ក្រុមហ៊ុន Huawei របស់ប្រទេសចិនបាននិយាយកាលពីថ្ងៃព្រហស្បតិ៍សប្ដាហ៍មុនថា ប្រាក់ចំណូលរបស់ខ្លួនសម្រាប់ឆ្នាំ២០១៨នេះ នឹងកើនលើស១០០ប៊ីលានដុល្លារជាលើកដំបូង ។
លោក Eric Xu អគ្គនាយករបស់ក្រុមហ៊ុន Huawei បានប្រាប់សារព័ត៌មានមួយថា អាជីវកម្មរបស់Huawei កំពុងតែលូតលាស់បានល្អជាងការគិតទុក ។
លោកបានឲ្យដឹងថា ៖« វាមិនមានបញ្ហាឡើយសម្រាប់ពួកយើងក្នុងការរកប្រាក់ចំណូលបាន១០០ប៊ីលានដុល្លារ »។ យ៉ាងនេះក្ដី លោក Xu មិនបានបកស្រាយបំភ្លឺបន្ថែមឡើយពីតក្តាដែលជំរុញដល់ការលូតលាស់របស់ក្រុមហ៊ុន ។
គួរបញ្ជាក់ផងដែរថា ក្រុមហ៊ុន Huawei រកប្រាក់ចំណូលបាន៣២៥,៧ប៊ីលានយន់កាលពី៦ខែដំបូងនាឆ្នាំនេះ ឬស្មើនឹងប្រមាណ៤៩ប៊ីលានដុល្លារអាមេរិក ។ ក្រុមហ៊ុននេះបានឲ្យដឹងដែរថា ពួកគេរកប្រាក់ចំណូលបាន៩២,៥ប៊ីលានដុល្លារកាលពីឆ្នាំមុន ។
មកដល់ពេលនេះ ការលូតលាស់របស់ Huawei ត្រូវបានជំរុញដោយអាជីវកម្មជាច្រើនដែលបានដំណើរការយ៉ាងល្អ ជាពិសេសក្នុងផ្នែកគ្រឿងអេឡិចត្រូនិកប្រើប្រាស់ប្រចាំថ្ងៃដែលបន្តលូតលាស់ជាបន្តបន្ទាប់ ។
បច្ចុប្បន្ននេះ ក្រុមហ៊ុនHuawei ជាប់ចំណាត់ថ្នាក់លេខ២ ជាក្រុមហ៊ុនផលិតស្មាតហ្វូនដែលគ្រប់គ្រងទីផ្សារបានច្រើនជាងគេលើពិភពលោក និងកំពុងតាមប្រកៀកប្រកិតជាមួយក្រុមហ៊ុន Samsung ផងដែរ ។
កត្តាមួយដែលជួយជំរុញដល់ភាពជោគជ័យរបស់ Huawei គឺទូរស័ព្ទHonor ដែលមានតម្លៃសមរម្យ ។ ការលក់ Honor បានកើនដល់កម្រិតខ្ពស់ជាងគេនៅថ្ងៃឈប់សម្រាកទិញទំនិញក្នុងប្រទេសឥណ្ឌា ចិន និងនៅលោកខាងលិច ៕
ចែករំលែកព័តមាននេះ