ខេត្តសៀមរាប ៖ ថ្លែងក្នុងសន្ទរកថានៃកិច្ចប្រជុំបច្ចេកទេសលើកទី៣១ និងពេញអង្គលើកទី២៥នៃការបង្កើតគណៈកម្មាធិការអន្តរជាតិ សម្របសម្រួល កិច្ចគាំពារ និងអភិវឌ្ឍន៍តំបន់អង្គរហៅកាត់ថា អាយស៊ីស៊ី-អង្គរ (ICC-Angkor) លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា បានបង្ហាញពីគោលបំណងនៃការប្រារព្ធខួបលើកទី២៥ឆ្នាំ គឺដើម្បីរំឭកឡើងវិញនូវការប្តេជ្ញាចិត្តរបស់យើងទាំងអស់គ្នាកាលពី២៥ឆ្នាំមុន ក៏ដូចជាបង្ហាញពីភាពជោគជ័យដែលរាជរដ្ឋាភិបាលកម្ពុជា និងសហគមន៍អន្តរជាតិទទួលបាន ដោយជម្នះនូវបញ្ហាប្រឈមនានាដែលជួបប្រទះកន្លងមក ហើយដែលនឹងកំពុងដោះស្រាយជាមួយគ្នាទៅតាមមាគ៌ាដែលបានត្រួសត្រាយឱ្យបានសម្រេចតាមគោលដៅនាពេលខាងមុខ ។
លោកជំទាវរដ្ឋមន្ត្រីបន្តទៀតថា បច្ចុប្បន្នរមណីយដ្ឋានបេតិកភណ្ឌពិភពលោក-អង្គរ លែងប្រឈមនឹងបញ្ហាអសន្តិសុខ ប្រាង្គប្រាសាទ ដួលរលំ ឬការលួចវត្ថុបុរាណទៀតហើយ ក៏ប៉ុន្តែយើងក៏ជួបប្រទះនឹងបញ្ហាប្រឈមមួយចំនួនផ្សេងទៀតដូចជា ការប្រែប្រួល អាកាសធាតុ ការ បំពុលបរិស្ថាន ការគ្រប់គ្រងការតាំងទីលំនៅថ្មីនៅក្នុងតំបន់ការពារនៃរមណីយដ្ឋានអង្គរ ការគ្រប់គ្រងលំហូរភ្ញៀវទេសចរ ។ល។ ដែលចាំបាច់ត្រូវរកដំណោះស្រាយ និងវិធីសាស្ត្រទប់ទល់ឱ្យបានសមស្របនិងមានប្រសិទ្ធិភាពទាំងក្នុងបច្ចុប្បន្ន និងអនាគត ។
តែក៏ជាសំណាងល្អដែលយើង មានក្រមប្រតិបត្តិអង្គរសម្រាប់ឱ្យភ្ញៀវទេសចរគ្រប់ជាតិសាសន៍គោរពតាម និងមានអង្គការធានាគុណភាពជប៉ុន (JQA) ដែលតែងធ្វើសវនកម្មផ្ទៃក្នុង/ក្រៅលើផ្នែកគ្រប់គ្រងប្រព័ន្ធបរិស្ថាននៅតំបន់អង្គរ រហូត ទទួលបានវិញ្ញាបនបត្រធានាគុណភាពជប៉ុនដល់ទៅ៥លើកសម្រាប់អាជ្ញធរជាតិអប្សរា។ ប៉ុន្តែទោះជាយ៉ាងណាក៏យើងនៅតែបារម្ភនិងបន្តការខិតខំរកដំណោះស្រាយបន្តទៅទៀតលើបញ្ហាទាំងនេះបន្តផងដែរ ។
ទាក់ទងនឹងការលើកឡើងពីបញ្ហាប្រាសាទលែងប្រឈមនឹងបញ្ហាគ្រោះថ្នាក់នោះ លោកជំទាវ ក៏បានឱ្យដឹង វាជាការផ្តើមចេញដ៏ល្អពីកិច្ចសហប្រតិបត្តិការជាតិ និងអន្តរជាតិ ចេញពីឬសគល់នៃក្តីស្រឡាញ់ និងស្មារតីនៃការថែរក្សាតំបន់អង្គរ ដែលគ្រប់គ្នាចាត់ទុកថាជាសម្បត្តិបេតិកភណ្ឌពិភពលោក ដែលមនុស្សជាតិទាំងអស់ត្រូវនាំគ្នាថែរក្សា ៕
ចែករំលែកព័តមាននេះ