ដល់ម្ល៉ឹងផងលោកម្ចាស់!…ក្រុមហ៊ុនហ៊ានកាត់ក្បាលតម្រូវមួក
- កំពង់ឆ្នាំង
ខេត្តកំពង់ឆ្នាំង ៖ រហូតមកដល់ពេលនេះ ក្រុមហ៊ុន រឿន ថាវរិទ្ឋ ដែលធ្វើអាជីវកម្មបូមខ្សាច់ យកលេសស្តារបាតអាង និងជួសជុល ទំនប់កុមារ…
ខេត្តកំពង់ឆ្នាំង ៖ រហូតមកដល់ពេលនេះ ក្រុមហ៊ុន រឿន ថាវរិទ្ឋ ដែលធ្វើអាជីវកម្មបូមខ្សាច់ យកលេសស្តារបាតអាង និងជួសជុល ទំនប់កុមារ ស្ថិតនៅក្នុងភូមិអ្នកតាហាង ឃុំកំពង់ត្រឡាច ស្រុកកំពង់ត្រឡាច នៅមិនទាន់មានច្បាប់ ធ្វើអាជីវកម្មបូមខ្សាច់ពីមន្ទីរក្រសួងពាក់ព័ន្ធនៅឡើយទេ ខណៈដែលក្រុមហ៊ុន មួយនេះកំពុងធ្វើសកម្មភាពបូមខ្សាច់និងដឹកជញ្ជូនចេញរាល់ថ្ងៃ។
សូមរំលឹកដែរថា ក្រុមហ៊ុន រឿន ថាវរិទ្ឋ បានដាក់គ្រឿងចក្រមកបូមខ្សាច់នៅទំនប់កុមារ ក្រោមហេតុផល ជួសជុលទំនប់ ទ្វារទឹក និងស្តារបាតអាង តាមការស្នើសុំរបស់សហគមន៍ ដែលមានលោក ស៊ិន សារ៉ាត់ តាំងខ្លួនជាប្រធានសហគមន៍ (មានក្នុងពាក្យស្នើសុំដាក់ជាប្រធានសហគមន៍) តែក្រោយមកថាជាតំណាងប្រជាពលរដ្ឋ ប៉ុន្តែសហគមន៍នេះ មិនទាន់ត្រូវបានទទួលស្គាល់ពីក្រសួងមហាផ្ទៃនៅឡើយទេ។ បន្ទាប់ពីបានអាជ្ញាប័ណ្ណជួសជុលទំនប់ស្ដារបាតអាង និងទ្វារទឹកនៅខាងចំណុចខាងលើរួចមក ក្រុមហ៊ុនរឿន ថាវរិទ្ធ បែរជាដាក់គ្រឿងចក្របូមខ្សាច់ធ្វើអាជីវកម្មទៅវិញគឺខុសនឹងច្បាប់ស្ដីពីរ៉ែ និងថាមពល ។
ពាក់ព័ន្ធនឹងបញ្ហានេះកាលពីពេលកន្លងទៅ លោក អ៊ុក រស់ ប្រធានមន្ទីររ៉ែនិងថាមពលខេត្តកំពង់ឆ្នាំង បានប្រាប់អ្នកសារព័ត៌មានថា រឿងជួសជុលទំនប់ ស្ដារបាតអាងនៅទំនប់កុមារ គឺគេមានច្បាប់ វាជារឿងត្រឹមត្រូវ ប៉ុន្តែរឿងបូមខ្សាច់ធ្វើអាជីវកម្មគឺខុសនឹងច្បាប់ស្ដីពីការគ្រប់គ្រងរ៉ែ និងថាមពល។ ហេតុនេះ ក្រុមហ៊ុនត្រូវតែធ្វើច្បាប់សុំពីមន្ទីររ៉ែនិងថាមពល ដើម្បីបង់សួយសារអាករ អោយបានត្រឹមត្រូវ ។
កាលណោះលោក អ៊ុក រស់ ក្រោយពីចុះពិនិត្យទីតាំងបូមខ្សាច់ខាងលើ ក៏បានប្រាប់ថា បើមានច្បាប់ស្តារបាតអាង គឺអាចបូមបាន តែហាមធ្វើអាជីវកម្មមានន័យថា បូមបានតែហាមដឹកខ្សាច់ចេញយកទៅលក់ធ្វើអាជីវកម្ម ចំណុចសំខាន់គឺនៅត្រង់ហ្នឹង ។
ក៏ប៉ុន្តែមកដល់ពេលនេះក្រុមហ៊ុននៅតែបូមខ្សាច់ដឹកចេញទៅលក់ដោយរលូន ជារៀងរាល់ថ្ងៃ ទាំងមិនទាន់មានច្បាប់ត្រឹមត្រូវនៅឡើយ ហើយជុំវិញបញ្ហានេះ នៅរសៀលថ្ងៃទី ៥ខែធ្នូឆ្នាំ ២០១៨ នេះ លោក អ៊ុក រស់ បានប្រាប់តាមទូរស័ព្ទថា ក្រុមហ៊ុនរឿន ថាវរិទ្ឋ ពិតជាមិនទាន់មានច្បាប់នៅឡើយទេ កំពុងតែរត់ច្បាប់
(ម្យ៉ាងដែរ) ។
យ៉ាងនេះក្តី មកដល់ពេលនេះមានរយៈពេល ជាង១ខែហើយនៅមិនទាន់បានច្បាប់នៅឡើយ ហើយបើបែបនេះមែន គឺ ប្រៀបបាននិងអត្ថន័យថា ក្រុមខាងលើនេះ «កំពុងកាត់ក្បាល តម្រូវមួក គឺមិនមែនកាត់មួកតម្រូវក្បាលនោះទេ» ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