រាជធានីភ្នំពេញ ៖ បច្ចុប្បន្ន មុខជំនាញបច្ចេកទេសនៅក្នុងប្រទេសកំពុងអភិវឌ្ឍន៍ដូចជាកម្ពុជាជាដើម កំពុងមានតម្រូវការខ្ពស់ ប៉ុន្តែជាការកត់សម្គាល់ក្នុងមួយឆ្នាំៗ សិស្សដែលបញ្ចប់ថ្នាក់វិទ្យាល័យ និងចូលមហាវិទ្យាល័យ បែរជាមិនសូវចាប់អារម្មណ៍ជំនាញទាំងនោះប៉ុន្មានទេ ហើយនាំគ្នាដាក់ពាក្យសិក្សាជំនាញណាដែលចេញមកធ្វើការនៅការិយាល័យទៅវិញ…
រាជធានីភ្នំពេញ ៖ បច្ចុប្បន្ន មុខជំនាញបច្ចេកទេសនៅក្នុងប្រទេសកំពុងអភិវឌ្ឍន៍ដូចជាកម្ពុជាជាដើម កំពុងមានតម្រូវការខ្ពស់ ប៉ុន្តែជាការកត់សម្គាល់ក្នុងមួយឆ្នាំៗ សិស្សដែលបញ្ចប់ថ្នាក់វិទ្យាល័យ និងចូលមហាវិទ្យាល័យ បែរជាមិនសូវចាប់អារម្មណ៍ជំនាញទាំងនោះប៉ុន្មានទេ ហើយនាំគ្នាដាក់ពាក្យសិក្សាជំនាញណាដែលចេញមកធ្វើការនៅការិយាល័យទៅវិញ ។
បើតាមលោក អ៊ូច សំបូរ នាយកសាលាបច្ចេកទេសដុនបូស្កូខេត្តព្រះសីហនុ បានឲ្យដឹងតាមទូរស័ព្ទថា ក្នុងមួយឆ្នាំៗ ការផ្គត់ផ្គង់បុគ្គលិកទៅកាន់បណ្ដាក្រុមហ៊ុនដែលជាដៃគូមិនគ្រប់គ្រាន់នោះទេ ព្រោះសាលាបានកំណត់យកសិស្សចូលរៀនជំនាញបច្ចេកទេស ក្នុងមួយឆ្នាំ តែជាង២០០នាក់ប៉ុណ្ណោះ ដូចនេះ បើក្រុមហ៊ុនណាដែលមកមុន នឹងបានបុគ្គលិកទៅបម្រើការងារមុន ហើយក្រុមហ៊ុនតែងតែមកសម្ភាសន៍សិស្សដល់សាលាតែម្ដង ខុសពីនិស្សិតនៅតាមសាកលវិទ្យាល័យដែលត្រូវការរកការងារដោយខ្លួនគេផ្ទាល់ ។
លោកបន្តថា វាជាការពិតណាស់ ដែលតម្រូវការជំនាញបច្ចេកទេសមានច្រើន តាមរយៈការផ្គត់ផ្គង់សិស្សទៅបម្រើការនៅសង្គមខាងក្រៅ ។ លោកថា ៖« មានក្រុមហ៊ុនខ្លះដែលខ្វះបុគ្គលិកជំនាញបច្ចេកទេសរហូតដល់ថ្នាក់មកសុំឲ្យសិស្សទៅហ្វឹកហាត់មុនពេលសិស្សបញ្ចប់ការសិក្សានៅសាលាទៀតផង ហើយសិស្សដែលចេញពីសាលាអាចនិយាយបានគ្មានអ្នកណាម្នាក់គ្មានការងារធ្វើឡើយ ព្រោះសាលាបណ្ដុះបណ្ដាលជំនាញដែលកម្ពុជាកំពុងត្រូវការ ដូចជា ជំនាញអគ្គិសនី ជំនាញយានយន្ត និងមេកានិក ដែលសុទ្ធតែជាជំនាញដែលកំពុងត្រូវការខ្លាំង ដើម្បីអភិវឌ្ឍន៍ប្រទេស »។
