ខេត្តព្រៃវែង ៖ លោក អ៊ុត សុភាព ប្រធានសាខាកាំកុងត្រូលខេត្តព្រៃវែងបានលើកឡើងថា រាល់ពេលដែលមន្ត្រីរបស់លោកចុះត្រួតពិនិត្យទំនិញនៅតាមបណ្តាផ្សារនានានៅទូទាំងខេត្តព្រៃវែង គឺតែងតែប្រទះឃើញមានទំនិញខូចគុណភាព និងទំនិញហួសកាលបរិច្ឆេទជាច្រើន នៅតាមតូប និងស្តង់លក់ដូររបស់ក្រុមអាជីវករ ។
ជាក់ស្តែងកាលពីព្រឹកថ្ងៃទី៦ ធ្នូនេះ នៅពេលដែលមន្ត្រីជំនាញកាំកុងត្រូលចុះទៅត្រួតពិនិត្យនៅក្នុងផ្សារទានភ្លើង ក្នុងស្រុកកំចាយមារ ខេត្តព្រៃវែង បានរកឃើញទំនិញជាច្រើនមុខដែលខូចគុណភាព និងហួសកាលបរិច្ឆេទ ហើយក្រុមអាជីវករបានអះអាងថា ទំនិញទាំងនោះពួកគាត់បានប្រមូលទុកសម្រាប់ដូរយកទំនិញថ្មីពីក្រុមហ៊ុនវិញ ប៉ុន្តែពេលនេះក្រុមហ៊ុនមិនទាន់មកដូរឲ្យ បើមន្ត្រីជំនាញដកហូតយកនោះពួកគាត់ និងខាតបង់ច្រើនណាស់ ។
លោក អ៊ុត សុភាព បានបញ្ជាក់ថា យោងលើហេតុផលការពារផលប្រយោជន៍របស់បងប្អូនអាជីវករលោកសំណូមពរឲ្យម្ចាស់ក្រុមហ៊ុនទាំងអស់ធ្វើការតាមដានទីផ្សាររបស់ខ្លួនឲ្យបានជាប់ជាប្រចាំ ហើយបើឃើញមានទំនិញណាខូចគុណភាព ឬហួសកាលបរិច្ឆេទហើយនោះ ត្រូវដោះដូរទំនិញថ្មីឲ្យអាជីវករឲ្យបានលឿន ដើម្បីរក្សាទីផ្សាររបស់ខ្លួនផង និងដើម្បីការពារសុខភាពរបស់ប្រជាពលរដ្ឋផង ។
គួរបញ្ជាក់ផងដែរថា នៅក្នុងពេលចុះពិនិត្យទំនិញក្នុងផ្សារទានភ្លើងនាព្រឹកថ្ងៃទី៦ធ្នូនេះ មន្ត្រីជំនាញកាំកុងត្រូលបានរកឃើញទំនិញខូចគុណភាព និងទំនិញហួសកាលបរិច្ឆេទជាច្រើនមុខ ក្នុងនោះក៏បានរកឃើញ ចាហួយដូង ថាញ់ប៊ិញ ចំនួន៤កេះ ដែលច្បាប់ហាមឃាត់មិនឲ្យដាក់តាំងលក់ផងដែរ ព្រោះចាហួយដូងនេះផលិតឡើងពីជាតិកៅស៊ូ និងប៉ះពាល់ដល់សុខភាពអ្នកបរិភោគជាខ្លាំង ៕
ចែករំលែកព័តមាននេះ