រាជធានីភ្នំពេញ ៖ បុរសម្នាក់ជិះម៉ូតូមួយគ្រឿង ដោយគ្មានកញ្ចក់មើលក្រោយ និងមិនពាក់មួកសុវត្ថិភាព ខណៈពេលដែលឃើញកម្លាំងសមត្ថកិច្ចកំពុងដាក់គោលដៅពង្រឹងច្បាប់ចរាចរណ៍បានព្យាយាមបើកបញ្ច្រាសផ្លូវ ដើម្បីគេចខ្លួនតែជាអកុលសក៏ជ្រុលទៅបុករថយន្តកុងតឺន័រមួយគ្រឿងទៀតដែលបើកស្របទិសដៅគ្នា កាលពីវេលាម៉ោង៩និង៥០នាទីយប់ថ្ងៃទី០៦ ខែធ្នូ ឆ្នាំ២០១៨ ត្រង់ចំណុចខាងមុខវិទ្យាល័យជាស៊ីមសាមគ្គី តាមបណ្ដោយផ្លូវ២៧១ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់វ័យ២៥ឆ្នាំ បានបើកបរម៉ូតូមួយគ្រឿងម៉ាក ហុងដាឌ្រីម ស៊េរី០១៧ ពណ៌ខ្មៅ ពាក់ស្លាកលេខ ភ្នំពេញ1GD- 3633 តាមបណ្តោយផ្លូវ២៧១ ក្នុងទិសដៅបើកមកពីស្ពានអាកាសស្ទឹងមានជ័យឆ្ពោះទៅស្តុបណូគា ដោយម៉ូតូពុំមានបំពាក់កញ្ចក់សម្រាប់មើលក្រោយ និងអ្នកបើកបរមិនបានពាក់មួកសុវត្ថិភាព ។ លុះមកដល់ក្បែរ និងចំណុចកើតហេតុក៏មានកម្លាំងសមត្ថកិច្ចខណ្ឌទួលគោកកំពុងតែដាក់គោលដៅត្រួតពិនិត្យអាវុធជាតិផ្ទុះ និងពង្រឹងច្បាប់ចរាចរណ៍ផ្លូវគោក ។
ភ្លាមនោះដោយម៉ូតូខាងលើខ្លាចសមត្ថកិច្ចចាប់ធ្វើការផាកពិន័យបានព្យាយាមជិះគេចខ្លួនឆ្លងទៅផ្លូវម្ខាងទៀតដែលបញ្ច្រាសទិសដៅចរាចរណ៍ ។ ដោយខ្វះការប្រុងប្រយ័ត្នក៏ជ្រុលទៅបុកនិងរថយន្តកុងតឺន័រមួយគ្រឿងទៀតម៉ាកហ្វូយហ្សូ ពណ៌ស ពាក់ស្លាកលេខ ភ្នំពេញ 3E-1605 ដែលបើកបរដោយបុរសម្នាក់ក្នុងទិសដៅស្របទិសចរាចរណ៍ចំពីមុខពេញទំហឹង បណ្តាលឲ្យអ្នកបើកបរម៉ូតូរងរបួសបាក់ជើងខាងស្តាំ រីឯម៉ូតូរងការខូចខាតមួយចំហៀងខាងឆ្វេងយ៉ាងដំណំ ចំណែកឯរថយន្តរងការខូចខាតក្រពឹតកាងផ្នែកខាងមុខចំហៀងខាងឆ្វេង ។
ក្រោយពេញកើតហេតុបុរសរងគ្រោះត្រូវបានរថយន្តសង្គ្រោះបន្ទាន់របស់គ្លីនិកហុងហាក់ដឹកយកទៅសង្គ្រោះភ្លាមៗ ដោយឡែកម៉ូតូ និងរថយន្តត្រូវបានសមត្ថកិច្ចមូលដ្ឋានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែង និងយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ ៕
ចែករំលែកព័តមាននេះ