងនោះ ភាគច្រើនជារបស់ក្រុមឈ្មួញមានដើមទុនធំៗ និងមានមន្ត្រីខិលខូចនៅពីក្រោយខ្នង ។
មន្ត្រីខិលខូចទាំងនោះមាន៣ស្ថាប័នដែលខ្លាំងជាងគេគឺ មន្ត្រីជលផល អង្គភាពយោធានិងមន្ត្រីកងរាជអាវុធហត្ថប្រចាំស្នាក់ការ៥០៨ ដែលគ្រប់គ្រងដោយមន្ត្រីឈ្មោះ ពៅ ទុំ និង ទ្រី តិចសែ ។ ប្រភពដដែលបានបញ្ជាក់ថា មន្ត្រីនៃស្ថាប័នទាំង៣នេះសុទ្ធតែមានស្នាក់ការបណ្ដែតទឹកប្រចាំតំបន់ទន្លេសាប ក្នុងស្រុកឯកភ្នំ ស្រុកសង្កែ និងស្រុកមោងឫស្សី ។ ក្រុមនេះសុទ្ធតែតាំងខ្លួនថាជាអ្នកត្រូតពិនិត្យ ទប់ស្កាត់ និងបង្ក្រាបបទល្មើសនេសាទ ។
ប៉ុន្តែផ្ទុយទៅវិញ ក្រុមនេះកំពុងរួមដៃគ្នាបង្កើតឲ្យមានបទល្មើសនេសាទកាន់តែខ្លាំងតាមរយៈការឃុបឃិតចូលភាគហ៊ុនបង្កើតបទល្មើសជាមួយឈ្មួញដោយលាក់មុខ ឬធ្វើជាខ្នងបង្អែកឲ្យក្រុមឈ្មួញទុច្ចរិតជាថ្នូរនឹងការទទួលបានផលប្រយោជន៍ ហើយបែរជាតាមឈ្នានីស និងកៀបសង្កត់ជំរិតយកប្រាក់ពីប្រជានេសាទតូចតាចដោយគ្មានប្រណីដៃឡើយ ។ ពលរដ្ឋបានបញ្ជាក់ដែរថា ពេលខ្លះក្រុមមន្ត្រីទាំងនេះ សម្លុត និងបង្ខំឲ្យពលរដ្ឋបត់ជើងសំពះប្រគល់លុយឲ្យពួកគេ ពេលដែលពួកគេខឹងពលរដ្ឋតវ៉ាសុំបញ្ចុះថ្លៃសូកប៉ាន់ម្ដងៗ ។
ដោយសារតែមិនអាចទ្រាំនឹងការគាបសង្កត់ពីសំណាក់មន្ត្រីខិលខូចបែបនេះបាន កាលពីប៉ុន្មានខែមុននេះ ប្រជាពលរដ្ឋស្ទើរគ្រប់ភូមិ នៅក្នុងឃុំកោះជីវាំង ដែលមានមុខរបរនេសាទ បាននាំធ្វើញត្តិឬខិត្តប័ណ្ណដាក់ជូនទៅអាជ្ញាធរស្រុកឯកភ្នំ ដើម្បីសុំឲ្យអាជ្ញាធរដកមន្ត្រីទាំងនេះចេញពីទន្លេសាប ។ ការដាក់ញតិ្តឬខិត្តប័ណ្ណទាមទារនេះ គឺធ្វើឡើងចំពេលដែលអាជ្ញាធរស្រុកនេះ កំពុងធ្វើវេទិកាសាធារណៈ ។
ប្រជាពលរដ្ឋ បានទាមទាសុំឲ្យអាជ្ញាធរគ្រប់ជាន់ថ្នាក់ ជួយអន្តរាគមន៍ដកមន្ត្រីក្នុងស្ថាប័នទាំង៣ ដែលមានស្នាក់ការបណ្ដែតទឹកប្រចាំតំបន់នោះចេញពីទន្លេសាប ដោយបានចោទថា ក្រុមនេះធ្វើទុក្ខបុកម្នេញយ៉ាងខ្លាំងទៅលើប្រជានេសាទកំប៉ិកកំប៉ុក តែបានការពារក្រុមឈ្មួញប្រព្រឹត្តបទល្មើសធំៗដែលជាបក្សពួក
របស់ខ្លួន ។ខ្លឹមសារដែលសរសេរនៅក្នុងញតិ្តឬខិត្តប័ណ្ណតវ៉ារាប់សិបសន្លឹកនោះ ប្រជាពលរដ្ឋបានផ្ដោតជាពិសេសទៅលើកម្លាំងកងរាជអាវុធហត្ថប្រចាំស្នាក់៥០៨ គ្រប់គ្រងដោយមន្ត្រីឈ្មោះ ពៅ ទុំ និងឈ្មោះ ទ្រី តិចសែ ដែលពលរដ្ឋចោទថា បានធ្វើទុក្ខបុកម្នេញស្ទើរគ្រប់រូបភាព ជាមួយនឹងការជំរិតទារប្រាក់គ្មានប្រណីពីប្រជានេសាទតូចតាច ។
ជាមួយនឹងការដាក់ញតិ្តឬខិត្តប័ណ្ណពីប្រជានេសាទនៅក្នុងឃុំកោះជីវាំងនេះ លោក ម៉ិលសុផល អភិបាលស្រុកឯកភ្នំ ក៏បានទទួលស្គាល់ថា ពិតជាមានរឿងនេះមែនដែលពលរដ្ឋទាមទារឲ្យដកមន្ត្រីខិលខូចទាំងនោះចេញពីទន្លេសាប ។ លោកអភិបាលស្រុកបានប្រាប់កោះសន្តិភាព កាលនោះថា ប្រជាពលរដ្ឋទាំងនោះមិនពេញចិត្តនឹងទង្វើរបស់មន្ត្រីក្នុងស្ថាប័នទាំងនេះ ដែលធ្វើទៅលើពួកគាត់ដែលមានមុខរបរនេសាទតូច តាច។ ប្រជាពលរដ្ឋបានអះអាងថា កម្លាំងសមត្ថកិច្ចទាំងនោះ បានចុះបង្ក្រាបបទល្មើសនេសាទដោយគ្មានតម្លាភាព ។ ពួកគាត់ចោទថា ក្រុមនេះធ្វើបាបតែពលរដ្ឋទន់ខ្សោយ តែមិនបង្ក្រាបបទល្មើសធំៗដែលជាបក្សពួកខ្លួន ។
