រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិការអន្តរជាតិកាលពីថ្ងៃទី៦ ខែធ្នូ ឆ្នាំ២០១៨ ឲ្យដឹងថា លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា បានដឹកនាំគណៈប្រតិភូអញ្ជើញទៅចូលរួម និងធ្វើជាសហប្រធានកិច្ចប្រជុំគណៈកម្មការចម្រុះនៃកិច្ចសហប្រតិបត្តិការទ្វេភាគីកម្ពុជា-ឥណ្ឌូនេស៊ីលើកទី៤ដែលបានប្រព្រឹត្តទៅនៅថ្ងៃទី០៤ ខែធ្នូ ឆ្នាំ២០១៨ នៅទីក្រុងហ្សាការតា ប្រទេសឥណ្ឌូនេស៊ី ។
មុនពេលធ្វើជាសហប្រធានកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគីលើកទី៤ លោកឧបនាយករដ្ឋមន្ត្រី ប្រាក់ សុខុន និងលោកជំទាវ រ៉េតណូ អិល.ភី ម៉ារស៊ូឌី បានជួបប្រជុំទ្វេភាគី ដែលក្នុងនោះ រដ្ឋមន្ត្រីការបរទេសទាំងពីរ បានចែករំលែកគ្នាទៅវិញទៅមកនូវសភាពការណ៍ ស្ដីពីនយោបាយ និងសេដ្ឋកិច្ចសង្គមបច្ចុប្បន្ននៃប្រទេសរបស់ខ្លួន និងទស្សនៈស្ដីពីបញ្ហាតំបន់ ។
ក្នុងអំឡុងកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគី លើកទី៤ ភាគីទាំងពីរបានបង្ហាញទស្សនៈរួមគ្នាថាខួបអនុស្សាវរីយ៍លើកទី៦០ នៃការបង្កើតទំនាក់ទំនងការទូតរវាងកម្ពុជា និងឥណ្ឌូនេស៊ី នៅឆ្នាំ២០១៩ នឹងក្លាយទៅជាព្រឹត្តិការណ៍ដ៏មានសារៈសំខាន់ ក្នុងការបង្កើនកិច្ចសហប្រតិបត្តិការទ្វេភាគីរវាងប្រទេសទាំងពីរ ។
ភាគីទាំងពីរបានស្វាគមន៍គម្រោងរៀបចំសកម្មភាពរួមគ្នាជាច្រើន ដើម្បីប្រារព្ធព្រឹត្តិការណ៍ដ៏ឧឡារឹកនេះ ។ ភាគីទាំងពីរ បានពិភាក្សាយ៉ាងទូលំទូលាយ និងស៊ីជម្រៅ លើការអភិវឌ្ឍនៃទំនាក់ទំនងទ្វេភាគី និងវិធានការក្នុងការពង្រីក និងធ្វើឲ្យកាន់តែស៊ីជម្រៅនូវកិច្ចសហប្រតិបត្តិការជាច្រើន ដូចជា ការពារជាតិនិងសន្តិសុខ ពាណិជ្ជកម្មនិងវិនិយោគ កសិកម្ម ការតភ្ជាប់ផ្លូវអាកាស ឧស្សាហកម្ម ថាមពល វប្បធម៌ ទេសចរណ៍ អប់រំ ព័ត៌មាន ការដឹកជញ្ជូន និងសុខាភិបាល។
រដ្ឋមន្ត្រីទាំងពីរបានឯកភាពគ្នាលើកទឹកចិត្តឲ្យបញ្ចប់នីតិវិធីផ្ទៃក្នុង ដែលចាំបាច់សម្រាប់ការចូលជាធរមាននៃកិច្ចព្រមព្រៀងស្ដីពីកិច្ចសហប្រតិបត្តិការលើវិស័យការពារជាតិ ដែលបានចុះហត្ថលេខានៅថ្ងៃទី២៣ ខែតុលា ឆ្នាំ២០១៧ និងបានស្វាគមន៍គំនិតផ្ដួចផ្ដើមបង្កើនកិច្ចសហប្រតិបត្តិការឲ្យកាន់តែជិតស្និទ្ធរវាងស្ថាប័នការពារជាតិពាក់ព័ន្ធនៃប្រទេសទាំងពីរ ៕
ចែករំលែកព័តមាននេះ