ប្រទេសរុស្ស៊ី ៖ កាលពីថ្ងៃទី៥ធ្នូប្រធានាធិបតីរុស្ស៊ី លោកពូទីនបានព្រមានប្រឆាំងការរត់ប្រណាំងគ្រឿងសព្វាវុធថ្មីៗ ដោយលោកគំរាមថា រុស្ស៊ីនឹងបង្កើតមីស៊ីលបាលីស្ទិករយៈមធ្យមថ្មីៗ ប្រសិនបើសហរដ្ឋអាមេរិកដកខ្លួនថយចេញពីសន្ធិសញ្ញានុយក្លេអ៊ែរឆ្នាំ១៩៨៧ហៅសន្ធិសញ្ញាINF។ លោកពូទីនថ្លែងបែបនេះជាការឆ្លើយតបចំពោះការលើកឡើងនាពេលមុននេះ របស់រដ្ឋមន្ត្រីការបរទេសអាមេរិក លោកMIKE…
ប្រទេសរុស្ស៊ី ៖ កាលពីថ្ងៃទី៥ធ្នូប្រធានាធិបតីរុស្ស៊ី លោកពូទីនបានព្រមានប្រឆាំងការរត់ប្រណាំងគ្រឿងសព្វាវុធថ្មីៗ ដោយលោកគំរាមថា រុស្ស៊ីនឹងបង្កើតមីស៊ីលបាលីស្ទិករយៈមធ្យមថ្មីៗ ប្រសិនបើសហរដ្ឋអាមេរិកដកខ្លួនថយចេញពីសន្ធិសញ្ញានុយក្លេអ៊ែរឆ្នាំ១៩៨៧ហៅសន្ធិសញ្ញាINF។
លោកពូទីនថ្លែងបែបនេះជាការឆ្លើយតបចំពោះការលើកឡើងនាពេលមុននេះ របស់រដ្ឋមន្ត្រីការបរទេសអាមេរិក លោកMIKE POMPEOដែលចោទប្រកាន់រុស្ស៊ីថា រំលោភបំពានសន្ធិសញ្ញានោះ។ ប្រមុខការទូតអាមេរិកទុកពេល៦០ថ្ងៃដល់ក្រុងមូស្គូ ឲ្យអនុវត្តតាមសន្ធិសញ្ញាបើពុំដូច្នោះទេ សហរដ្ឋអាមេរិកនឹងដកខ្លួនថយចេញពីសន្ធិសញ្ញា INF។ ការគំរាមបែបនោះត្រូវបានលោកដូណាល់ត្រាំលើករួចមកហើយកាលពីដំណាច់ខែតុលា។
យោងតាមសេចក្ដីប្រកាសមួយរបស់វិមានក្រឹមឡាំង លោកពូទីនបានព្រមានថា ពេលនេះច្បាស់ណាស់បណ្ដាដៃគូអាមេរិករបស់យើងគិតថា សភាពការណ៍មានការផ្លាស់ប្ដូរដែលពួកគេត្រូវមានអាវុធអស់ទាំងនេះ។ ចុះតើយើងត្រូវឆ្លើយតបវិញបែបណា? ចម្លើយតបមួយគឹសាមញ្ញ យើងក៏នឹងធ្វើដូចគ្នាវិញដែរ។ លោករំឭកថារុស្ស៊ីប្រឆាំងការបំផ្លាញសន្ធិសញ្ញានោះ។
ចុះហត្ថលេខាកាលពីជាង៣០ឆ្នាំមុនសន្ធិសញ្ញាINF(INTERMEDIATE NUCLEAR FORCES TREATY) ត្រូវបានលើកកកាយមកនិយាយកាលពីខែតុលា ពេលដែលលោកដូណាល់ត្រាំប្រកាសថា សហរដ្ឋអាមេរិកនឹងបញ្ចប់កិច្ចព្រមព្រៀងនោះ ហើយបង្កើតអាវុធនុយក្លេអ៊ែរថ្មីៗ។ ទោះបីយ៉ាងណាកាលពីថ្ងៃទី៣ធ្នូលោកត្រាំបែរជាលើកពីឆន្ទៈរបស់លោក ធ្វើការជាមួយរុស្ស៊ី និងចិនដើម្បីបញ្ចប់ការរត់ប្រណាំងគ្រឿងសព្វាវុធ ដែលក្លាយទៅជាពុំអាចត្រួតត្រាបាន។
ការព្រមានរបស់អាមេរិកក៏ត្រូវបាននាយអគ្គសេនាធិការកងទ័ពរុស្ស៊ី ឧត្ដមសេនីយវ៉ាឡេរី ហ្គេរ៉ាស់ស៊ិមូវអះអាងថា ក្រុងមូស្គូនឹងបង្កើនអាវុធនុយក្លេអ៊ែររបស់ខ្លួន៕
ចែករំលែកព័តមាននេះ