លោក ម៉ិល សុផល បានបញ្ជាក់ដែរថា លោកបានទទូលញតិ្តរបស់ប្រជានេសាទទាំងនោះហើយ ហើយលោកក៏បានធ្វើរបាយការណ៍ជូនលោកអភិបាលខេត្តបានជ្រាបហើយដែរ ។ពាក់ព័ន្ធនឹងបទល្មើសនេសាទ និងការប្រព្រឹត្តអំពើពុករលួយពីសំណាក់មន្ត្រីខិលខូចមួយចំនួននៅតំបន់ទន្លេសាបនេះ កាលពីថ្ងៃទី៥ ខែធ្នូកន្លងទៅ អាជ្ញាធរខេត្តបានកោះប្រជុំគណៈបញ្ជាការកងឯកភាពខេត្ត ដើម្បីពិភាក្សានិងដោះស្រាយអំពីបញ្ហា«បទល្មើសនេសាទ» ដែលកំពុងកើតមានពាសពេញតំបន់ទន្លេសាបនាពេលបច្ចុប្បន្ន ។
បើតាមមន្ត្រីដែលចូលរួមក្នុងកិច្ចប្រជុំនេះបានប្រាប់ថា ស្ថាប័នអយ្យការអមសាលាដំបូងខេត្តបានចង្អុលចំៗទៅលើលោក ជួង សុភា នាយខណ្ឌរដ្ឋបាលជលផលបាត់ដំបង ដែលមិនបានបំពេញភារកិច្ចរបស់ខ្លួនឲ្យបានត្រឹមត្រូវ ក្នុងនាមជាស្ថាប័នជំនាញ ។
មន្ត្រីដដែលបានស្រង់សម្តីថា លោកព្រះរាជអាជ្ញាបានលើកឡើងចំៗ អំពីចំណាត់ការបង្ក្រាបកន្លងមករបស់សមត្ថកិច្ចឬមន្ត្រីជលផល ដោយនិយាយថា «គ្មានរបាយការណ៍ជាក់លាក់ មានតែតួលេខ និងវត្ថុតាងមួយចំនួន តែគ្មានបញ្ជីឈ្មោះជនប្រព្រឹត្តបទល្មើសឡើយ ។ អង្គភាពនីមួយៗដែលបានចុះបង្ក្រាប សុទ្ធតែបានអះអាងអំពីតួលេខបង្ក្រាបបានរាប់រយករណីក្នុងមួយឆ្នាំៗ
ប៉ុន្តែរហូតមកដល់ពេលនេះ មិនទាន់ឃើញអង្គភាពជំនាញណាមួយ នាំខ្លួនជនល្មើសមកដល់តុ
លាការបានម្នាក់នៅឡើយទេ» ។
ពលរដ្ឋបានចោទប្រកាន់ថា កន្លងមកក្រុមគណៈកម្មការចម្រុះនេះ ចុះបង្ក្រាបគ្មានតម្លាភាពទេ ។ ទីតាំងបទល្មើលធំៗដែលម្ចាស់មានលុយសូកប៉ាន់ ក្រុមនេះបើកកាណូតគេច រីឯទីតាំងបទល្មើសរបស់ប្រជានេសាទជាលក្ខណៈគ្រួសារ ដែលគ្មានលទ្ធភាពសូកប៉ាន់ គឺក្រុមនេះបង្ក្រាបគ្មានបន្ធូរដៃឡើយ ។
ប៉ុន្តែជុំវិញការចោទប្រកាន់នេះ ត្រូវបានលោក កុយ ហៀង ស្នងការរងនគរបាលខេត្តដែលតែងដឹកនាំកម្លាំងចុះបង្ក្រាបបទល្មើសនេះព្យាយាម «បដិសេធ» ។លោក កុយ ហៀង បានប្រាប់កោះសន្តិភាព មុនពេលលោកដឹកនាំកម្លាំងចុះបង្ក្រាប កាលពីថ្ងៃទី៥ ខែធ្នូថា កម្លាំងដែលលោកដឹកនាំចុះទៅទន្លេសាប មិនដែលបង្ក្រាបឧបករណ៍នេសាទតូចតាចរបស់ពលរដ្ឋទេ លោកបង្ក្រាបតែទីតាំងដែលមានបទល្មើសធំៗប៉ុណ្ណោះ ។
លោកស្នងការរងរូបនេះក៏បានបញ្ជាក់ដែរថា តាមរយៈកិច្ចប្រតិបត្តិការកន្លងមក លោកបានស្រាវជ្រាវរកឃើញបទល្មើលធំៗជាច្រើន ហើយភាគច្រើន នៃបទល្មើសនេះសុទ្ធតែមានខ្នងបង្អែកជាមន្ត្រីខិលខូចមួយចំនួននៅតំបន់នោះ រាប់ទាំងមន្ត្រីជលផលខ្លះផង ៕
ចែករំលែកព័តមាននេះ