ពិតទេដែលថា សាងសង់ឬជួសជុលផ្ទះនៅពេលស្ត្រីកំពុងពពោះនឹងធ្វើឱ្យអាប់រស្មីដល់ទារក?
តាមក្បួនហុងស៊ុយបុរាណបានកំណត់ទុកមកថាបើសិនស្ត្រីមានគភ៌ក្នុងផ្ទះត្រូវចៀសវាងការលាបថ្នាំផ្ទះ ជួសជុលផ្ទះបាយ ប្តូរជើងចង្ក្រាន រួមទាំងការជួសជុលក្នុងផ្ទះជាដាច់ខាត ព្រោះគេមានជំនឿថា នឹងធ្វើឱ្យទារកនៅក្នុងផ្ទៃអាប់រស្មី និងមានសំណាងអាក្រក់ ។ ខាងក្រោមនេះជាបម្រាមដាច់ខាតនៃមនុស្សបុរាណៈ
១-ហាមសាងសង់ឬជួសជុលផ្ទះ ព្រោះផ្ទះថ្មីដែលទើបសាងសង់រួចថ្មីៗតែងពោរពេញទៅដោយវត្ថុកខ្វក់ សំណើម ធុំក្លិនមិនល្អ អាកាសធាតុមិនសូវស្រឡះដែលមិនផ្តល់ផលល្អដល់សុខភាពស្ត្រីមានគភ៌ឡើយ ។
២-ព្រោះថា ការសាងសង់ ឬជួសជុលផ្ទះថ្មី ជាការបន្ថែមការងារដល់ស្ត្រីដែលមានគភ៌កាន់តែធ្ងន់ធ្ងរ និងអាចធ្វើឱ្យរលូតបាន ។
៣-ចាស់ៗបុរាណជឿថា ប្រសិនឱ្យស្ត្រីមានគភ៌លីសែង ជញ្ជូនសម្ភារសាងសង់ផ្ទះនឹងធ្វើឱ្យវត្ថុស័ក្តិសិទ្ធិរត់ចេញទៅអស់ ចំណែកទារកដែលត្រូវមានសំណាងប្រែមកជាភ័ព្វអាក្រក់វិញដូចជា ក្លាយជាកម្មករសំណង់ ឬកម្មករលីសែងវត្ថុធ្ងន់ៗជាដើម ។
ដោយសារតែចាស់ៗមានជំនឿលើហេតុផលនេះហើយទើបគេមិនឱ្យសាងសង់ ឬជួសជុលផ្ទះនៅពេលមានស្ត្រីកំពុងពពោះនៅក្នុងផ្ទះជាដាច់ខាត ។
ចែករំលែកព័តមាននេះ