លោកបន្តថា តាមពិតទៅសាលាក៏ចង់ទទួលសិស្សឲ្យចូលរៀនច្រើនដែរ តែដោយសារសាលាដុនបូស្កូ ជាសាលាដែល ទទួលមូលនិធិពីសប្បុរសជនក្នុងនិងក្រៅ ប្រទេស អីចឹងសាលាមិនអាចយកឲ្យលើសពីកំណត់បានទេ។ ម្យ៉ាងវិញទៀត បច្ចុប្បន្ននេះ មូលនិធិដែលទទួលពីសប្បុរសជនក្រៅ ប្រទេសក៏កំពុងធ្លាក់ផងដែរ ព្រោះសប្បុរសជនមួយចំនួនបានបង្វែរពីការជួយរបស់គេមកកម្ពុជា ទៅប្រទេសកំពុងមានវិបត្តិដោយសារសង្គ្រាម និងជនចំណាកស្រុកដោយសារសង្គ្រាមជាដើម ។
លោក ទ្រី សីហា នាយកសាលាដុនបូស្កូសាលាខេត្តកែប ក៏បានឲ្យដឹងដែរថា នៅសាលាដុនបូស្កូខេត្តកែបវិញ ក៏មិនខុសពីខេត្តព្រះសីហនុដែរ ពោលគឺមានក្រុមហ៊ុនជាច្រើនបានប្រជែងគ្នា មកដណ្ដើមសិស្សពីសាលាទៅធ្វើការនៅក្នុងក្រុមហ៊ុនរបស់ខ្លួន ដូចជាក្រុមហ៊ុន ខេស៊ីមិន ក្រុមហ៊ុន Minibea និងសណ្ឋាគារលំដាប់ៗជាច្រើនទៀតនៅកម្ពុជា ។
លោក មួង ផាស៊ី អគ្គនាយករងផ្នែកសិក្សានៃវិទ្យាស្ថានពហុបច្ចេកទេសកម្ពុជា ( NIPC )ក៏បានឲ្យដឹងផងដែរថា បច្ចុប្បន្ននេះ តម្រូវការបុគ្គលិកជំនាញផ្នែកបច្ចេកទេសមានច្រើនលើសលប់ តែការផ្គត់ផ្គង់មិនគ្រប់ទៅតាមតម្រូវការនោះទេ ។ លោកថា ៖« សព្វថ្ងៃនេះ មានទាំងតម្រូវការពីខាងក្រៅនិងក្នុងប្រទេសដើម្បីយកសិស្សនិស្សិតពីយើងទៅធ្វើការនៅតាមក្រុមហ៊ុនរបស់គេ ក៏ប៉ុន្តែមិនមានសិស្សគ្រប់ឲ្យទៅគេទេ បើទោះបីជាកំណើនសិស្សចូលរៀននៅក្នុងសាលាបានកើនឡើងពីមួយឆ្នាំទៅមួយឆ្នាំក៏ដោយ »។
លោកបន្តថា យើងសង្កេតឃើញថា សិស្សដែលចប់ថ្នាក់វិទ្យាល័យ ភាគច្រើនមិនសូវរៀនជំនាញបច្ចេកទេសប៉ុន្មានទេ គឺគេរៀននៅសាកលវិទ្យាល័យតាមជំនាញផ្សេងៗដែលចេញមកធ្វើការនៅការិយាល័យ ក៏ប៉ុន្តែ មែនទែនទៅ សិស្សដែលចប់ពីសាលាបច្ចេកទេសNPIC និងសាលាបច្ចេកទេសផ្សេងទៀត តែងតែមានការងារធ្វើមុននឹងបញ្ចប់ការសិក្សាទៅទៀត ។ នេះបានបង្ហាញថា តម្រូវការជំនាញបច្ចេកទេសនៅក្នុងប្រទេសកម្ពុជាយើងគឺមានតម្រូវការខ្ពស់ខ្លាំង ដែលទាមទារឲ្យមានការបណ្ដុះបណ្ដាលបន្ថែមទៀតឲ្យគ្រប់នឹងតម្រូវការ ៕
ចែករំលែកព័តមាននេះ