ប្រទេសកម្ពុជាមានភាពជំពាក់ជំពិនជាច្រើននៅក្នុងអង្គការសហប្រជាជាតិ ។ ប៉ុន្តែមានមនុស្សមិនច្រើនទេបានយល់ដឹងច្បាស់អំពីបេសកកម្មកម្ពុជានៅក្នុងអង្គការពិភពលោកមួយនេះ ។
តើយើងគួរធ្វើដូចម្តេច ដើម្បីដឹងច្បាស់អំពីការងារនៅអង្គការសហប្រជាជាតិ និងទំនាក់ទំនងរបស់កម្ពុជានៅក្នុងអង្គការនេះ ? «មានតែការអាន និងស្តាប់ឲ្យបានច្រើនទេ ទើបការនិយាយ និងការបញេ្ចញមតិរបស់យើងមានតម្លៃជាគតិដល់អ្នកស្តាប់របស់យើង ។ ចំណេះទូលំទូលាយអាចរកបានតាមរយៈសៀវភៅនេះឯង ដែលអាចចាត់ទុកថា ជាគ្រូបន្ថែមម៉ោងរបស់យើងគ្រប់ពេលវេលា និងគ្រប់ទីកន្លែង» ។
នេះបើតាមប្រសាសន៍របស់លោក យោង ចាន់សុភារ ដែលបច្ចុប្បន្នជាប្រធាននាយកដ្ឋាននៃក្រសួងការបរទេស និងសហប្រតិបតិ្តការអន្តរជាតិ ។ សម្រាប់ពិពរណ៌សៀវភៅកម្ពុជាលើកទី៧ ឆ្នាំនេះ លោក សុភារ សូមចូលរួមដាក់តាំងជាលើកទី២ នូវសៀវភៅរបស់លោក ក្រោមចំណងជើងថា «តើគេធ្វើអ្វីខ្លះ នៅអង្គការសហប្រជាជាតិ ?» ដែលជាស្នាដៃក្នុងអំឡុងពេលដែលលោកបានបំពេញមុខងារជាអ្នកការទូតកម្ពជាយើង រយៈពេល៣ឆ្នាំនៅអង្គការសហប្រជាជាតិប្រចាំក្រុងញូវយ៉កនាពេលកន្លងទៅថ្មីៗនេះ ។
លោក យោង ចាន់ សុភារ បានប្រាប់ថា សៀវភៅដែលលោកបានចំណាយពេលជិត២ឆ្នាំសរសេរនេះនឹងនាំមិត្តអ្នកអានឲ្យយល់ដឹងពីអង្គការសហប្រជាជាតិ និងការជំពាក់វ័កវិនរបស់កម្ពុជា ក្នុងអង្គការនេះក្រោយកម្ពុជាចូលជាសមាជិកនៃអង្គការនេះអស់រយៈពេល៦៣ឆ្នាំមក ។ អ្វីដែលគួរចង់ដឹងផងដែរនោះ គឺសៀវភៅនេះមានរៀបរាប់ពីដំណើការកាត់ក្តីប្រាសាទព្រះវិហាររបស់តុលារការយុតិ្តធម៌អន្តរជាតិ (ICJ) ការកាន់កាប់អាសនៈកម្ពុជាដ៏វែងអន្លាយដោយរដ្ឋាភិបាលខ្មែរក្រហមនៅពេលនោះ និងមានរៀបរាប់អំណាចរបស់អគ្គលេខាធិការក៏ដូចជា ក្រុមប្រឹក្សាសន្តិសុខ និងមហាសន្និបាតអង្គការសហប្រជាជាតិ និងថា តើសេចក្តីសម្រេចចិត្តមានន័យយ៉ាងដូចម្តេច និងក៏ដូចជា ចំណុចលេចធ្លោនៃមាត្រារបស់ធម្មនុញ្ញអង្គការសហប្រជាជាតិ ។
លោក សុភារ សំណូមពរឲ្យសិស្សនិសិត្សលោកឪពុកអ្នកម្តាយចូលរួមតាំងពិពរណ៌សៀវភៅកម្ពុជាឆ្នាំនេះ ពីថ្ងៃទី៧ដល់ថ្ងៃទី៩ ខែធ្នួ នៅបណ្ណាល័យជាតិជិតវត្តភ្នំឲ្យបានកាន់តែកុះករ ព្រោះមានសៀវភៅគ្រប់បែបយ៉ាងទាំងសម្រាប់កុមារ និងមនុស្សចាស់ និងក៏ដូចជា ការលើកទឹកចិត្តដល់អ្នកនិពន្ធខ្មែរយើងឲ្យបន្តសរសេរសៀវភៅជាមេរៀនល្អៗសម្រាប់អ្នកជំនាន់ក្រោយ ក៏ដូចជា រួមចំណែកដល់ប្រទេសជាតិយើងកាន់តែរឹងមាំង ៕
ចែករំលែកព័តមាននេះ