ខេត្តកំពង់ស្ពឺ ៖ ព្រះសង្ឃមួយអង្គត្រូវបានលោកនេនប្រទះឃើញ ចងកធ្វើអត្តឃាតនៅធ្នឹមរោងទទួលភ្ញៀវ ក្នុងវត្ត បង្កឱ្យមានការភ្ញាក់ផ្អើលដល់គណៈកម្មការវត្ត និងសមត្ថកិច្ចកាលពីម៉ោង៦ព្រឹកថ្ងៃទី៦ ខែធ្នូ ឆ្នាំ២០១៨ នៅវត្តភ្នំស្រីស្រណោះ (ហៅវត្តថ្មពូក) ស្ថិតនៅភូមិព្រៃវាវ ឃុំធម្មតាអរ ស្រុកសំរោងទង ខេត្តកំពង់ស្ពឺ។
ព្រះសង្ឃដែលសុគតព្រះនាម សួង សាយ ព្រះជន្ម៦៩ឆ្នាំ គង់នៅវត្តខាងលើ។
តាមប្រភពពីសមត្ថកិច្ចដែលស្រង់សំដីសាក្សីបានអោយដឹងថា មុនពេលកើត លោកនេនមួយអង្គព្រះនាម
ពេជ្រ សុខឃឿន ព្រះជន្ម១៥ឆ្នាំ គង់នៅវត្តភ្នំស្រីស្រណោះ (ហៅវត្តថ្មពូក) បានចេញពីកុដិមកក្រៅ ស្រាប់
តែប្រទះឃើញព្រះសង្ឃខាងលើចងកនៅជាប់ធ្នឹមរោងទទួលភ្ញៀវសុគតបាត់ទៅហើយ។
បន្ទាប់ពីជំនាញបច្ចេកទេសចុះពិនិត្យព្រះសពរួច រកពុំឃើញមានស្លាកស្នាមគួរអោយកត់សំគាល់ឡើយ។
សមត្ថកិច្ចនគរបាលស្រុកបានអោយដឹងថា ការពិនិត្យនេះក៏មានការចូលរួមពីក្រុមប្រឹក្សាឃុំ និងលោកមេភូមិ ព្រមទាំងក្រុមគ្រួសាររបស់ព្រះសង្ឃរងគ្រោះផងដែរ។
បើតាមសាច់ញាតិរបស់ព្រះសង្ឃរងគ្រោះខាងលើបានរៀបរាប់ប្រាប់សមត្ថកិច្ចថា ទំនងជាព្រះអង្គតូចចិត្តនឹងខ្លួនឯងមានជំងឺប្រចាំកាយមើលមិនជាអស់រយៈពេលច្រើនឆ្នាំហើយ ទើបសម្រេចចិត្តបែបនេះ។
ក្រោយពិនិត្យនិងធ្វើកំណត់ហេតុរួចរាល់ ក្រុមគ្រួសារបានទទួលស្គាល់ថា ព្រះសង្ឃរងគ្រោះពិតជាសុគតដោយអង្គឯងពិតប្រាកដមែន។
ក្រោយធ្វើកំណត់ហេតុរួចរាល់ សមត្ថកិច្ចបានប្រគល់ព្រះសពអោយក្រុមគ្រួសាររៀបចំធ្វើបុណ្យតាមប្រពៃណីនៅវត្តខាងលើតែម្តង៕
ចែករំលែកព័តមាននេះ